Hatutan.com, (09 Dezembru 2021), Díli-Komisaun Anti-Korrupsaun (CAC, sigla Portugés) to’o agora seidauk hetan delegasaun kompeténsia husi Ministériu Públiku (MP) hodi halo investigasaun ba kazu ró Haksolok, maske situasaun ne’e sai preokupasaun ema hotu nian.

Notísia iha Relasaun: Arsénio Promete tán Sei Finaliza Konstrusaun Ró Haksolok Uza Millaun $14  

Prezidente Autoridade RAEOA Mari Alkatiri, tempu ne’ebá akompaña hosi Bispu Eméritu Dom Carlos Filipe Ximenes Belo, SDB ho Madre Guilhermina Marçal FdCC, hala’o lansamentu ba ró Haksolok iha Portugál, Sesta (26/05/2017). Foto/ISQ.

“Ba kazu ró Haksolok ami seidauk hetan delegasaun kompeténsia hodi halo investigasaun, maibé notísia ida-ne’e espalla no dezenvolve daudaun ona no ema hotu iha preokupasaun, maibé labele halo liu buat balun ne’ebé karik sei kait hela iha Tribunál Kontas nia kompeténsia, tanba ne’e relasiona ho aktu no jestaun publika Estadu nian,” Komisáriu CAC, Sergio Hornai, haktuir hodi responde Hatutan.com iha ambitu komemorasaun loron mundiál anti-korrupsaun iha Salaun Komisaun Nasionál ba Eleisaun (CNE), Díli, Kinta (09/12/2021).

Sergio Hornai informa, CAC hetan ona delegasaun kompeténsia ba kazu hamutuk 70-resin husi Ministériu Públiku  (MP) ne’ebé CAC halo ona inkéritu no delega ona submisaun ba MP atu promove ka  arkivamentu depende ba kompeténsia MP.

Advertisement

Iha mós prosesu kriminal hamutuk 69 mai husi inisiativa CAC hodi halo investigasaun no daudaun ne’e prosesu lao hela hodi  deskobre faktu no provas ne’ebé sai hanesan notísia ba krime.

Atu prienxe rejistu krime ka lae, Sergio Hornai esplika,  haree ba aspetu rua maka hanesan objetividade no legalidade.  Katak,  se prienxe no reúne rekizitu hirak ne’e maka CAC sei promove partisipasaun ba MP hodi halo validasaun.

Diretór Ezekutivu  Forum ONG Timor-Leste (FONGTIL), Daniel dos Santos, konsidera Prokudór Jerál Repúblika  iha konflitu  interese liga ho kazu ró Haksolok, tanba ema barak kestiona kona-bá kazu ró Haksolok, maibé PJR la sente hanesan problema ne’ebé to’o agora seidauk halo prosesu ruma no seidauk delega kompeténsia ba CAC atu bele halo investigasaun.

To’o notísia ne’e publika seidauk hetan konfirmasaun hosi parte Prokuradór Jerál Repúblika (PGR, sigla Portugés). 

Serbisu CAC Seidauk Másimu iha Prevensaun

Advertisement

FONGTIL konsidera serbisu Komisaun Anti-Korrupsaun (CAC, sigla portugés) iha asaun prevensaun korrupsaun seidauk másimu atu oinsá fó efeitu ba ema nia hahalok atu kontribui luta kontra korrupsaun.

“Hakarak pronunsia pontu importante tolu; primeiru kona-bá serbisu CAC durante ne’e, prosesu sosa ró haksolok ne’ebé to’o agora PJR seidauk delega kompeténsia ba CAC hodi loke investigasaun kona-bá motivu tansá ró ne’e la mai, segundu Estadu tau osan kada tinan $1.3 milloens ba CAC halo servisu kombate korrupsaun, maibé atendimentu no rezultadu serbisu sei sai preokupasaun, tanba sosiedade kontinua konsidera CAC laiha nehan, no terseiru CAC nia serbisu iha área prevensaun seidauk masímu tanba sidauk iha mudansa ba sistema Estadu, lei,  funsionamentu estadu, mudansa atitude husi servidór públiku ba salva rekursu Estadu,” Daniel dos Santos, hateten.

Iha komemorasaun loron mundiál anti-korrupsaun, ne’ebé kada tinan selebra iha loron 09 fulan-Dezembru, FONGTIL prefere atu halo reflesaun ba Estadu kona-bá esforsu ne’ebé halo ona iha Timor-Leste hodi prevene no kombate korrupsaun.

FONGTIL husu ba CAC atu bele halo esforsu liután iha área serbisu prevensaun hodi asegura boa Governasaun.

Hatán ba kestaun ne’e, Komisáriu CAC, Sergio Hornai, agradese no rekoñese katak servibu hotu laiha ida maka perfeitu no tenke iha kritika atu bele hadi’a di’ak liután iha futuru.

Advertisement

“Ha’u hanoin serbisu ida laiha ida perfeitu tanba iha dezafiu no konstranzamentu iha konsolidasaun dezenvolvimentu konstitusionál ne’ebé presiza haree husi parte oi-oin, maibé tenke iha kritika atu bele hadi’a, tanba ne’e, tau iha ita-nia konviksaun própriu hodi haree no luta kontra korrupsaun,” Sergio Hornai hateten.

Jornalista: Carmelita Isaac