Hatutan.com, (20 Dezembru 2021), Díli—Embaixadór Austrália iha Timor-Leste, Peter Roberts hala’o despedida ho Primeiru Ministru (PM), Taur Matan Ruak, iha rezidénsia ofisiál, Farol, Segunda (20/12/2021) tanba mandatu remata ona.

Embaixadór Austrália iha Timor-Leste, Peter Roberts. Foto/Hatutan.com.

Mandatu Peter Roberts nu’udár diplomata Australianu iha Timor-Leste (TL) remata ona iha tinan ne’e, tanba ne’e molok fila ba Austrália informa situasaun balun relasiona ho servisu no kooperasaun ne’ebé durante ne’e nasaun rua iha.

Notísia iha Relasaun:2023, Austrália Oferese tán Ró Patrullamentu Rua ba F-FDTL

“Ha’u mai agradese Governu ba servisu no kooperasaun ne’ebé iha. Ha’u ho família orgullu hela iha Timor durante ha’u nia mandatu,” Peter Roberts, hateten ba jornalista sira hafoin enkontru ikus ho Xefe Governu.

Diplomata Australianu ne’e hateten, durante mandatu iha Timor Leste konsege hamutuk ho Govrernu esforsu hodi ratifika akordu Fronteira Maritima no vizita ofisiál Primeiru Ministru Austrália, Ministru Negósiu Estranjeiru no Ministru Defeza iha Timor-Leste.

Iha tempu difísil nia laran, Austrália ho Timor Leste sempre servisu hamutuk nafatin atu bele buka solusaun ba problema ne’ebé povu Timor Leste enfrenta, liga ho kalamidade públiku iha 04 Abril inklui fó apoiu vasinasaun kontra Covid-19.

Austrália iha komitmentu boot atu apoia Timor Leste iha seitór ekonomia no seitór privada nasionál liu hosi Programa Serbisu Temporáriu  (SWP) hodi fó oportunidade ba foin sa’e sira.

Kada tinan Governu Austrália apoia osan millaun Dollar Australia 100  ba Programa Dezenvolvimentu atu tulun Governu hala’o dezenvolvimentu ida sustentável ba povu Timor Leste liu hosi programa prioridade sira ne’ebé Governu aloka.

“Tinan ne’e subsidiu ne’ebé Austrália apoia ba Timor-Leste aumenta hosi millaun  Dolar Australia 100 ba millaun  Dollar Australia 125,” nia informa.

Apoiu seluk ne’ebé Governu Austrália halo hodi apoia Timor Leste maka lori vasina no apoiu medikamentu seluk ne’ebé natón atu tulun Ministériu Saúde (MS) hodi hala’o nia servisu vasinasaun ba populasaun atu luta kontra Covid-19 ne’ebé kuaze ema tomak iha mundu hasoru.

Ikus liu Peter Roberts mós simu lia menon hosi Primeiru Ministru Taur Matan Ruak atu kontinua lori nia misaun hodi hametin nafatin kooperasaun entre nasaun rua no dezeju susesu iha atividade tomak iha Austrália no mós fatin seluk ne’ebé sei ba.

Peter Roberts hahú hala’o knaar hanesan Embaixadór iha Timor Leste iha 4 Janeiru 2018 no tuir oráriu, Embaixadór foun Austrália nian sei to’o iha Timor-Leste iha Janeiru tinan 2022.

Jornalista: Vito Salvadór