Hatutan.com, (21 Juñu 2022), Díli– Sekretária Estadu Protesaun Sivíl (SEPS) rejista katak durante fulan-lima nia laran iha tinan ne’e, hahú hosi fulan-Janeiru to’o fulan-Juñu, vítima hamutuk 200 mak hetan afetadu hosi dezastre naturál inundasaun, anin-boot, hodi sobu komunidade sira-nia uma iha territóriu Timor-Leste.

Lee Mós : Governu Kontinua Abandona Vítima Dezastre Naturál 04 Abríl 2021

Vítima Amelia de Jesus nia uma ne’ebé rahun tanba inundasaun iha loron 04 fulan-Abríl 2021. Foto/Dok.Hatutan.com

“Ita rejistu tipu dezastre ne’e barak, agora daudaun ita rejistu rai halai no anin sobu uma depois inundasaun iha parte balun iha territóriu nasionál,” Prezidente Autoridade Protesaun Sivíl, Superintendente Polísia, Ismael da Costa Babo, hateten bá jornalista sira, hafoin sorumutuk ho parseiru nasionál no internasionál sira iha Otél Timor, Tersa (21/06/2022).

Hafoin akontesimentu dezastre naturál hirak ne’e, ekipa sira SEPS nian halo kedan asisténsia, inklui distribui apoiu umanitária no apoiu emerjénsia bá vítima sira. Maibé, apoiu iha faze rekuperasaun ninian, ekipa tékniku sira iha munisípiu hotu-hotu, halo hela verifikasaun dadus.

Seidauk Iha Apoiu Rekuperasaun Bá Vítima Inundasaun 04 Abríl 2021

Prezidente Autoridade Protesaun Sivíl, Superintendente Polísia, Ismael da Costa Babo, informa tán katak, to’o ohin loron, parte Governu seidauk bele fó apoiu rekuperasaun bá vítima sira ne’ebé mak sira-nia sasán no uma hetan estragu iha inundasaun 04 fulan-Abríl 2021, tanba seidauk hetan fatin di’ak ruma ka rai privadu seluk ruma atu Governu harii foun sira-nia uma.

“Rekuperasaun ita hotu hatene katak iha tinan kotuk liubá iha dia 4 fulan-Abríl 2021, ita-nia vítima balu seidauk hetan rekuperasaun iha razaun tanba sira seidauk hetan fatin no sei hela iha área risku bá dezastre, hanesan sira ne’ebé hela iha mota-laran, sira ne’ebé hela iha Tasi-tolu no fatin seluk iha munisípiu balun,” Ismael Babo hateten.

Iha Dekretu Lei númeru 07, artigu 9, kona-bá apoiu Estadu nian. Maibé, vítima sira ne’ebé mak atu simu apoiu, tenke prienxe ka kumpre rekizitu ne’ebé mak Governu estabelese.

Hosi rekizitu sira ne’e, ida maka, tenke buka fatin ka rai seluk ne’ebé sees hosi risku, ka hela iha área sira ne’ebé protejida molok SEPS implementa apoiu.

Tuir dadus hosi SEPS nian, vítima sira ne’ebé afetadu iha dezastre naturál iha 04 Abríl 2021  iha territóriu TL hamutuk rihun-lima (5.000). Sira ne’ebé hetan ona apoiu rekuperasaun hamutuk rihun-rua, atus-lima-resin (2,500 resin).

Hosi totál dadus hirak ne’e, iha vítima hamutuk rihun-rua (2,000) mak sei hetan apoiu rekuperasaun, tanba sira seidauk iha propriedade privadu  atu Governu fó osan hodi harii hikas sira-nia uma di’ak.

Jornalista   : Rogério Pereira Cárceres