Hatutan.com, (20 Dezembru 2021)—Komandu Polísia Nasionál Timor-Leste (PNTL), prosesa ona membru ne’ebé deskonfia envolve iha kazu agresaun fíziku hasoru nia aman ho feton rasik, iha Suku Ogues, Postu Administrativu Maukatar, Munisipiu Covalima, foin lalais ne’e.

Agresaun Fíziku ne’ebé deskonfia envolve Ajente Xefe PNTL ho inisiál AM, iha Suku Ogues, Postu Administrativu Maukatar, Kuarta (15/12/2021). Foto Repro.

Membru PNTL ne’e ho inisiál AM, nu’udár Ajente Xefe no durante ne’e hala’o kna’ar iha Komandu Kumunisípiu Covalima, iha unidade Tránzitu.

Komandante PNTL Munisipiu Covalima, Superintendente Polísia, António de Sá, hateten kazu ne’e iha ona prosesu laran tanba, hafoin akontesimentu, Antónia de Sá, orienta kedan Polísia Servisu Justisa, no Task Forces, halo kedan intervensaun kaptura no dezarma,hodi detein iha sela detensaun Kuartel Jerál PNTL, Komandu Caicoli, durante oras 72.

“Imi ba direta komandu de’it, tanba kazu ne’e iha ona prosesu laran. Elementu ida ne’e, agora dadaun iha hela sela detensaun hodi kumpri oras 72. Agora submete ba prosesu dixiplinár,”  Superintendente Polísia, António de Sá informa ba hatutan.com, via telefónika, Segunda (20/12/2021).

Bainhira Hatutan.com konforma direta ba parte Komandu Jerál PNTL, Sekretáriu Konsellu Superiór PNTL, Superintendente Xefe, Carlos Jerónimo, rekoñese katak oras-ne’e daudaun komandu liuhosi ekipa Departamentu Justisa, hala’o hela prosesu investigasaun ba membru ne’e no tempu besik sei anúnsia rezultadu.

“Asuntu ida-ne’e sei iha prosesu nia laran, no agora daudaun, sira iha ne’ebá halo hela prosesu ba nia. Ita hein de’it nia rezultadu,” Komandante Carlos Jerónimo, hateten.

Desizaun komandu nian ba membru ne’e, sei la’o tuir lei ne’ebé vigora, tanba TL nu’udár Estadu ida direitu no demokrátiku.

Kazu agresaun Fíziku ne’ebé deskonfia envolve Ajente Xefe PNTL  ho inisiál AM, iha Suku Ogues, Postu Administrativu Maukatar, akontese iha Kuarta 15 Dezembru 2021.

Komunidade balun ne’ebé halo gravasaun vídeo ba akontesimentu ne’e konsege espalla iha média sosiál no hetan krítika makás hosi utilizadór média sosiál.

Jornalista: Rogério Pereira Cárceres