Hatutan.com (07 Dezembru 2021), Dili—Federasaun Motor Siklizmu Timor-Leste (FMC), realiza eventu nasionál Dili Drag Bike, hodi komemora loron proklamasaun Unilaterál Independénsia Timor Leste nian ba dala 46.

Federasaun Motor Siklizmu Timor-Leste (FMC), realiza eventu nasionál Dili Drag Bike, hodi komemora loron proklamasaun Unilaterál Independénsia Timor Leste nian ba dala 46. Foto/Hatutan.com.

Maski okupa de’it estrada públiku nu’udár arena ba kompetisaun, maibé populasaun barak hatudu entuziasmu hodi fó apoiu ba sira nia ekipa no joki favoritu.

Eventu nasionál ne’e hetan partisipasaun máximu husi Joki nasionál sira hodi harame eventu anuál ne’e, atu bele hetan fini talentu Joki  nasionál ne’ebé iha kualidade nune’e bele partisipa iha eventu nasionál no internasionál bainhira Timor Leste hetan konvite.

Eventu nasionál ne’e organiza hosi Speed Resing Team (SRT) ne’ebé antes ne’e koñesidu ho naran Santa Cruz Resing Team (SCRT).

Sekretariu Jerál FMC Eugénio Pereira hateten Hatutan.com iha Cristo Rei Dili katak, eventu ida-ne’e halo ho intensaun atu promove talentu foin sa’e sira nian, hodi evita konflitu no drag bike ilegál iha bairru sira ne’ebé sempre perturba komunidade.

“Ita iha hanoin hakarak promove talentu foin sa’e sira nian hodi evita desturbiu ne’ebé hamosu kauza husi Drag illegal, maibé problema ba ita mak seidauk iha fatin própriu ka arena. Ita presija arena ba treinu no mos ba realizasaun eventu sira hanesan agora daudaun ita halo ne’e,” Eugénio Pereira hateten iha Tersa (07/12/2021).

Sekretáriu Jerál ne’e hato’o ona preokupasaun ne’e ba parte Governu no konfederasaun Desportivas Timor Leste (CDTL sigla portugês) atu ba futuru bele tau hanoin hamutuk hodi haree oinsa bele dezenvolve modalidade drag ida di’ak liu no tuir padraun nasionál no di’ak liután tuir padraun internasionál.

“Ita atu uza arena ba eventu tenke hein autorizasaun hosi Governu liuliu PNTL hodi utiliza estrada públiku hanesan iha CNE nia oin no Cristo Rei no uluk liu ita utiliza estrada publiku iha parte tasi tolu,” nia hateten.

Ho kondisaun sira hanesan ne’e, Eugénio Pereira  hein katak, Governu sei haree no tau iha konsiderasaun.

Federasaun Motor Siklizmu Timor-Leste (FMC), realiza eventu nasionál Dili Drag Bike, hodi komemora loron proklamasaun Unilaterál Independénsia Timor Leste nian ba dala 46. Foto/Hatutan.com.

Iha fatin hanesan, Jestór King Mauputar Resing Team (KMRT)  Luis Adriano hateten, ekipa jestór iha komitmentu atu lori foinsae sira liuliu joki sira ne’ebé KMRT iha atu bele promove no kadi sira nia talentu hodi sai atleta di’ak ba nasaun.

“Ami apresia ba saida mak komisaun halo hodi realiza eventu ida ne’e.  Ami sei tau as esportivitas no joki sira sei kompete ho disiplina hodi rekolla vitória,” Luis Adriano hateten ba Hatutan.com.

KMRT  prontu kompete ho motor sira ne’ebé mai hosi nasaun liur atu hatudu katak iha Timor mós team sira preparadu ba eventu drag ne’e rasik.

Eventu Drag Bike 2021 ne’e partisipa hosi team hamutuk sanulu resin no ho joki kuaze 40 no motor sira ne’ebé joki Timor oan sira utiliza ba eventu ne’e mai mos husi nasaun Thailandia no Indonéziu hamutuk 8.

Klase sira ne’ebé Joki sira kompete hamutuk 12 mak hanesan klase FFA 2 tak 200 cc, FFA 4 tak 200 cc, Super FFA 350 cc, Sport 2 tak tune up 155 cc, Campuran 2 tak tune up 145 cc, 2 tak tune up 140 cc ba deit rx king no espesial, 2 tak standard ba rx king no espesial, campuran 4 tak tune up 155 cc, khusus 2 tak 155 cc frame estandard, campuran 150 cc estandard khusus FU no Sonic, campuran 4 tak estandard 115 cc no ikus liu ba Matic estandard (non karburator).

Osan ba realiza atividade ne’e mai hosi Governu liu hosi Sekretáriu Estadu no Desportu (SEJD) ho montante $5.000.

Montante ne’e sira fahe ba realizasaun atividade rua mak hanesan kampeonatu nasionál motor cros iha Lospalos no  $2.000 resin uza ba realiza eventu drag no finansia mós hosi patrosiniadór sira hanesan pertamina Internasionál, shell no dellos inklui individu balun ne’ebé komisaun organizadora la temi naran.

Jornalista: Vito Salvadór