Hatutan.com, (13 Dezembru 2021), Díli—Komisaun organizadora ba preparasaun simu sinza Saudozu Cristopher Wenner “Max Stahl” nian, hakarak Komandante em Xefe das Frente Armada Libertasaun Nasional Timor-Leste (FALINTIL), Kay Rala Xanana Gusmão ho Diplomata senior Timoroan, José Manuel Ramos Horta, mak simu direta hosi familia (feen-kaben) iha Aeroportu, Comoro.

Komisaun organizadora ba preparasaun simu sinza Saudozu Cristopher Wenner “Max Stahl”. Foto/Hatutan.com.

Tuir planu, iha Kuarta 15 Dezembru 2021, família liu-liu feen-kaben hosi Saudozu Max Stahl mak sei lori saudozu nia sinza mai Timor-Leste (TL).

Notísia iha Relasaun:Max Stahl Nia Mate, Hosi Prezidente Repúblika, Governu, Xanana ho Lere Hato’o Sentidu Lutu

Prezidente Komisaun organizadora, Silvério Pinto hateten, desizaun hakarak líder nasionál na’in-rua mak simu direta sinza Saudozu Max Stahl nian ne’e, tanba liga ho partisipasaun istórika saudozu nian iha tempu luta ba TL nia ukun-rasik an.

“Depois de ami enkontru, hosi reprezentante organizasaun ne’ebé mak hola parte iha komisaun organizadora, husu atu líder nasionál na’in-rua mak simu, tanba liga ho saudozu nia servisu iha momentu 12 Novembru, ” Silvério Pinto hateten ba jornalista-sira, liuhosi konferénsia imprensa, iha Centro Audiovisual Max Stahl, Benfica Díli, Segunda (13/12/2021).

Tuir komité ezekutivu, durante organiza asaun 12 Novembru 1991, saudozu Max Sathl, tempu ne’ebá iha hela Baucau hamutuk hela ho Komandante David Alex “Daitula”.

Maibé, Saudozu simu órden direta hosi Komandante da luta, Kay Rala Xanana Gusmão, katak atu fila mai Díli halo kobertura ba asaun 12 Novembru 1991, iha semitériu Santa Crúz.

Informasaun ida-ne’e, transmite hosi komité ezekutivu ba asaun 12 Novembru mak hanesan Constancio Pinto hamutuk ho Gregório Saldanha no Jacinto Alves, simu orientasaun hodi informa ba Saudozu Max Stahl, no iha 11 Novembru 1991, oras kalan, saudozu  dezloka hosi Baucau mai Dili.

Nune’e  iha 12 Novembru 1991, saudozu hala’o nia misaun hanesan jornalista hodi halo kobertura ba akontesimentu ne’e.

“Sira husu maun Xanana atu marka prezensa no komisaun organizadora prepara ona karta ida. Karta ne’e ita haruka tiha ona iha semana kotuk. Segundu maka, maun-boot José Ramos Horta, tanba tuir komité ezekutivu ho komité 12 Novembru katak, rezultadu hosi saudozu nia servisu halo kobertura hanesan jornalista, filme ne’ebé mak nia haruka ba liur ne’e mak maun José Ramos Horta hanesan Frente Diplomátiku organiza luta na’in-sira iha liur, uza filme ida-ne’e hanesan instrumentu ida atu halo kampaña iha liur,” Silvério, dehan.

Ho filmajen hosi saudozu Max Stahl nian, ikus-mai konsege loke mundu nia matan, no hetan mós ajuda hosi Organizasaun Nasaun Unidas (ONU), ne’ebé ajuda no fó suporta ona povu TL nia prosesu luta ba ukun-rasik an.

“Tanba ne’e mak komisaun organizadora husu líder másimu na’in-rua mak simu hosi família iha aeroportu, depois entrega ba Estadu,” Silvério Pinto, subliña.

Tuir ajenda, Primeiru Ministru sei la marka prezensa iha Aeroportu tanba ne’e líder na’in-rua sei entrega ba Ministru Prezidénsia Konsellu Ministru Fidelis Leite Magalhães reprezenta Governu.

Tuir planu, saudozu Max Stahl nia sinza familia sei lori hosi Austrália ho aviaun Qantas no sei to’o Timor-Leste, iha Kuarta, 15 dezembru 2021, tuku 11:45 otl.

