Hatutan.com, (09 Janeiru 2022), Díli– Estadu Timor-Leste  liuhusi VIII Governu Konstitusionál legaliza tán operador  jogu Grand Dragon Lotaria.

Notísia iha Relasaun : Ministru Pedro Reis Lansa Importasaun Manu-Futu

Lansamentu operadór Grand Dragon Lotaria, 08 Janeiru 2022. Foto/Hatutan.com

Durante ne’e, operadór jogu lotaria lubun mak eziste ona iha Timor-Leste no hirak ne’ebé koñesidu liu mak operadór lotaria RUDAL 7984, Amizade,  Badfor, KISS, Timor Pool, lotaria Singapura  no lotaria sira seluk tán.

Operadór Lotaria Grand Dragon husi kompañia Red Star husi Malasia ne’ebé servisu hamutuk ho emprezáriu Timor oan balun ba prosesu rejistrasaun no lisensiamentu.

Grand Dragon Lotaria nia prosesu dulas bola halo iha nasaun Kambodia no kliente sira bele asesu liu husi pagina ofisial Red Star no Grand Dragon Lotaria kada loron tuir oráriu ne’ebé iha no oras ne’e eziste ona iha nasaun ulau (8) iha Sudeste Aziátiku.

Lidia Barreto, nu’udar komérsiu Grand Dragon Lotaria, ba Hatutan.com iha Timor Plaza, Díli, Sábadu kalan (08/01/2022), esplika nu’udar lotaria foun ne’ebé hahú halo instalasaun ba nia atividade komersial iha Timor-Leste iha fulan tolu ikus no hetan ona legalizasaun husi Ministériu Turizmu Komérsiu no Indústria Timor-Leste tamba iha servisu hamutuk ho emprezáriu Timor-oan sira ne’ebé hakarak mós atu tau sira nia asaun ka saham iha kompañia Redstart.

“Ami nia lotaria ne’e legál no hetan aprovasaun husi MTCI,” Lidia Barreto haktuir hodi konfirma mós katak Grand Dragon Lotaria garante nia sustentabilidade no garante direitu kliente hotu nian tamba iha Timor-Leste jogus Lotaria laos foin mak  Grand Dragon Lotaria.

 “Grand Dragon Lotaria sei kontribui tasa ba Estadu hahú husi 10% to’o 11% no ami nia atividade hotu ho sistema digital, nune’e garante sei iha transparente atu kontribui  reseita ba Estadu,” Lidia Barreto tenik.

Grand Dragon Lotaria mós  prepara ona aplikasaun iha play store ba kliente sira, nune’e bele fasilita kliente sira asesu ho di’ak. Grand Dragon Lotaria iha produtu tolu mak sei oferese ba kliente hotu.

“Ami iha produtu tolu Grand Dragon nian rasik, iha Singapore pools ba segunda no kinta inklui mos lotaria ida ho naran Seam Lote,” nia dehan.

Prémiu ba jogu Grand Dragon Lotaria hahú husi 6D too 2D iha valór diferente depende ba kliente sira nia sorte. Oras ne’e Grand Dragon Lotaria iha ona ajénsia hamutuk 37 ne’ebé sirkula iha Díli laran no iha parseiru ne’ebé prontu atu servisu hamutuk iha 10 no Grand Dragon Lotaria garante sei alarga ba munisípiu 12 inklui Rejiaun Administrativu Oé-Cusse Ambeno (RAEOA) iha tempu besik.

Jornalista : Voto Salvadór