Hatutan.com, (11 Novembru 2021), Díli-Adelina Teresa da Costa Pereira Jerónimo, oan-feto husi Prezidente Federasaun Futeból Timor Leste (FFTL), Francisco da Costa Jerónimo, konsidera notísia Hatutan.com, edisaun  Segunda, 08 fulan-Novembru 2021,  ho títulu, “Deskonfia, Ezekutivu FFTL Balun Subar Amante” inventa maka barak (HOAX) la tuir realidade.

Lee Mós Notísia Ne’e : Deskonfia, Ezekutivu FFTL Balun Subar Amante

Adelina Teresa da Costa Pereira Jerónimo, nu’udar oan-feto husi Prezidente FFTL, Francisco da Costa Jerónimo ba notísia Hatutan.com.

Hafoin notísia ne’e publika iha loron tuir mai, 09 fulan-Novembru 2021, tuku 15:50 Otl, Adelina Teresa da Costa Pereira Jerónimo, halo kedas komentáriu ba notísia ne’e, inklui haruka mensajen ba númeru WhatsApp Redasaun Hatutan.com nian, afirma katak, nia nu’udar oan-feto hosi membru ezekutivu FFTL refere lamenta notísia ida-ne’e ho razaun notísia ne’e inventa maka barak (HOAX) la tuir realidade ne’ebé iha.

“Ha’u lamenta ho ita-boot nia notísia ida-ne’e husu atu bele apaga notísia ida-ne’e ho razaun ita-boot nia notísia ne’e inventa maka barak (HOAX) la tuir realidade ne’ebé maka iha. Favor sai jornalista ne’ebé la’ós inventa dor atu buka sensasi,” Adelina Teresa da Costa Pereira Jerónimo haktuir iha nia komentáriu ba notísia Hatutan.com nian  inklui haruka mensajen mai númeru  WhatsApp redasaun Hatutan.com nian.

Iha  Kinta (10/11/2021), Redasaun Hatutan.com halo kontaktu direita ba númeru WhatsApp Adelina Teresa da Costa Pereira Jerónimo nian hodi konfirma komentáriu ida-ne’e, nia rekoñese katak nia duni maka haruka mensajen WhatsApp ne’e no halo komentáriu ba notísia Hatutan.com nian ne’e.

Nia mós lia-tun dehan, nia nu’udar oan-feto hosi Prezidente FFTL, Francisco da Costa Jerónimo atuál Ministru Asuntu Parlamentár no Komunikasaun Sosiál (MAPKOMS).  

Lee Mós Notísia Ne’e : PNSIK Arrola Ona Kazu Prezidente FFTL Maibé Seidauk Bele Pronunsia ba Públiku

Liuhusi entrevista via komunikasaun WhatsApp ne’e, Adelina Teresa da Costa Pereira Jerónimo, deklara mós katak notísia ne’e 50% loos no 50% laloos. Ho nune’e, Hatutan.com husu klarifikasaun notísia laloos maka ne’ebé no ida loos maka ne’ebé, maibé Adelina Teresa da Costa Pereira Jerónimo, dehan de’it, laloos no lakohi tan fó komentáriu kle’an tanba nia hateten nia kondisaun psikolójika la permite atu ko’alia agora.  

“Ita boot sira-nia notísia HOAX no inventa barak liu tanba ne’e ami família preokupa no hanesan oan ne’e soke ho ha’u nia privasidade.  Ha’u labele atu ko’alia barak kona-ba asuntu ne’e tanba ne’e família nia problema husu atu ita-boot sira hatún notísia mós tenke respeita ha’u-nia privasidade tanba ne’e husik lai situasaun hanesan ne’e ba to’o tempu ha’u nia mental di’ak  no kondisaun di’ak maka ha’u ko’alia,” Adelina Teresa da Costa Pereira Jerónimo, hateten.  

FFTL Sei Foti Medida Tuir Estatutu

Vise-Prezidente FFTL, Falur Rate Laek. Foto/Espesiál

Hosi sorin seluk, Vise-Prezidente Federasaun Futeból Timor-Leste (FFTL), Falur Rate Laek, hateten, membru ezekutivu sira iha FFTL nia laran sei tuur hamutuk hodi foti medida hasoru Prezidente FFTL, Francisco Martins da Costa Pereira Jerónimo, kona-bá aktu ka insidente baku rahun karreta funsionária FFTL ida nian iha resintu FFTL nian, domingu (07/11/2021), purvolta tuku 06:00 dadeer Otl.

Vise-Prezidente FFTL atuál hanesan  Vise Xefe Estadu Maiór Jenerál F-FDTL, Major Jenerál Falur Rate Laek, informa katak, tuir Kinta  meiudia  ne’e, sei hasoru malu ho membru sira hotu iha FFTL nia laran, hodi hala’o enkontru ho Komité Ezekutivu (Exco) sira, para sira bele hola medida ruma ka fó solusaun ka  oinsá.

