Hatutan.com, (27 Dezembru 2021), Díli—Papa Francisco hato’o sentidu kondolénsia, hafoin rona notísia triste kona-bá Arsebispu Anglikanu Áfrika Súl, Desmond Tutu, premiadu Nobel da Pás tinan 1984, ne’ebé husik-iis iha loron 26 fulan Dezembru 2021 ho idade 90.

Maktoban, Arsebispu Anglikanu Áfrika Súl, Desmond Tutu. Foto/The Gal Times.

Sentida kondolénsia ne’e Papa espresa liu hosi karta ofisiál ida ne’ebé asina hosi Sekretáriu Estadu Vatikanu nian, Kardeál Pietro Parolin no publika iha Ajénsia Notísioza Vatikana nian, Domingu 26 Dezembru.

Papa Francisco enkoraza Família no belun hosi Arsebispu Anglikanu ne’e, atu forsa nafatin no simu realidade ne’e.

Líder Másimu Igreja Katólika ne’e presta omenajen ba Arsebispu Anglikanu Desmond Tutu, ba ninia dedikasaun hodi serbi Maromak nia povu liu hosi haklaken Maromak Nia lia fuan, halo promosaun kona-bá halakon rasismu inklui rekonsiliasaun iha nia nasaun Áfrika Súl.

Papa iha esperansa no reza atu, ho Kristu nia bensaun no domin, Arsebispu Anglikanu Desmond Tutu  nia klamar bele hetan rahun di’ak iha Lalehan, hodi haksolok hamutuk ho Santu no Anju sira.

Desmond Tutu, defensór direitus umanus, figura anti-apartheid no eskritór Teolojia rekonsiliasaun “ubuntu”, nu’udár inspirasaun ida hosi ensíklika Fratelli Tutti, ne’ebé publika iha 04 Outubru 2020.

Kondolénsia hosi CNC  

“Ohin mundu lakon ema ida mak kontribui signifikante ba harii rekonsiliasaun, Justisa no dame. La’o ba Maromak nia Kadunan eterna. O nia mehi ba dame iha rai-klaran sei moris nafatin!,” Hatutan.com sita espresaun Diretór Ezekutivu Centro Nacional Chega (CNC), Hugo Maria Fernandes iha pájina ofiál CNC.

Arsebispu Anglikanu Áfrika Súl Desmond Tutu, Prezidente Komisaun Lia Loos Áfrika Súl nian no hahú hosi 2001 to’o 2005, nu’udár Konsilleiru Internasionál ba Comissão Amizade Verdade no Reconsiliação Timor-Leste (CAVR-TL).

Iha nia introdusaun ba sumáriu ezekutivu relatóriu Chega! Arsebispu Anglikanu Desmond Tutu, hateten Chega! Nu’udár Dokumentu Presiozu no nia hateten katak” an extraordinary report about an extraordinary chapter in the history of the world’s freedom struggles’. ‘I ask God to hear the prayers of the many Timorese who are still hurting and also to remember the families of the Indonesian soldiers who died pointlessly in Timor-Leste’.

Jornalista: Cipriano Colo