Hatutan.com, (15 Dezembru 2021), Díli—Governu liuhosi reuniaun Konsellu Ministru (KM), iha Kuarta 15 Dezembru 2021, aprova Projetu Dekretu-Lei númeru 47/2020, 07 Outubru, ne’ebé estabelese kona-bá estrutura orgánika ba autoridade Sekretária Estadu Protesaun Sivil (SEPS).

Governu prosede alterasaun dahuluk ba projetu dekretu ne’e, hodi aprova orgánika Ministériu Interiór nian, ne’ebé aprezenta hosi Ministru Interiór (MI), Taur Matan Ruak, no hosi Sekretáriu Estadu Protesaun Sivíl, Joaquim José Gusmão dos Reis Martins.

“Projetu ne’e ho objetivu atu estabelese estrutura hosi Sistema Protesaun Sivíl tomak, Lidera hosi Autoridade Protesaun Sivíl, hanesan entidade ezekutiva iha ámbitu nasionál, reguladora ba atividade sira hotu protesaun sivil nian, ne’ebe sei iha Prezidente Autoridade Protesaun Sivil ninia pontu fokál kona-bá ligasaun iha nível polítiku no sei halo jestaun operasionál, administrativu-lojístika no finanseira ba sistema protesaun tomak,” Portavós Governu, Fidelis Leite Magalhães hateten.

Advertisement

Ho projetu ida-ne’e kria kondisaun atu armoniza prosedimentu no definisaun ba kompeténsia hosi entidade ida-idak, nune’e evita duplikasaun ka lakúna sira no dota sistema protesaun sivil no okorénsia, artikulasaun kle’an, resposta lalais, fluénsia konstante ho informasaun atualizada no robustes, loke dalan ba estabelesimentu ba Protesaun Sivíl ida ne’ebé estruturada no organizada tuir nesesidade real país nian.

Konsellu Ministru aprova mós projetu deliberasaun rua ne’ebé aprezenta hosi Ministru Finansa (MF), Rui Augusto Gomes.

Projetu dahuluk ho objetivu atu aprova akordu projetu entre Repúblika Demokratika Timor-Leste no Ajénsia Kooperasaun Internasionál Koreia nian relasiona ho projetu “Hatete Lae ba 5h (Hamlaha, Elmintiaze ne’ebé tranzmite hosi Solu, Moras Kulit, Fuma no Bebidas Midar ka Alkolikas iha Eskola sira”, nune’e mós atribui ba Ministru Finansas mak iha poder atu asina akordu ne’e.

Projetu ida-ne’e ho durasaun vale ba tinan haat, no nia objetivu prinsipál atu fornese ba labarik sira iha idade eskolár ba Pakote Saúde Primária no edukasaun saúde iha ambiente eskolár ida seguru no saudável, hodi hamenus risku hosi moras prioritáriu sira iha eskola no hadi’a eskola hodi oferese ambiente eskolár ida seguru no saudável hodi hamenus risku hosi moras prioritária sira iha eskola.

Nune’e mós hadi’a eskola hodi oferese ambiente ida seguru no saudável, hanesan merenda eskolár ne’ebe seguru no iha nutrisaun di’ak.

Advertisement

Implementasaun hosi projetu ne’e, hala’o iha munisipiu tolu hanesan, Baucau, Bobonaro no Manufahi, no sei envolve departementu governamental sira ne’ebe respinsável iha área edukasaun no saúde.

Projetu daruak ho objetivu atu aprova akordu finansiamentu entre Repúblika Demokratika Timor-Leste no Banku Dezenvolvimentu Aziatiku kona-ba projetu melloria viabilidade ba fornesimentu enérjia no dezempeñu finanseiru ba eletrisidade Timor-Leste, E.P.

Aprovasaun ida-ne’e mós atribui poder ba Ministru Finansa atu asina akordu ne’e. Projetu ne’e ho durasaun tinan 4, ho objetivu principal maka reforsa ba prestasaun servisu ba konsumidor sira, rekualifikasaun ba rede distribuisaun no konstrusaun ka reabilitasaun ba eskritóriu rejionál sira no fortalesimentu kapasidade institusionál no komunitária iha área seguransa elétrika no operasaun sira.

Ikus liu, Konsellu Ministrus aprova projetu dekretu governu nian kona-bá modelu kartaun espesiál ba identifikasaun membru Governu sira, ne’ebé aprezenta hosi ministru Prezidénsia Konsellu Ministrus, Fidelis Manuel Leite Magalhaes.

Projetu ne’e ho objetivu atu kumpre ba dispostu iha alineia d) hosi númeru. Artigu 2, ba da-26 estatutu titulár ba órgaun soberania, ne’ebé aprova hosi lei númeru 7/2007, loron 25 fulan-jullu, ne’ebé permite sira atu livre sirkula iha fatin públiku sira ba asesu kondisionadu hodi hala’o sira nia funsaun.

Advertisement

Jornalista: Rogério Cárceres