Hatutan.com, (21 Novembru 2021), Díli—Karketu Dili FC kontinua rekolla vitória iha jogu kontinuasaun Liga Futeból Timor Leste (LFTL), kontra adversáriu Assalam FC ho skore 1:0.

Jogu entre Karketu Dili FC kontra Assalam FC. Foto/LFTL.

Vitória ne’ebé Karketu Dili FC hetan liu hosi golu úniku ne’ebé oferese hosi jogadór estranjeiru  Patrick da Silva.

Notísia iha Relasaun:AD SLB Laulara FC Domina Jogu Maibé Falla iha Produsaun Golu

Ho pontu tolu ne’ebé  iha hametin liután esperansa ekipa ‘Matak Malirin’  hodi realiza mehi sai kampiaun LFTL époka ne’e.  

Vitória kontra Assalam FC ne’e mós halo Karketu Dili FC nafatin tur iha primeiru lugar provizóriu tabela klasifikasaun ho pontus 6 no pozitivu bola 2, enkuantu Assalam FC obrigadu tenke nafatin tur iha zona mean maske provizóriu de’it tanba sei iha oportunidade enfrenta tan jogu haat iha liga époka ne’e.

Ekipa Karketu Dili FC ho Assalam FC hahú jogu ho ritmu as tanba halo kedan kontra atake ba malu iha minutu sira dahuluk.

Assalam FC hetan oportunidade dala haat tutuir malu liu hosi bola kantu maibé sei falla iha ezekusaun.

Karketu Dili FC responde liu hosi kontra atake maibé seidauk haatudu rezultadu. Ekipa rua nia jogu sei iha balansu no kada ekipa sei mantein nia ritmu hodi buka oportunidade atu hatama golu.

Avansadu Assalam FC Bonarudin Amin (17) liu hosi kolaborasaun ho Armando Varrela (12) sempre halo ameasa maibé defeza adversáriu sei antesipa ho di’ak.

Karketu Dili FC buka meius liu hosi nia avansadu estranjeiru Patrick da Silva (99) maibé sei falla. Gelvanio Alberto (10) lansa sutu makas hosi área grandeal oin maibé baliza sei salva.

Jogadór estranjeiru Karketu Dili FC Mickhel Eugene (88) simu kartaun mean hafoin halo falta  hasoru jogadór ekipa adversáriu.

Assalam FC nafatin halo atake ba Karketu Dili FC, nune’e mós ho Karketu Dili FC ne’ebé sempre buka meius atu halo uluk golu liu hosi oportunidade sira ne’ebé iha maibé nafatin falla.

Mósu insidente entre baliza Assalam FC Wahyu Pratama (20) no jogadór Avansadu Gaudencio Monteiro (14) hosi Karketu Dili FC obrigadu tenke simu kartaun kinur.

Karketu Dili FC liu hosi médiu Boaten Appiah (7) sempre lakon bola no ekipa adversáriu aproveita oportunidade ne’e maibé seidauk másimu tanba liña kotuk Karketu Dili FC ne’ebé komandu hosi kapitaun Domingos Ramos (5) sei bele antesipa ho di’ak hodi asegura ekipa hosi risku nia laran.

Tama ba tempu adisionál jogadór Assalam FC Bonarudin Amin (17) simu kartaun kinur hafoin halo falta hasoru jogadór Karketu Dili FC Boaten Appiah (7) iha liña klara. To’o primera parte remata ekipa rua laiha ida mak manan nune’e obrigadu tenke fahe pontus.

Tama ba segunda parte, Assalam FC hola kedan substituisaun iha liña kotuk hodi hasai Adão Doutel (18) no hatama Sandro Quintão (88) iha minutu 46.

Karketu Dili FC mantein ho nia jogadór no hadi’a tátika oinsa bele aproveita oportunidade sira ne’ebé iha hodi halo golu.

Tabela klasifikasaun provizóriu LFTL.

Tama ba minutu  51, Karketu Dili FC lidera uluk ho golu ne’ebé Patrick da Silva (99) hatama ho ulun hafoin simu asisténsia hosi Gelvanio Alberto (10).

