Hatutan.com (25 Novembru 2021) Dili—Estabelesimentu prizaun Becora,Dili, submete ona dadur na’in 30 ne’ebé laiha eis Governante no feto ne’ebé maioria mai hosi pedidu Diretór prizaun, família no advogadu.

Estabelesimentu Prizaun Becora. Foto/Dok João Domingos.

Diretór estabelesimentu prizaun Becora, João Domingos esplika rekezitu atu hetan indultu mak primeiru kondenadu sira mai ho pena tinan ualu (8) mai karaik, segundu kumpre ona pena um tersu, signifika kumpre ona pena tinan rua ho balun, terseiru komportamentu ne’ebé di’ak durante iha prizaun no iha arrenpendimentu ba sira nia hahalok.

“Maski nune’e dalaruma pedidu mai hosi família no advogadu ne’ebé mak kadavés la haree ba um tersu de pena, tanba sira nia pedidu hato’o diretamente ba Prezidente Repúblika no ami elebora de’it, tanba ami labele halo impedimentu no PR de’it mak bele deside fo indultu,” João Domingos, hateten ba Hatutan.com, Kinta (25/11/21).

Daudaun ne’e totál dadur iha prizaun Becora hamutuk 925 kompostu hosi kondenadu 402 no prizaun preventiva 523.  

Advertisement

Nune’e mós estabelesimentu prizaun Gleno, Munisípiu Ermera submete ona lista dadur hamutuk 15 kompostu husi feto na’in 4 no mane 11 ne’ebé maioria kondena ho pena tinan ualu (8) mai kraik no komportamenté di’ak durante iha prizaun.

“Lista ami submete ona ba MJ iha fulan Outubru ho dadur hamutuk 15 no laiha eis Governante,” Diretór prizaun Gleno, Nito dos Santos, hateten.

Daudaun ne’e totál dadur iha prizaun Gleno hamutuk 99 kompostu husi feto 15 no mane 84.

Kona-bá estabelesimentu prizaun Suai iha tinan ida-ne’e labele submete lista dadur ne’ebé atu hetan indultu iha loron 28 Novembru, tanba la prienxe rekezitu ne’ebé iha, liu-liu dadur sira kondenadu ba pena prizaun tinan 8 ba leten.

Populasaun prizionál iha Estabelesimentu Prizionál Becora ho voluntáriu tulun maluk sira ne’ebé presija ran liu hosi oferese ran ba Departamentu Banco de Sangue iha HNGV, 30 Setembru 2021. Foto/dok.João Domingos.

“Ami la propoin dadur hosi prizaun Suai, tanba sira nia tipu kazu halai liu ba violasaun seksuál ho ninia pena tinan 10 ba leten. Tuir lei indultu, dadur ne’ebé atu hetan indultu tenki ba ho pena tinan 8 ba kraik no kumpri ona un tersu de pena. Tanba ne’e, lei indultu la fó dalan atu submete lista indultu ba Ministériu Justisa (MJ),” Diretór Prizaun Suai, Júlio Dias Ximenes hateten ba Hatutan.com via telefónika, Kinta (25/11/2021).

Daudaun ne’e iha estabelesimentu prizaun Suai, dadur hamutuk 110 kompostu hosi prizaun preventiva 39, kondenadu 71 ho krime ne’ebé a’as liu maka violasaun seksuál hamutuk na’in 78, omisídiu 32.

Advertisement

Antes ne’e, Ministru Justisa (MJ) Manuel Cárceres hateten lista indultu ba dadur sira haruka ona ba Gabinete Prezidente Repúblika (PR) Francisco Guterres Lú-Olo iha fulan Outubru, maske nia la lembra númeru hira.

Tuir lei indultu nu. 5/2016 kona-bá prosedimentu konsesaun indultu no komutasaun ba pena iha artigu 8 ko’alia kona-bá kondenadu sira iha direitu kada tinan iha loron bo’ot ba indultu, maibé prezidente mak iha kompeténsia atu fó.

Maibé artigu ne’e la fó fatin ba krime hanesan asosiasaun terorizmu, asosiasaun kriminoza, krime liga ho vida kontra vida ne’ebé pena másimu tinan 8 ba leten, maibe la taka dalan ba krime korrupsaun, pekulatu, tráfiku umanu, brankamentu kapitál, korrupsaun pasiva no krime seluk bainhira iha razaun umanu. 

Alende ne’e, kondenadu ne’ebé atu hetan indultu tenki kumpri ona un tersu de pena 1/3.

Tuir konstituisaun RDTL, artigu 85 hateten Prezidente-Repúblika de’it mak iha kompeténsia hala’o knaar hodi rona tuir Governu, atu fó perdaun ka hamenus kastigu.

Advertisement

Jornalista: Carmelita Isaac