Hatutan.com, (30 Dezembru 2021), Díli- Sekretária Estadu Protesaun Sivíl (SEPS), ekipa jestaun risku dezastre naturál, inklui autoridade lokál Postu Administrativu Venilale, Munisípiu Baucau, oras ne’e, hala’o hela verifikasaun ba dadus no levantamentu ba  kondisaun rai-nakfera no vítima sira Aldeia Kaubai, Suku Uailaha, kauza hosi rai-nakdoko ho magnitude 7.4, ne’ebé akontese iha Kinta madrugada ne’e.

Notísia iha Relasaun: Rai Nakdoko ho Magnitude 7,4 iha Maluku, Tama to’o TL ho Kupan

Rai-Nakdoko ho nia forsa magnitude 7.4 ne’ebé akontese kinta madrugada ne’e, rezulta populasaun nian to’os, natar no hela fatin tanba rai-nakfera kuaze kilómetru 10-resin. Ne’e akontese iha Aldeia Caubai, Suku Uailaha, Postu Administrativu Venilale, Munisípiu Baucau. Foto/SEPS

Sekretáriu Estadu Protesaun Sivíl (SEPS), Joaquim Gusmão dos Reis Martins, simu ona relatóriu hosi komunidade  kona-bá akontesimentu rai-nakfera iha Venilale, hodi rezulta komunidade sira-nia natar no dalan balu hetan estragus. Maibé, SESPS seidauk iha dadus serteza kona-bá dezastre natural rai-nakfera ne’e, tanba daudaun ne’e ekipa sira hamutuk ho autoridade lokál no komunitáriu sira, hala’o hela verifikasaun konjunta ba fatin sira ne’ebé hetan estragus.

“Rai-nakdoko ne’e, iha fatin hotu-hotu, ne’ebé ita nia ekipa sei la’o nafatin iha ne’ebá, sei verifika ida-pur-ida, iha fatin hanesan komunidade barak, balu sira ne’ebé sei iha foho, sira verifika hela. Entaun, ita presiza tempu uitoan lai, sira verifika loos tiha lai, depois sira haruka dadus mai, ita sei aprezenta ba públiku kona-bá estragus sira ne’ebé maka ita hetan,” Sekretáriu Estadu Protesaun Sivíl (SEPS), Joaquim Gusmão dos Reis Martins, hateten ba jornalista sira iha kna’ar fatin, Caicoli, Díli, Kinta (30/12/2021).

Advertisement

Joaquim Gusmão, konsidera situasaun rai-nakdoko hanesan kinta madrugada ne’e, ho magnitude  ne’ebé forte tebes, tanba rezulta rai-nakfera iha Baucau, no ida ne’e signifika katak, sei iha estragus barak mak mosu, liu-liu ba  komunidade sira nia uma.

Situasaun dezastre kona-bá rai nakdoko ne’e, SEPS foin simu de’it informasaun hosi Baucau, maibé munisipiu  seluk ho Rejiaun Administrativa Espesiál Oé-Cusse Ambeno (RAEOA), seidauk iha dadus ruma. Biar nune’e, ekipa sira  oras ne’e sei kontinua halo verifikasaun dadus iha terrenu, hodi buka hatene estragu sira.

Bainhira dadus hirak ne’e tama ona ba iha SEPS, sei distribui kedas apoiu ba vítima sira, tuir nivel estragus ho karater emerjénsia. Ba estragu sira ne’ebé grave ka totál ekipa sei halo levantamentu ba dala-rua, molok fó apoiu rekuperasaun.

“Dala-ruma dapur, uma-adat, eskola sira ne’e la tama iha kategoria, ita bele fó apoiu. Tanba ne’e maka ekipa tenke halo verifikasaun fila-fali ba haree ida ne’ebé mak elejivel para bele fó apoiu,” Joaquim afirma tan.

Sita husi publikasaun notísia  Radio Komunidade Lian Matebian (RCLM) Baucau, katak  komunidade Suku Bado-ho’o ho Uailaha, Postu Administrativu Venilale, Munisípiu Baucau, sira-nia natar, to’os inklui estrada rural hetan estragus.

Advertisement

Xefi Suku Uailaha, Rafael Guterres, informa, rai-nakdoko ne’e rezulta rai-nakfera fó ameasa ba uma komunidade hamutuk lima (5) no uma-lisan rua (2), inklui natar ektare 20-resin, hetan estragus iha  parte aldeia Caubai, Suku Uailaha, Postu Venilale.

Xefe Suku Bado-ho’o, Marcos António Ximenes, mós informa iha nia komunidade iha nia suku laran mós afetadu ba rai-nakdoko ne’e tanba halo estrada balun kotu, komunidade nia uma no natar mós estragus.

Administradór Postu Administrativu Venilale, Miguel Mendes Manso Guterres hateten, daudaun ne’e iha hela terrenu halo verifikasaun ba dezastre naturál iha aldeia Caubai, rai nakfera kuaze kilómetru hat resin, fó ameasa ba uma-lisan rua no uma populasaun lima inklui natar.

Jornalista: Rogério Cárceres

Advertisement