Hatutan.com, (02 Marsu 2023), Díli—Klubu Academica FC konkista vitóriaa no rekolla pontu tolu dahuluk iha jogu kontinuasaun Liga Timorense époka 2022-2023, primeira divizaun hafoin halakon adversáriu Aitana FC ho skore 3-0.

Klubu Academica FC konkista vitóriaa no rekolla pontu tolu dahuluk iha jogu kontinuasaun Liga Timorense époka 2022-2023, primeira divizaun hafoin halakon adversáriu Aitana FC ho skore 3-0. Foto/LFTL.

Ekipa rua iha ambisaun ba pontu tolu iha jogu kontinuasaun ba Jornada daruak nian atu bele asegura pozisaun iha tabela klarifikasaun provizoriu Liga Timorense époka 2022-2023.

Lee Mós: Assalam FC Rekolla Pontu Tolu Dahuluk Iha Liga Timorense époka 2022-2023

Ekipa Aitana FC ne’ebé iha primeiru jogu rekolla ona pontu tolu hafoin halakon nia adversáriu Porto Taibessi FC, halo ekipa ne’e iha motivasaun makas atu rekolla tan vitória iha segundu jogu ne’e kontra Academica FC.

Bainhira jogu hahú Aitana FC hahú kedan halo presaun ba ekipa adversáriu liu hosi taktika ne’ebé iha no parte Academica FC ho kalma halo adaptasaun ba Aitana FC nia jogu hodi buka oportunidade atu bele halo jogu no implementa taktika ne’ebé iha hodi halo balansu ba ekipa adversáriu nia jogu.

Jogu foin tama ba minutu 4, Jogadór Academica FC Erolismo Martins (4) simu ona kartaun kinur hafoin halo falta hasoru Jogadór avansadu Aitana FC.

Ekipa Aitana FC aproveita kedas oportunidade ne’e, hodi organiza jogu iha meiu kampu no halo pasajen bola hosi liña ba liña ho kombinasaun ne’ebé iha atu bele buka hatama golu maibé Academica FC sei bele asegura sira nia area ho diak.

Aitana FC kontinua halo presaun ba Academica FC maibé laiha golu ruma ne’ebé akontese. Academica FC hahú halo tranjisaun bactaktika no sempre lansa bola as ba iha avansadu Nortey Kojo (18) hodi halo presaun ba liña defeza Aitana FC maibé atake ne’ebé iha la fo influensia ba defeza adversáriu nune’e laiha golu ruma akontese.

Tama ba minutu 24 Jogadór Aitana FC Osvaldo Freitas (24) simu kartaun kinur hafoin komete falta hasoru jogadór adversáriu.

Ekipa rua mantein ho ritmu jogu ne’ebé iha no Aitana FC kontinua halo ataka ba Academica FC. Iha minutu 35 Académica FC halo substituisaun  ba nia Jogadór iha liña defeza hodi hasai Erolismo Martins (4) no hatama António Ximenes (13).

Ekipa rua mantein ho jogu no estatistika hatudu ekipa Aitana FC domina jogu no kuaze halo akurasaun pasajen ho diak no rezulta ameasa lubuk ida ba iha ekipa adversáriu.

Tama ba minutu 39 jogadór Academica FC António Ximenes (13) simu kartaun kinur hafoin hamonu kapitaun Aitana FC Jilson Rivaldo (10). Aitana FC hetan oportunidade bola falta ne’e hodi halo atake maibé bola ne’ebé suta dook hosi baliza.

Ekipa rua nafatin halo kontra atake ba malu iha minutu ikus primeira parte nian maibé falla halo golu nune’e rezultadu primeira parte nian ekipa rua obrigadu tenke fahe pontu hanesan.

Tama ba segunda parte ekipa Aitana FC hola kedas inisiativa hodi halo substituisaun  iha minutu 45 hodi hasai Osvsldo Freitas (24) no hatama William Vong (21).

Ekipa Académica FC hahú halo tranjisaun ba taktika oha segunda parte no Jogadór meiu kampu Damianus Putra (12) hahú organiza meiu kampu, no halo mobilizasaun ba jogu hahú hosi liña kotu hodi sae no organiza mos kontra atake lais liu hosi tekniku ne’ebé Jogadór estranjeiru ne’e iha.

Tama ba minutu 66, ekipa Académica FC no Aitana FC halo substituisaun  ba Jogadór iha liña klaran tamba sofre aleiza, ekipa Académica FC hasai kapitaun ekipa Joel Gaio (6) hodi hatama Florindo Soares (21) enkuantu Aitana FC hasai Luis da Silva (8) no hatama Miguel Araújo (9).

Hafoin substituisaun  ne’e, hare katak ekipa Aitana FC nia jogu komesa tun no Académica FC aproveita oportunidade ne’ebé iha hodi hasae intensidade jogu ath bele halo kontra atake liu hosi Jogadór sira meiu kampu.

