Hatutan.com, (26 Novembru 2021), Díli—Hodi selebra loron proklamasaun independénsia ba da-46 (28 Novembru 1975-28 Novembru 2021), ONG Saúde ba Ema Hotu (SABEH) hala’o konsulta gratuita ba veteranu iha Munisípiu Baucau.

Konsulta gratuita  ne’e hanesan parte ida husi atividade NGO nian hodi lori asisténsia saúde hakbesik ba komunidade.

Diretór Ezekutivu SABEH, dr. Andrezinho Belo, fó tratamentu gratuita ba komunidade. Foto/SABEH

Responsavel tratamentu médiku SABEH, Efrem dos Santos Cárceres Alegria, esplika atividade konsulta gratuita ne’e kobre ona munisípiu no falta maka Rejiaun Administrativu Espesiál Oé-Cusse Ambeno (RAEOA).

“Atu selebra loron 28 Novembru, ami  halo atividade konsulta gratuita ba veteranu iha Baucau durante loron ida de’it, maske ami sidauk hetan dadus maibé normalmente bainhira iha pedidu husi komunidade ne’ebé iha área remotas ka ami identifika katak aldeia ne’e susar tebes atu asesu ba asisténsia saúde, entaun ami tun no halo tratamentu diretamente hodi lori kedas ho ai-moruk,” responsavel tratamentu médiku SABEH, Efrem dos Santos Cárceres Alegria, ba Hatutan.com via telefónika, Sesta (26/11/2021).

Asisténsia ne’ebé SABEH hala’o iha konsulta gratuita ne’e mak fó konsulta jerál ba komunidade, halo sensibilizasaun ba moras ne’ebé fasil atu da’et, liuliu promosaun kona-bá Covid-19 liu-liu vasina.

Husi atividade konsulta gratuita ne’e, konsege kobre ona munisípiu 12, liu-liu iha área remotas ne’ebé difisil atu hetan asesu ba asisténsia saúde no daudaun ne’e alvu prinsipál husi konsulta gratuita ne’e maka hanesan Aldeia Fatukalu, Leswata iha Postu Administrativu Turiscai, Munisípiu Manufahi  no Aaldeia Ritahu, Postu Administrativu Laclo, Munisípiu Manatuto, ne’ebé sempre hetan tratamentu rutina husi SABEH, tanba sira identifika área remotas ne’ebé difisil profisionál saúde ba tanba la hetan asesu ba transporte hanesan karreta no motór.

Husi konsulta gratuita iha área remotas hahú iha fulan-Janeiru to’o Outubru 2021, SABEH konsege rejista ona ema hamutuk 10.424, ne’ebé maioria ho moras pulmaun, mear, inus-ben, iis-boot, moras kulit, isin-katar, isin-kolen no kanotak-moras.

NGO SABEH ne’ebé eziste iha  2019 hetan apoiu ai-moruk husi SAMES uainhira hato’o pedidu, maibé dalaruma NGO ne’e buka rasik fundus hodi sosa ai-moruk bainhira ai-moruk iha SAMES laiha.

Alende ne’e, hetan mós apoiu husi Palásiu Prezidente Republika  hodi ba halo tratamentu iha munisípiu, liu-liu iha área remotas.

Difikuldade ne’ebé NGO ne’e enfrenta mak hanesan menus ai-moruk husi SAMES, tanba uainhira hasoru moras króniku iha baze la bele responde diretamente tanba ai-moruk laiha no menus transporte.

NGO ne’ebé harii ho funsionariu 60-resin ne’e hala’o servisu ho gratuita hodi fó asisténsia ba komunidade ne’ebé hela iha area remotas ne’e, ho nia planu ba tinan 2022 hodi kontínua fó tratamentu ba komunidade ne’ebé hela iha área remotas, liu-liu ba aldeia ne’ebé seidauk hetan asisténsia husi SABEH.

Jornalista: Carmelita Isaac