Hatutan.com, (20 Dezembru 2021), Díli—Estadu Timor-Leste (TL), prontu atu fó apoiu ba família Soudozu Max Stahl iha kualkér situasaun.

Xefe Estadu, Francisco Guterres Lú Olo simu audiénsia hosi família Saudozu Max Stahl iha Palásiu Prezidensiál Bairru-Pité, Segunda (20/12/2021). Foto/Média PR.

Prontidaun ne’e Xefe Estadu Francisco Guterres Lú Olo hato’o durante enkontru ho família Saudozu Max Stahl iha Palásiu Prezidensiál Bairru-Pité, Segunda (20/12/2021).

Notísia iha Relasaun:Max Stahl Nia Mate, Hosi Prezidente Repúblika, Governu, Xanana ho Lere Hato’o Sentidu Lutu

Enkontru ne’e realiza tanba Prezidente Repúblika rasik mak hato’o karta ofisiál hodi konvida família saudozu Max Stahl nian, iha Sábadu 18 Dezembru.

“Ha’u ho família tomak, ohin mai iha ne’e, tanba ami simu konvite atu hasoru-malu ho Prezidente Repúblika. Ohin ami simu kondolénsia nomós mensajen apoiu hosi Estadu no povu Timorense. Xefe Estadu dehan katak, Estadu sei oferese apoiu iha kualkér situasaun mai ami ba oin,” Espoza Max Stahl, Ingrid Bucens, hateten ba jornalista sira.

Xefe Estadu mós hato’o apresiasaun ne’ebé boot tebes ba Max ho nia-serbisu iha Timor-Leste ne’ebé kleur ona.

Francisco Guterres Lú Olo, mós hato’o nia kondolénsia profunda ba Max Stahl nia mate, tanba durante moris hatudu nia dedikasaun boot tebes ba TL, hahú kedan hosi tempu funu to’o ukun-an.

Kona-bá estadu TL atu halo prezervasaun ba Centro Audiovisual Max Stahl Timor-Leste (CAMSTL), Ingrid dehan, bainhira nia kaben Max Stahl sei moris, hameno katak, estadu no governu TL tenke tau matan ba CAMSTL, liu-liu atu haforsa instituisaun ne’e, hodi rai memória luta ka istória TL nian ba tempu naruk.

Ingrid Bucens  konta katak, Max nia hakarak ba oin, tenke prezerva no  aumenta apoiu hodi haforsa instituisaun CAMSTL, atu bele sai hanesan memória ba Timor, ba ninia serbisu iha ne’e, no importante liu ida ne’e bele serve hanesan rekursu espesiál iha forma audiovisuál kona-bá Timor nia istória.

Jornalista: Rogério Pereira Cárceres