Lee Mós Notísia Ne’e : Exco FFTL Sei Organiza Enkontru Foti Desizaun Ba Kazu Prezidente Francisco Jeronimo

“Solusaun ne’e, ami haree saida mak tuir regra sira, estatutu sira iha FFTL nian, ami tuir saida mak, ami halo ida ne’e. Ami la mistura problema ema asuntu pesoál ho asuntu instituisaun ka organizasaun nian. Tanba ne’e, buat ne’ebé mak iha implikasaun ba FFTL nia servisu ne’e, ita tenke hola medida,” Vise-Prezidente FFTL, Falur Rate Laek, informa hodi responde jornalista sira iha Kuartél Jenerál F-FDTL, Fatuhada, Díli.

Kona-bá estraga imajen organizasaun FFTL nian ligadu ba insidente iha FFTL ne’e, Falur Rate Laek, hatán katak, so públiku bele hatete dehan imajen di’ak ka la di’ak, no nia labele halo fali avaliasaun. 

Bainhira husu kona-bá karreta ne’ebé rahun iha resintu FFTL nian, ‘formalmente’ nia seidauk iha informasaun ruma ba karreta ne’e nia kondisaun oinsá. Maibé, bainhira insidente ruma mosu ona, autoridade polísia sira mak bele  hatene liu  hodi halo detensaun no  investigasaun tuir lei.

“Ida ne’e, kuandu krime ona ne’e, keixa iha ona ne’e, polísia mak ba kaer, la’ós ha’u mak dehan katak krime. Krime ne’e so justisa mak dehan krime. Imi jornalista mós labele hateten dehan krime,” Falur Rate Laek hateten

Membru ezekutivu ne’e mós hato’o katak, ema hotu-hotu ne’ebé moris iha rai ka nasaun ida, sempre hasoru problema no dezafiu oioin iha sira nia moris. Maibé, membru ezekutivu sira seluk ne’ebé iha instituisaun nia laran tenke iha kapasidade atu buka solusaun hodi rezolve.

“Ha’u sente, problema ema moris iha prosesu ida iha rai ne’e, prosesu sosiál ida ne’e, polítiku ida ne’ebá ne’e, sempre iha dezafiu oioin, ne’e dezafiu, problema ne’e sempre iha. Mais ne’e, mai atesta ka dezafia ema sira ne’ebé iha instituisaun nia laran, organizasaun nia laran, nia kapasidade para ba fó solusaun ba ida-ne’e, sai nu’udár hanesan referénsia ba kreximentu ka ba dezenvolvimentu institusionál ka organizasionál,” Falur Rate Laek afirma tan.

Rede Feto Preokupa

Logotipu Rede Feto Timor-Leste

Organizasaun sosiedade sivíl, Rede Feto Timor-Leste, preokupa ho insidente ne’ebé mosu iha resintu FFTL  tanba iha akontesimentu ne’e rezulta funsionária FFTL nian ida sai vítima, inklui nia karreta rahun.

Prezidente Konsellu Organizasaun Rede Feto TL, Zelia Fernandes, hato’o sira nia preokupasaun kona-bá akontesimentu iha FFTL hodi rezulta feto maluk ida sai vítima ba hahalok hosi família Prezidente FFTL nian.  

“Hanesan ohin ami dehan katak Rede Feto preokupa ho situasaun sira-ne’e hotu. Akontesimentu sira hanesan ne’e, la’ós foin dahuluk, maibé beibeik ona no liu-liu liga ho autóres ka ho ema sira ne’ebé mak iha poderes foti desizaun,” Zelia Fernandes, hateten hodi responde Hatutan.com via telefónika. 

Rede feto, hanesan organizasaun feto ida ne’ebé mak defende direitu feto sira nian, no importante hodi tulun feto maluk sira asesu ba justisa. Tanba kazu ne’e, iha ona parte kompetente nia liman, Rede Feto sei akompaña prosesu hotu, to’o hetan justisa ne’ebé loos.

Rede Feto promete sei buka atu halibur informasaun ne’ebé kle’an hosi parte hotu-hotu, molok hola nia pozisaun.

“Rede Feto sei akompaña prosesu ida-ne’e atu haree katak, sé nu-kazu iha duni asaun krime ne’ebé mak komete hosi família Prezidente FFTL nian, ha’u hanoin katak, importante para atu kontinua kazu ne’e,” Zelia Fernandes hateten.

Prezidente konsellu Rede feto ne’e akresenta, nu’udár organizasaun ida ne’ebé mak hala’o advokasia ba asuntu feto nian, sempre fó nia akompañamentu no asisténsia, liuhosi membru sira ne’ebé mak hala’o servisu espesífiku ba asuntu ne’e. Maibé, fila-fali ba pesoál sira ne’ebé mak sente katak sai vítima, tenke hato’o keixa mai iha rede feto, para depois Rede Feto bele halo akompañamentu.

Rede Feto mós hato’o agradese ba mídia sira ne’ebé durante sempre fó sira nia kontribuisaun hodi halo publikasaun ba kazu sira ne’ebé iha relasaun ho violasaun direitu feto nian.

“Ha’u rasik seidauk iha informasaun ruma serteza kona-bá asuntu ne’ebé mak komete hosi Prezidente FFTL. Maibé, atu hateten katak, Rede Feto nia vizaun atu feto hotu-hotu livre hosi diskriminasaun no violénsia oioin ne’ebé mak mosu iha ita nia rai doben,” Prezidente Konsellu Rede Feto ne’e afirma.

 Jornalista: Rogério Cárceres/Vito Salvadór