Hatutan.com, (07 Marsu 2023), Díli-Comissão Anti Corrupção (CAC) rekolla nafatin dadus relevante sira kona-bá keixa hosi Fórum Organizasaun Naun Governamentál Timor-Leste (FONGTIL) hasoru membru Governu na’in-hitu (7) ho delegasaun hamutuk 120 bá partisipa iha Expo Mundiál iha Dubai.

Lee Mós : CAC Analiza Hela Keixa FONGTIL Hasoru Membru Governu Na’in-Hitu ba Expo Dubai

Delegasaun Timor-Leste ho Uniaun Emiradu Árabe iha foto hamutuk pavillaun Expo Dubai 2020 iha selebrasaun loron nasionál Timor-Leste nian iha loron 18 Outubru 2021. Foto/Espesiál

Iha Kinta, 21 fulan-Outubru 2021,  Diretór Ezekutivu FONGTIL  (tempu ne’ebá), Daniel Santos do Carmo, hato’o keixa bá CAC iha Edifísiu, Faról-Dili, husu atu halo detensaun bá membru Governu na’in-hitu ne’ebé bá partisipa iha expo Dubai durante semana ida tanba hamosu prejuizu boot bá Estadu Timor Leste.

Diretór Investigasaun CAC, José Verdial hateten, relasiona ho keixa hotu ne’ebé  CAC rejista, depois halo averiguasaun no haree katak iha indisiu ruma ne’ebé maka natoon, CAC halo auto notísia depois partisipa bá iha Ministériu Públiku (MP) nu’udár na’in bá asaun penál.

Advertisement

“Nia prosesu la’o hela, prosesu averiguasaun nian la’o hela, CAC halibur dadaun hela informasaun. Tanba ita-boot sira hatene, informasaun sira ne’ebé mak natoon hatama mai ne’e, informasaun mamuk loos de’it,” Diretór Investigasaun CAC, José Verdial hateten bá jornalista sira iha Edifísiu CAC, Díli, Tersa (07/03/2023).

Keixa ne’ebé mak FONGTIL hatama bá CAC iha krime korrupsaun nian, informasaun sira ne’e mamuk loos de’it, tanba ne’e, CAC labele halo buat ida. Maske nune’e, CAC persiza halibur fila-fali informasaun adisionál sira, halibur provas dokumentál sira para depois, CAC haree bainhira iha indisius ida ne’ebé mak natoon, mak CAC foin bele halo auto bá iha Ministériu públiku.

Konteúdu hosi keixa ne’ebé FOGNTIL hatama bá CAC husu atu halo detensaun no kapturasaun bá memru Governu na’in-hitu (7) ho delegasaun na’in-120, la signifika atu lori kedan sira ba tribunál ka bá kadeia, maibé atu prosesa sira tuir padraun legál ne’ebé CAC iha no karik evidénsia sira ne’ebé FONGTIL hato’o mak prienxe duni rekezitu katak sira komete duni irregularidade ruma, kabe ba kompeténsia CAC nian.

Membru Governu na’in-hitu (7) ne’e, hanesan Ministru Koordenadór Asuntu Ekonómiku (MKAE), Joaquim Amaral, Ministru Transporte no Komunikasaun (MTK),  José Agostinho da Silva, Ministru Turizmu, Komérsiu no Indústria  (MTCI), José Lucas do Carmo da Silva, Ministru Petróleu no Minerais, Victor da Conceição Soares, Ministru Agrikultura no Peska, Pedro dos Reis, Vise-Ministru Turizmu, Komérsiu no Indústria, Domingos Lopes Antunes ho Vise-Ministru Negósiu Estranjeiru no Kooperasaun (MNEK), Julião da Silva.

Iha loron 21 fulan-Outubru 2021, Ministru Koordenadór Asuntu Ekonómiku (MAKE), Joaquim Amaral, ne’ebé xefia delegasaun membru Governu na’in-hitu (7) ho ema 120 ba Expo Dubai, deklara  katak,   Estadu no  kualkér membru Estadu prontu ba kualkér situasaun.

Advertisement

Lee Mós : Delegasaun Expo Dubai Prontu Koopera ho CAC kona-bá Keixa FONGTIL

Jornalista: Rogério Pereira Cárceres