Tama ba minutu 70, jogadór estranjeiru Académica FC Damianus Putra (12) konsege hetan oportunidade liu hosi bola ne’ebé noa hetan no organiza kedas jogu hodi halo atake no okus mai konsege oferese asostensia ba nia maluk Jogadór Juvinal Boavida (19) hodi marka golu dahulu ba Académica FC hodi muda skor ba 1-0.

Hafoin golu ne’e, Jogadór Académica FC kontinua iha ânimu no mantein halo presaun ba ekipa Aitana FC, no tama ba minutu 73 Académica FC hatama tan golu ida liu hosi Jogadór Hilário Ximenes (11) ne’ebé simu asisténsia hosi Jogadór Nortey Kojo (18) liu hosi bolla barullu iha area grandeal Aitana FC nian. Ho golu ne’e, Académica FC lidera provizoriu ho skor 2-0.

Maske provizoriamente derota ho skor 2-0, Aitana FC nafatin iha motivadaun atu halo jogu no kontra atake hodi duni tuir atrazu ne’ebé iha.

Aitana FC kontinua halo substituisaun  hodi hasai Gabriel da Costa (14) no hatama Hermínio Moniz (31) iha minutu 73, atu bele iha mudansa ba taktika no bele hadia liña klaran nune’e bele halo atake ba adversáriu.

Tama ba minutu 77 Aitana FC halo tan substituisaun  ba Jogadór iha liña Avansadu hodi hasai Jilson Rivaldo (10) no hatama Rivaldo Martins (13) atu bele aumenta tan avansadu nune’e bele halo atake barak liutan ba adversáriu.

Académica FC hahú halo mudansa ba taktika hodu buka meius oinsa joga barak liu iha liña klaran hodi asegura vitória ne’ebé iha.

Tama ba minutu 78 Académica FC halo substituisaun  hodi hasai avansadu Nortey Kojo (18) no hatama Mediu Hélder Lopes (17).

Jogadór Hélder Lopes (17) ne’ebé foin tama iha minutu 78 konsege marka golu ida hodi muda eskor ba 3-0 iha minutu 79 hafoin simu asistensia hosi Jogadór meiu kampu Damianus Putra (12).

Ho golu ne’e ekipa Aitana FC sente lahakmatek no nafatin buka oportunidade atu halo golu resposta maibé nafatin falla.

Aitana FC halo substituisaun  ikus hodi hasai defeza direita Franceliña Belo (22) no hatama mediu Hélder Valente (46), hodi halo mudansa ba jogu maibé nafatin laiha golu ruma akontese hodi muda skor.

Académica FC halo substituisaun  ba nia Jogadór estrela ne’ebé joga iha liña mediu Damianus Putra (12) iha minutu 90+1 hodi hatama Leandro Amaral (16).

Liu deit minutu ida, tama ba minutu 90+2 Académica FC kontinua halo substituisaun  hodi hasai Hilário Ximenes (11) no hatama Melchior Cristóvão (14).

To’o arbitu Francisco Pereira de Andrade huu apitu sinal jogu termina laiha tan golu ruma akontese nune’e ekipa Académica FC rekolla vitória ho skor 3-0 no Aitana FC obrigadu tenke simu derota.

Hafoin jogu, treinadór Aitana FC, José Fonseca hateten Jogadór Aitana FC laiha problema ho rezisténsia fízika tamba maioria Jogadór iha kondisaun di’ak. Faillansu ne’ebé ekipa hasoru mak Jogadór sira tarde atu halo tranjisaun taktika hodi asegura atake hosi ekipa adversáriu tamba ne’e rezulta golu sira ohin ne’e.

“Ohin ami falla iha area konsentrasaun liña defeza nian, ha’u nia jogadór sira iha defeza la antisipa ho adversáriu nia jogu nune’e bainhira adversáriu kaer bola no halo atake mak ami nia Jogadór sira foin hakfodak no ema marka ona golu,” Hateten José Fonseca.

Treinadór ne’e hatutan sei prepara ekipa máximu ba jogu tuir atu bele asegura ekipa Aitana FC hosi derota.

Treinadór Académica FC, Luizinho dos Santos Saco hateten iha primeira parte nia Jogadór sira kuaze joga ho presaun, no lakon konsentrasaun no la foku ho jogu ne’ebé iha no tama ba segunda parte orienta atu Jogadór sira hadia jogu hodi joga hosi ain ba ain nune’e bele hetan ritmu no oportunidade atu marka golu no ikus mai akontese dunik.

Treinadór ne’e mós ogullu ho nia Jogadór meiu kampu Damianus Putra (12) ne’ebé iha segunda parte konsege organiza jogu iha meiu kampu ho diak no hatudu skill individu ne’ebé kapas no iha kolaborasaun diak ho Jogadór hotu ne’ebé ikus mai Académica FC konkista pontu tolu.

Jornalista: Vito Salvadór