Hatutan.com (24 Novembru 2021) Dili—Governu liu husi Sekretária Estadu Terras no Propriedade (SETP) iha kompeténsia hodi halo despezu ba rai Estadu ne’ebé okupa hosi kualkér sidadaun, bainhira laiha akordu no la selu taxa ba Governu, tanba Governu iha kompeténsia atu atribui ba kualkér sidadaun ne’ebé iha interese atu arrenda.

Sekretáriu Estadu Terras no Propriedade, Mário Ximenes.Foto/Portal Governu.

Sekretáriu Estadu Terras no Propriedade, Mário Ximenes, hateten ba Hatutan.com relasiona ho despezu ne’ebé SETP halo iha 23 fulan ne’e, ba rai Estadu iha aldeia 03 suku Fatuhada, postu administrativu Dom Aleixo, Munisípiu Dili, ne’ebé antes ne’e okupa hosi atuál Prokuradór António Tavares.

Notísia iha Relasaun:SETP Impede Konstrusaun Uma iha Rai Estadu

Durante okupante hela iha fatin ne’e la selu taxa ba Governu, maibé depois halo notifikasaun ikus mai hakarak arrenda, maibé labele ona tanba Jacinto Alves hato’o ona pedidu ne’ebé hetan aprovasaun hodi arrenda ba Estadu.

Bazeia ba notifikasaun hosi parte SETP ne’ebé hato’o beibeik ba okupante António Tavares, hahú iha tinan 2009 atu hamamuk fatin ne’e, maibé lakohi hamamuk, nune’e ikus-mai SETP hetan despaixu hosi Ministru Justisa (MJ), Manuel Cárceres ba SETP hodi prepara no ordena despeza administrativa tuir kompeténsia SETP, tanba ne’e iha Tersa (23/11/21) SETP ho Polísia tun direitamente hodi hamamuk fatin ne’e.

Bainhira okupante sira halo ona uma, la’ós kulpa Estadu  tanba bainhira Estadu fó ona notifikasaun maka okupante labele konstrui tán uma iha rai ne’e, tanba ne’e konsidera sei disputa ho Estadu.

“Jacinto Alves hato’o ona pedidu desde Governu anterior atu halo konstrusaun iha fatin ne’e hanesan arrendatáriu, maibé momentu

Eskapatór hahú sobu uma ne’ebé okupa hosi atuál Prokuradór António Tavares iha rai Estadu ne’ebé lokaliza iha aldeia 03, suku Fatuhada, postu administrativu Dom Aleixo, Munisípiu Dili, Kuarta (24/11/21). Foto/Hatutan.com.

ne’ebá labele tanba iha okupante barak. Tanba ne’e, desizaun ne’e sai iha Governu anteriór ne’ebé notifika beibeik ona ba okupante António Tavares, maibé la konsege hamamuk maske nia hato’o pedidu ba Ministru Justisa no Ministru rasik la konsidera pedidu no ikus mai Ministru hatun despaixu ba SETP hodi prepara no ordena orden despeza administrativa tuir kompeténsia SETP,” Mário Ximenes hateten iha knaar fatin Bebora, Kuarta (24/11/2021).

Bainhira okupante António Tavares la aseita ho desizaun ne’e maka, nia iha direitu tomak atu rekorre tuir prosesu judisiál, maibé importante se mak hakarak utiliza ba privadu tenki tuir regra hodi halo kontratu arrendamentu ho Estadu, nune’e bele manan reseita ba kofre Estadu.

Estadu Arrenda Rai ba Ema Rihun neen  

Totál rai ne’ebé Estadu fó ba ema aluga hamutuk rihun neen-resin ne’ebé tama hela iha arrendamentu ba Estadu.

Oras ne’e daudaun, iha ema hamutuk rihun haat-resin mak hato’o proposta atu aluga rai maibé pesoál hosi SETP menus atu halo identifikasaun foun hodi tau presu ba arrendatáriu.

Devér hosi arrendatáriu maka fulan-fulan tenke selu taxa ba Governu no bainhira la selu tenke dada hikas.

Hosi reseita ne’ebé SETP hetan iha tinan 2019 to’o 2020 hamutuk millaun $4.2, maibé hahú iha fulan Janeiru to’o Outubru 2021 resita menus kompara ho tinan kotuk, tanba iha tinan ne’e hetan de’it millaun $2.8, tanba pandemia Covid-19 no estabilidade ekonomia povu la estável.

Jornalista: Carmelita Isaac