Hatutan.com, (28 Dezembru 2021), Díli—Sekretária Estadu Protesaun Sivíl (SEPS), rejista uma hamutuk 90-resin inklui eskola ida nomós uma-tradisionál (uma-adat) ida ne’ebé udan no anin sobu ka estraga iha Suku Bucoli, Postu Administrativu Baucau Vila, Munisipiu Baucau, Tersa (21/12/21).

“Semana hirak nia laran iha territóriu tomak, ita rejista kazu lubuk ida, maibe ida maka’as liu mak iha Bucoli. Foufoun iha loron 21 kalan mak iha akontesimentu. Dadus temporáriu iha uma 90-resin ho eskola no uma-adat maka hetan estragus,” Sekretáriu Estadu Protesaun Sivíl (SEPS), Joaquim Gusmão dos Reis Martins, informa ba jornalista sira iha Centro Formação da Policia (CPF), Comoro, Tersa (28/12/21).

Hafoin simu informasaun kona-bá situasaun dezastre hosi autoridade lokál sira iha Bucoli, iha kuarta 22 Dezembru, oras dadeersan, ekipa SEPS, liuhosi jestaun risku dezastre to’o kedan iha fatin akontesimentu, nune’e iha kinta 23 Dezembru, ekipa sira distribui kedan apoiu materiál hahán ho la’ós hahán, ho karáter emerjénsia.

Hosi dadus uma 90 ne’ebé hetan estragus, liuhosi prosesu verifikasaun to’o iha rezultadu, hatudu katak komunidade uma-ka’in 54 de’it mak elijível atu simu materiál konstrusaun, tanba sira nia uma hetan sobu totál hosi anin.

Kategorizasaun ne’e barak liu mak, uma ne’ebé kakuluk aat, tanba materiál sira ne’e iha hela armájen, no horisehik SEPS fahe kedan ba komunidade Bucoli.  Seluk fali, balun sira-nia uma bee tama, SEPS  fó de’it apoiu emerjénsia ba sira.

Jornalista: Rogério Pereira Cárceres