Hatutan.com, (02 Dezembru 2021), Díli—Hafoin Governu deside loke pontu entrada fronteira terrestre ba vizitante sira atu tama no sai hosi territóriu nasionál iha kada semana, loron rua; Segunda ho Kuarta, maka iha Kuarta   (01/12/2021), abitante sira tama ona mai Timor-Leste liuhosi pontu entrada Batugade, Postu Administrativu Balibo, Munisípiu Bobonaro.

Notísia iha Relasaun: Governu Loke Fronteira iha Segunda no Kuarta

Abitante sira tama mai teritoriu TL liuhusi fronteira Batugade, Bobonaro, Kuarta (01/12/2021). Foto/Hatutan.com

Dadus ne’ebé Hatutan.com asesu  hatudu katak, iha inísiu desizaun Governu nian loke fronteira terrestre ne’e, iha abitante na’in-80 maka tama ona mai territóriu nasionál liuhosi Batugade.

Abitante hirak-ne’e kompostu hosi ema estranjeiru na’in-60 no Timoroan na’in-20 ne’ebé mai hosi territóriu Indonézia.

Bainhira abitante sira-ne’e hakur-tama mai área jurizdisaun Timor-Leste nian iha Batugade tenke submete  ba  teste temperatura ka PCR nu’udar métodu konsulta médiku atu idéntika ema ho COVID-19.

Iha entrada fronteira Batugade  abitante sira tama-mai ne’e hatudu sira-nia dokumentu komprovativu, hanesan pasaporte, inklui kartaun vasina kontra Covid-19 ne’ebé maioria  simu hotu ona vasina kompletu ka vasina dala-rua.  

Diretór Jerál Servisu Migrasaun, Superintendente Asistente Polísia, Luis Barreto ba Hatutan.com, iha nia servisu fatin, Vila Verde, Díli,  Kinta (02/12/2021), informa katak, abitante Timoroan na’in-20 ne’e hetan vistu entrada no sidadaun estranjeiru na’in-60 ne’e tama hosi vistu traballu.  

Governu liuhosi Ministériu Interiór (MI) foti ona desizaun hodi loke hikas postu integradu Fronteira Terrestre entre Timor-Leste ho Repúblika Indonézia (RI), hanesan Batugade, Bobonaro, Salele, Covalima no Sakato Relijiaun Administrativa Espesiál Oé-Cusse Ambeno (RAEOA), dala rua kada semana iha Kuarta no Sesta.

Desizaun Governu nian ne’e, bazeia ba dekretu lei númeru 26/2021 iha artigu 18 ne’ebé públika iha Jornál Repúblika iha loron 26 fulan-Novembru 2021, kona-bá funsionamentu postu fronteira terrestre Batugade, Salele no Sakato.

Jornalista: Rogério Cárceres