Hafoin golu ne’e, Karketu Dili FC no Assalam FC hasa’e liután sira nia tensaun jogu hodi halo atake ba malu.

Assalam FC kontinua halo substituisaun ba nia jogadór hodi hasai Emanuel Tunu (20) no hatama Andrew Budiono (15) iha minutu 54.

Hafoin substituisaun ne’e Assalam FC hetan oportunidade osan mean iha minutu 65 liu hosi avansadu Sebastião  dos Santos (55) ne’ebé mesak ho baliza maibé falla halo golu.

Haree ba failansu ne’ebé iha treinadór Adu Marques hola inisiativa hodi halo kedan substituisaun ba Sebastião Santos (55) no hatama Martinho Belo (22) iha minutu 66.

Liu hosi substituisaun ne’e Assalam FC lansa atake barak ba adversáriu Karketu Dili FC, maibé nafatin falla tanba la konsege ezekuta oportunidade sira ne’e ba golu.

Karketu Dili FC hadi’a meiu kampu hodi hatama  António Provirio (23) no hasai Gaudéncio Monteiro (14) iha minutu 67.

Liu de’it minutu ida, Assalam FC kontinua halo substituisaun hodi hasai Bonarudin Amin (17) no hatama Augosto da Costa (29).

Assalam FC kontinua lansa atake ba nia adversáriu liu hosi avansadu Martinho Belo (22) no Augosto da Costa (29), maibé bola ne’ebé sira suta sei dook hosi tarjetu.

Assalam FC kontinua halo esforsu hodi halo substituisaun ba liña médiu hodi hasai Armando Varela (12) no hatama Júlio Amaral (23) iha minutu 74.

Ho estratejia no tátika ne’ebé iha Assalam FC kontinua halo atake ba nia adversáriu, maibé sorte laiha tanba sei nafatin falla atu ezekuta oportunidade sira ne’e ba golu.

Karketu Dili FC buka atu asegura ameasa ne’ebé Assalam lansa hodi halo substituisaun ba jogadór iha parte liña klaran iha minutu 82 hodi hasai Mickhel Eugene (88) no hatama Celso Escurial (15).

Substituisaun ne’e halo ho intensaun bele hetan efetividade no kombinasaun ida di’ak hodi asegura pontu tolu ne’ebé iha.

Tama ba minutu 88 Karketu Dili FC kontinua halo substituisaun hodi hasai Gelvanio Alberto (10) no hatama  Silvestre Gama (21).

Maske Karketu Dili FC lidera iha tabela klasifikasaun maibé Assalam FC kontinua lansa ameasa no atake maibé Karketu Dili FC kontinua hamate Assalam nia jogu hodi asegura Vitória no tama ba minutu 90 Karketu Dili FC kontinua halo substituisaun hodi hasai Norberto Gonsalves (13) no hatama António Martins (2).

To’o tempu termina, Karketu Dili FC mantein nia superioridade hodi konkista Vitória ho skore 1:0.

Treinadór Assalam FC Adu Marques hafoin golu hateten Assalam FC iha oportunidade atu prodús golu 5 iha jogu ne’e, maibé falla tanba jogadór avansadu sira la konsege atu ezekuta bola ho di’ak.

Failansu seluk ne’ebé Assalam FC hasoru iha jogu ne’e mak jogadór sira la halo balansu ba jogu hosi jogadór adversáriu.

Iha parte seluk, Eliseu Isaac Sekretáriu Jerál Karketu Dili FC sente orgullu ho Vitória ne’e no sei hadi’a tátika atu bele iha kombinasaun ida di’ak entre jogadór estranjeiru foun rua hanesan  Patrick da Silva no Mickhel Eugene, nune’e sira bele oferese potensialdade hotu hodi bele oferese Vitória no lori Karketu Dili FC ba kampiaun tuir promesa ne’ebé iha.

Iha parte seluk, jerente klube Matak Malirin ne’e lamenta ho dedizaun arbitu nian tanba la fair no kosidera tau Karketu Dili FC iha risku.

Jornalista: Vito Salvadór