Saudozu Max Stahl, nu’udár kompañeiru da luta ida ne’ebé dezde uluk dedika nia aan iha luta TL ninia ba ukun-rasik aan, iha 12 novembru 1991, nune’e Estadu TL hakarak atu dedika nia omenajen ba saudozu. 

Iha oráriu, Estadu sei fó omenajen tuir kultura Timor nian iha Centro Audiovisuál Max Stahl, Benfica Dili  no ikus iha 17 Dezembru, sei lori sinza ba misa Santa ne’ebé sei prezide hosi Arsebispu Arkedioseze Metropolitana Dili, no sei halo marsa ba semitériu Santa Crúz, hodi haloot nia sinza.

Horta mak sei tula Sinza

Komisaun organizadora koordena ona ho Eis Prezidente Repúblika, José Manuel Ramos Horta, katak, bainhira saudozu Max Sathl nia Sinza to’o iha aeroportu Comoro, sei transporta ho Horta nia kareta, lori ba iha Centro Audiovisuál Max Stahl, Benfica Díli.

Antes ne’e, liuhosi enkontru entre komisaun organizadora deside katak, bainhira saudozu nia Sinzas to’o iha aeroportu, sei tula iha kareta ambulansia Veteranu nian. Maske la mai ho saudozu nia isin, maibe estadu konsidera nafatin atu transporta iha aftin ida dignu.

“Maun-boot José Ramos Horta mós prontu ona atu uza nia karreta hodi tula saudozu ninia Sinza no Horta rasik mak sei kondús,” Silvério Pinto, haktuir.

Prezidente Komité 12 Novembru 1991, Gregório Saldanha, dehan, Saudozu Max Stahl, hanesan ema malae-mutin ida, maibé depois nia sai ema Timor. Tanba ninia hakarak, luta, brani, ho nia matenek tomak, la’ós de’it iha 12 Novembru, maibé depois akontesimentu 12 Novembru, saudozu hatudu nafatin nia luta hodi kontribui ba luta libertasaun pátria iha 30 Agostu 1999.

“Ha’u hakarak apela ba povu Timor-Leste tomak atu ita hotu, tenke fó apoiu, onra ho ita nia prezensa momentu ne’ebé ita atu translada ninia ahuk-desan, ba haloot iha Santa Cruz,” Gregório Saldanha, konvida.

Mate-restu 12 novembru 1991 ne’e, haktuir tán, razaun Xanana ho Horta mak ‘tenke’ simu direta saudozu nia sinzas ne’e, la’os ezijénsia hosi saudozu nia família, maibé parte komisaun organizadora rasik mak hakarak atu líder na’in-rua ne’e hola mós prezensa iha oin.

Gregório fundamentu, razaun hili lider na’in-rua ne’e iha oin, la’ós atu afavór ba lider A ka B, maibé, tanba iha ligasaun istórika ba luta TL nian to’o ukun-rasik aan. 

Reprezentante Komandante Operasaun Komandu Munsípiu Díli, Inspetór Xefe, José Maria Boavida, promete sei garante segurana ho másimu durante simu saudozu Max Stahl nia sinza, hahú kedan hosi aeroportu to’o iha saudozu nia fatin Centro Audiovisuál, FC. Benfica, Dili, besik museum rezisténsia.

Rute ne’ebé ba transladasaun sinza mak hanesan, hahú hosi Aeroportu, Ponte CPLP, Timor Plaza, tun ba Pantai Kelapa, liuhosi Tasi-ibun ba to’o iha Sengol, sa’e ba Kuluhun, liubá Becora, tama hosi eskola 12 Nevembru ho STM, Taibesi, Xina Rate, sei tun hosi Ex PM Balide, Katedrál, tun ba Estrada boot, no ikus liu iha Saudozu nia fatin Centro Audiovisuál Max Stahl, Benfica Dili.

Saudozu Cristopher Wenner “Max Stahl”, hakotu iha loron 28 Agostu 2021 ne’e, iha Ospitál Austrália.

Orsamentu ne’ebé Governu liuhosi Ministério Assunto Combatentes da Libertação Nacional (MACLN), gabinete Sekretaria Estado para os Assunto dos Combatentes da Libertação Nacional (SEACLN), apoia ba serimónia ne’e ho montante $80.737,56.

Jornalista: Rogério Pereira Cárceres