Hatutan.com, (08 Dezembru 2021), Díli—Ekipa Selesaun Nasionál Timor-Leste (TL) obrigadu tenke simu tán derrota ba da-ruak nian iha jogu AFF Suzuki Cup 2020, hafoin lakon 2-0 kontra nasaun Myanmar iha jogu daruak ne’ebé hala’o iha Singapura, Kuarta (08/12/2021).

Ekipa TL kontra ekipa Myanmar iha AFF Cup. Foto/AFF.

Timor-Leste iha progressu di’ak iha ball possession, tanba iha jogu antes hasoru Thailándia, Timor-Leste rekolla de’it  24,7%, enkuantu iha jogu kontra Myanmar ball possession Timor-Leste nian iha 47,2% hatudu laiha diferensa dook hosi ekipa adversáriu ne’ebé rekolla ball possession 52,8%.

Notísia iha Relasaun:Thailándia Rekoñese Difísil Kontra Ekipa TL iha Jogu Apuramentu AFF Cup

Timor-Leste nia falla iha liña komunikasaun tanba jogadór sira ladún iha liña koordenasaun ne’ebé di’ak ikus mai adversáriu aproveita hodi halo golu.

Baliza ekipa nasionál Timor-Leste Junildo Pereira (12) hatudu performnce di’ak hodi salva bola golu hosi Myanmar, kauza hosi liña defeza ne’ebé falla asegura adversáriu nia atake tanba lakon ona liña komunikasaun desde jogu hahú.

Treinadór Timor-Leste Fábio Maciel halo rotasaun ba jogadór hodi hatún João Pedro (10) iha plantel no husik Rofino Gama (7) ba iha liña suplente.

Ekipa nasionál Timor-Leste lakon jogu iha liña klaran no husik adversáriu sira halo jogu hodi lansa atake.

Tama ba minutu 13 ekipa Myanmar hahú halo atake efetivamente ba iha área defeza Timor-Leste liu hosi avansadu direta ne’ebé obriga defeza esquerda Timor-Leste Yohanes Gusmão (24) no Filomeno Junior (18), tenke halo esforsu extra atu asegura, maibé tanba laiha liña koordenasaun, nune’e Nelson Viegas (22) sala antesipa bola ulun ikus-mai monu loos ba avansadu Than Paing (9) no aproveita halo golu liu hosi bola ulun hodi muda skore ba 1-0 iha minutu 14.

Hafoin golu ne’e, Timor-Leste kontinua halo esforsu atu bele duni atrazu ne’ebé iha ho intensaun bele halo impata atu ikus mai bele rekolla vitória.

Ekipa TL kontra ekipa Myanmar iha AFF Cup. Foto/AFF.

Ekipa Myanmar nafatin domina jogu liu hosi pasajen bola ain iha liña klaran no kontinua mantein sira nia ritmu liu hosi kombinasaun di’ak iha kada liña hodi nafatin lansa atake ba Timor-Leste.

Guarda rede Timor-Leste Junildo Pereira (12) kontinua hatudu nia kualidade nu’udár guarda rede nasionál hodi asegura nia baliza hosi atake ne’ebé iha.

Timor-Leste kontinua sofre iha liña klaran, tanba jogadór sira kuaze lakon kontrolu ba bola no ikus mai ekipa adversáriu kontinua domina no fó presaun liu hosi atake sira ne’ebé iha.

Maske falla iha liña klaran, maibé Timor-Leste nafatin halo esforsu hotu atu mantein asegura pontus hodi duni atrazu ne’ebé iha.

To’o primeira parte remata, ekipa rua la muda skore iha tabela, nune’e Myanmar ukun provizóriu ho 1-0.

Tama ba segunda parte, ekipa ekipa rua kontinua mantein nia ritmu jogu no Timor-Leste nafatin halo esforsu atu sai hosi presaun hodi halo impata ba jogu maibé nafatin falla.

Timor-Leste esforsu an atu halo jogu hodi buka oportunidade maibé ekipa adversáriu la fó biban atu Timor Leste lansa atake ba sira nia baliza.

Timor-Leste susar atu tama ba área grandeal Myanmar nian no situasaun ne’e obriga Timor-Leste tenke halo de’it jogu iha liña klaran hodi buka ha lo kontra atake liu hosi avansadu úniku Mouzinho Barreto (11).

Tama ba minutu 50, Myanmar aumenta tán golu ida liu hosi kapitaun Maung Maung Lwin (11) ne’ebé simu asisténsia hosi  Heing Htet Aung (30) hosi liña klaran, hodi muda skore ba 2-0.

Hafoin golu ne’e, Timor-Leste kontinua sofre iha tátika jogu nune’e la konsege responde golu ruma hodi muda skore ba iha tabela.

Timor-Leste hetan oportunidade liu hosi jogadór estrela na’in-rua João Pedro (10) no Mouzinho Barreto (11), maibé falla iha komunikasaun nune’e la konsege prodús golu ba ekipa nasionál.

Tama ba minutu sira ikus Timor-Leste nafatin falla, nune’e ekipa Lafaek obrigadu tenke simu derrota hodi kontinua mantein iha zona okos klasifikasaun grupu A ho pontu 0 tanba sofre derrota dala rua tutuir-malu.

Tuir relatóriu AFF nian, durante jogu entre ekipa Timor-Leste no Myanmar, Timor-Leste prodús de’it Shots on target 3 no 2 mak iha poténsia atu golu, enkuantu adversáriu prodús shots on target 18 no hosi ne’e 2 mak golu no iha haat seluk ne’ebé baliza Junildo Pereira (12) salva direta.

Jornalista: Vito Salvadór