Hatutan.com, (24 Marsu 2022), Díli—Polisia Nasionál Timor-Leste (PNTL), liuhosi Unidade Patrullamentu Fronteitra (UPF), iha Sábadu, 19 Marsu 2022, halo detensaun ba sidadaun Indonézia hamutuk na’in-neen, ne’ebé tama ilegál mai territóriu Timor-Leste, liuhosi área Tunu-Bibi, Maliana.

Komandante UPF, Superintendente Euclides Belo, foto hamutuk ho membru promovidu sira ba Ajente Prinsipál. Foto/Dok.PNTL.

“Iha eleisaun nia laran, ita identifika sidadaun na’in-neen ne’ebé ilegál, no ita kaptura iha área Maliana, Tunu-bibi, tun mai to’o Mota-ain,” Komandante UPF, Superintendente Polisia, Euclides da Costa Belo hateten ba jornalista sira, hafoin partisipa iha atividade dada-tali entre membru sira, hodi komemora aniversáriu PNTL ba dala-22, iha Centro Formação Policia (CFP), Akademia Comoro, Kinta (24/03/2022).

Notisia iha Relasau:UPM Detein Sidadaun Indonézia Ida Peska Ilegál iha Palaka

Superintendente Polisia, Euclides da Costa Belo hateten, tuir informasaun ne’ebé UPF rekolla hosi sidadaun sira ne’e katak, sira hakat mai TL tanba nesidade família ligadu ho asuntu kulturál nian, ne’ebé familia atu hala’o iha Bobonaro.

Advertisement

Objetivu tanba kestaun familia, kestaun emerjénsia, balun tanba lia-mate, lia-moris, liu-liu ema mate ne’e sempre iha kontaktu.

Hafoin kapturasaun, parte autoridade seguransa no imigrasaun entre Timor-Leste no Repúblika Indonézia (RI) nian, sira halo kedan komunikasaun ba malu, atu bele foti medida ruma tuir prosedimentu legál ne’ebé mak hakerek iha lei imigrasaun.

Atividade Negósiu Ilegál Menus

Komandante UPF, Superintendente Polisia, Euclides da Costa Belo.

Komandante Euclides Belo informa tán daudaun ne’e, movimentu hosi sidadaun sira ne’ebé baibain halo atividade negósiu ho ilegál iha liña fronteira sira, hahú menus, tanba durante ne’e UPF servisu hamutuk ho parte autoridade munisipál, lokál no komunitáriu sira, halo bebeik sosializasaun ba komunidade.

Maske númeru kona-bá negósiu ilegál hahú menus, maibé UPF sei kontinua koopera ho autoridade sira no liu-liu parte hotu-hotu mak besik iha liña fronteira sira, hodi sosializa nafatin informasaun ba komunidade sira, nune’e bele evita movimentu ilegál hosi sidadaun sira bá mai nasaun rua.

Odamatan Fronteira Terrestre Loke Hikas

Advertisement

Dadaun ne’e, fronteira sira TL nian ho Indonézia hahú loke ho nomál fali ona ba públiku hodi bele ba mai nasaun rua tuir nesesidade.

Desizaun ne’e, liuhosi sirkulár ne’ebé hasai hosi ekipa Ministériu Saúde (MS) nian mak iha responsábilidade ba pilár kuatru, ne’ebé mak bele autoriza ema hodi ba mai TL Indonézia. Maske nune’e, iha pontu rua importante mak mak sidadaun sira presija obedese ka halo tuir.

Primeiru, sidadaun sira bele tama ka sai Timor-Leste, maibé tenke iha kartaun vasina ho mínimu vasina dala-rua ka dala-tolu.

Ba sira ne’ebé mak seidauk vasina, iha prosesu ketak ne’ebé mak parte saúde sei foti medida, liu-liu sidadaun estranjeiru sira ne’ebé mak tama TL.

Kuandu nia la vasina, sei iha mós teste PCR ba sira. Ida ne’e, tuir sirkulár sira ne’ebé maka fó sai hosi sira ne’ebé maki ha responsábilidade ba pilár kautru nian. Sirkular ida ne’e, vale ba pontu entrada hotu ne’ebé iha liña fronteira.

Advertisement

UPF nu’udár seguransa ne’ebé fó apoiu seguransa iha lutu fronteira rai-maran TL nian, husu ba ema hotu-hotu ne’ebé mak halo movimentu tama-sai, tenke kumpri regra sira ne’ebé direasaun kompetente sira hasai, hodi bele hatudu katak, ema hotu kumprimenta regra no lei sira mak estabelese ona.

Tuir oráriu, odamatan fronteira terrestre entre nasaun rua ne’e, hahú loke iha tuku 09:00 dadeer, to’o 17:00 lorokraik, hodi fasilita sirkulasaun movimentu ema la’o ain no transporte, ema ho sasán, bele entrada no saida.

Kona-bá seguransa ba eleisaun Segunda Volta, komandante Euclides Belo afirma, UPF sempre prontu atu hala’o misaun prinsipál sira tuir lei, hodi garante pás ho estabilidade, hamutuk ho komandu PNTL Munisipiu Bobonaro, Covalima (Suia), ho Rejiaun Administrativa Espesial Oecusse Ambeno (RAEOA).

Jornalista: Rogério Pereira Cárceres

Advertisement