Hatutan.com, (27 Dezembru 2021), Díli—Inundasaun ne’ebé akontese iha nasaun Malázia to’o Sábadu (25/12/2021) rezulta ema na’in 46 mak mate, na’in-lima lakon seidauk hetan, no ema na’in 50.000 salva aan iha fatin refujiadu.

Abitante ida ne’ebé inundasaun izola nia iha loja nia oin, no hein hela ajudu, iha Kuala Lumpur, Malazia, Domigu (19/12/2021). Foto/AP PHOTO/VINCENT THIAN.

Hatutan.com sita publikasaun hosi Kompas.com katak, inundasaun ba dala ida-ne’e iha Malázia nu’udár inundasaun ne’ebé grave liu iha tinan sira ikus ne’e. Desde selebrasaun Natál, ekipa hosi parte relevante sira kontinua hala’o limpeza jerál to’o oras ne’e.

Udan boot ne’ebé akontese durante loron hirak nia laran, nunka para hahú hosi dadeer to’o kalan, halo mota sira boot iha semana kotuk, hamosu inundasaun iha sidade laran, halo estada sira kotu, ponte sira tohar, akontese mós  raia halai, ema na’in 50.000 obrigadu tenke buka fatin seguru.

Inspetór Jenerál Polísia Acryl Sani Abdullah Sani, informa hosi númeru vítima maioria maihosi paret Sidade Selangor ho Pahang.

Númeru refujiadu hamutuk ema na’in 54.532 ne’ebé sei iha hela sentru akollamentu hamutuk 300 no  dalan protokolu 68 to’o agora sei taka hela ba movimentu tanba inundasaun.

Nune’e mós Primeiru Ministru (PM), Malázia Ismail Sabri Yaakob rekoñese katak, oras-ne’e daudaun Governu mós enfrenta difikuldade atu distribui apoiu umanitáriu, maibe nia promete atu esforsu hodi atende nesesidade refujiadu sira iha períudu susar ida-ne’e.

Desde 2014 to’o 2021, Malázia sempre enfrenta inundasaun durante tempu udan, maibé inundasaun ne’ebé akontese iha fim semana kotuk, hanesan inundasaun ne’ebé grave liu. (**Am)