Hatutan.com, (06 Janeiru 2022) Díli-Vise Ministru Justisa, José Edmundo Caetano, klarifika katak nia parte asina akordu arrendamentu rai  ho ektare 556 ba investimentu Pelican Paradise tanba bazeia ba desizaun Konsellu Ministru  (KM).

Notísia iha Relasaun: Ministru Justisa “Fase-Liman” ba Akordu Arrendamentu Rai Pelican Paradise

Vise Ministru Justisa, José Edmundo Caetano. Foto/Hatutan.com

Vise Ministru Justisa, José Edmundo Caetano, Kinta (06/01/2022), relata katak iha loron 3 fulan-Janeiru, tinan ne’e, maske la’ós Ministru Justisa (MJ), Manuel Cárceres, maka asina akordu arrendamentu ne’e, maibé akordu ne’ebé nia asina hanesan vise-MJ iha baze orientasaun KM no momentu ne’ebá Ministru Manuel Cárceres iha kondisaun saúde ladún di’ak (moras).

Vise Ministru Justisa José Edmundo Caetano, sente la viola regra ne’ebé iha, tanba nia parte kumpre de’it saida maka Konsellu Ministru deside ona.

“Tenke kumpre desizaun ne’ebé deside ona iha Konsellu Ministru ne’ebé lidera husi Primeiru Ministru Taur Matan Ruak, tanba momentu ne’ebá Ministru Justisa moras no nia la partisipa iha reuniaun Konsellu Ministru no nia delega ha’u maka ba no iha ne’ebá deside katak ha’u bele asina akordu ne’e,” José Edmundo Caetano, hateten hodi responde Hatutan.com iha ninia knar fatin edefisiu Ministériu Justisa, Colmera, Díli.

Nia konsidera Ministru Justisa finje  dehan laiha koñesimentu, tanba antes ne’e informasaun hotu pasa ba Ministru Justisa inklui akordu arrendamentu rai no efeitu jurídiku. Tanba ne’e, akordu arrendamentu ne’e válidu no bainhira Ministru Justisa iha impedimentu ruma vise-Ministru iha responsabilidade ba buat hotu iha ministériu.

Durasaun tempu arrendamentu ba investimentu ne’e ho durasaun tempu tinan 50, maibé Governu bele extende bainhira kontratu arrenda remata.

MJ Konfirma La Moras

Ministru Justisa Manuel Cárceres, ba jornalista Hatutan.com ho RTTL,E.P konfirma tempu ne’ebá nia la moras no iha kondisaun di’ak, tanba iha loron 3 fulan-Janeiru, tinan ne’e,  mais ou menus tuku 8:00 dadeer iha fatin servisu hodi aviza ba vise-Ministru José Edmundo Caetano katak nia parte iha kondisaun saúde ne’ebé di’ak.

Iha loron  hanesan Manuel Cárceres mós haruka karta ida ba Primeiru Ministru Taur Matan Ruak katak nia parte iha kondisaun saúde ne’ebá di’ak no hala’o hela servisu.

“Kona-bá atu atribui kompeténsia ba Vise-Ministru asina kualkér arrendamentu rai bainhira Ministru hanoin dehan bele maka bele, maibé kuandu dehan labele entaun labele, tanba lei orgánika VIII Governu hateten Vise Ministru no Sekretáriu Estadu laiha kompeténsia no kompeténsia sira nian ne’e so Ministru maka delega,” Ministru Justisa Manuel Cárceres afirma.

Nia haktuir, Konsellu Ministru bele fó konfiansa ba Vise Ministru bainhira Ministru laiha, maibé bainhira Ministru iha maka Konsellu Ministru labele fó kompeténsia ne’e ba Vise Ministru.

Jornalista: Carmelita Isaac