Hatutan.com, (04 Dezembru 2021), Dili—Espoza Prezidente Repúblika (PR) Cidália Nobre Guterres, liu hosi nia Gabinete Apoiu Atividade Konjúje,  hamutuk ho Komisaun Sadia simu ona apoiu hosi organizasaun oinoin, hanesan ConocoPhilips ka Santos, Rotary Club no organizasaun seluktán, hodi hala’o programa sosiál, edukasaun, saúde no dezenvolvementu komunitária, desde tinan 2017 to’o 2021.

Timoroan sira ne’ebé partisipa iha atividade halai taru no la’o ain hosi Praça Proclamação to’o iha Metiaut. Foto/Média PR.

Tanba ne’e, Cidália Nobre Guterres  agradese tebes ba suporta hirak ne’e hodi hala’o programa haat hanesan apoiu komunidade ne’ebé afeta ba inundasaun, inséndiu, orfonatu no ba alin sira ne’ebé mak iha uma-mahon iha Dili no munisípiu seluk.

Alende ne’e apoia mós ba inan-aman ne’ebé mak kbiit natón hodi hadi’a sira nia-uma, nune’e satan netik udan no loron-manas.

Gabinete ida ne’e nai programa tempu naruk mak hanesan edukasaun, tanba ne’e Cidália Nobre Guterres  hato’o mensajén ba labarik feto sira atu pelumenus akaba nono anu eskolaridade.

Advertisement

“Maibé, durante ne’e alin feto sira iha lubuk ida mak para sira nia estudu iha dalan klaran ho razaun tanba isin-rua sedu, kazu insestu. Ho ida-ne’e mak gabinete hamutuk ho Komisaun SADIA ho parseiru identifika alin-feto sira, re-intrega ba eskola no sira-nia valór di’ak tebetebes, ida-ne’e hatudu katak, labarik feto sira hakarak eskola,” Cidália Nobre Guterres, hateten liu hosi komunikadu.

Espoza PR ho timoroan sira ne’ebé partisipa iha atividade halai taru no la’o ain hosi Praça Proclamação to’o iha Metiaut. Foto/Média PR.

Alende ne’e, programa saúde ne’ebé durante mandatu hala’o mak hanesan, hamutuk médiku sira no Fundasaun Alola fó konsulta ba pasiente sira, halo deziminasaun informasaun ba inan-feto sira no juventude feto sira, oinsá prevene-an hosi moras kankru-mama no kankru serviks.

Programa tuir-mai, dezenvolvimentu komunitáriu liuliu apoia negosiante kiik sira iha parte luron-ninin no tasi-ibun, apoiu finanseiru no suporta hasa’e sira nia koñesimentu, nune’e sira iha kbiit hodi jere sira nia negósiu ho di’ak.

“Ho ha’u nia-naran rasik, agradese wa’in ba Rotary, Santos nomós maluk sira hotu ha’u labele temi ida por ida liu hosi hola ticket hodi hala’i eventu durante tinan-lima, hodi suporta ona Gabinete Apoiu Atividade Conjúje Prezidente Repúblika,” espoza Prezidente hato’o.

Responsável empreza Santos, José Lobato agradese ba parseiru sira tomak hanesan Timor Plaza, East Timor Trading, embaixada Austrália no embaixada Japaun no banda Cinco de Oriente.

Maluk defisiente sira ne’ebé partisipa iha atividade halai taru no la’o ain hosi Praça Proclamação to’o iha Metiaut. Foto/Média PR.

José Lobato agradese ba servisu hamutuk ne’ebé la’o tiha ona, maske espoza Prezidente Repúblika, fó sai ona katak tinan 2021 nu’udár tinan ikus liu, maski mensájen ne’e fó-sai ona iha tinan-2020.

“Ha’u nia liafuan mak ne’e, iha tinan kotuk (2020) mana Cidália dehan tinan kotuk ne’e tinan ikus liu. Hin ha’u rona dehan tinan ida ne’e ikus liu. maibé ha’u hanoin, ne’e Depende, depende iha votus oinsá,” nia hateten.

Advertisement

Partisipa iha eventu First Lady Cup edisaun-17 tinan 2021 mak hanesan, East Timor Trading Invest, reprezentante embaixada Estadu Unidus Amérika, Embaixada Austrália, Embaixada Japaun, timoroan sira ho fiziku defisiente, atleta timoroan, partisipa iha atividade halai taru no la’o ain hosi Praça Proclamação to’o iha Metiaut.

Ba edisaun-17 família boot hosi East Timor Trading Invest mak sai kampiaun, tanba ho númeru partisipasaun máximu, desde edisaun-4 ona iha tempu espoza Cidália Nobre Guterres.

Jornalista: Rogério Pereira Cárceres

Advertisement