Hatutan.com, (12 Janeiru 2022), Díli- Duarte Araújo, membru seguransa sivíl Munisípiu Ainaro ne’ebé destaka iha fatu lulik Nain Feto Ramelau, Postu Administrativu Hatu-Builico, hetan pankada  husi padre  Francisco Soares Fernandes ka koñesidu ho naran Padre Agio tanba la obedese ba kompromisu balun.

Imajen Ilustrasaun foti husi Google

Kronolojia ne’ebé vitima  Duarte Araújo hato’o liuhusi nia karta kronolojia ne’ebé Hatutan.com asesu katak Padre ne’e tuku nia dala neen (6) iha parte matan-fukun to’o ran.

Iha nia karta kronolojia ne’e haktuir katak tempu ne’ebá nia ho farda kompletu mak padre ne’e tuku no Padre Agio ho hela kalsa badak hemu tua hamutuk ho komandante Polísia Postu Hatu-Builico ho nia membru ida.

“Komandante ho membru ne’e uza hela farda kompletu, maibé akontesimentu ne’e sira na’in-rua tur haree de’it to’o padre ne’e tuku ha’u too ran. Atributu estadu ne’ebé hau hatais mesak  ha’u nia ran hotu de’it,” Duarte Araújo konta tuir iha nia karta kronolojia.

Relasiona ho deklarasaun vitima ne’e, Komandante Eskuadra Polísia Hatu-Builico, Inspetór Xefe Carlos Exposto via telefónika ba Hatutan.com, Kuarta (12/01/2022), relata katak los dunik, iha tempu ne’ebá,  Kuarta (5/01/2022), iha  ámbitu serimónia tara bandu ida iha área Aigua-Rema tanba udan ema kuaze 20-resin halai tama ba barak ka pondok ida iha ne’eba, ema balun tur no balun hamrik, iha momentu ne’e mos  Duarte Araújo deskute malu ho amu kona-bá kaixa ida ne’ebé tau iha Nain Feto Ramelau ne’ebé uluk ema sobu no nia mak husu ba amu iha pasadu atu hadia no prontu koopera hodi kontrola.

“Amu há’u servisu iha telekom leten, há’u mak ba hein hodi peregrinus sira mai tau osan, karik ha’u mak haree depois amu sira mai foti, prontu amu halo tuir tiha buat ne’e,  nune’e too ikus  amu dehan prontu agora ita  hamutuk ona kaixa ne’bé mak o hateten ha’u solda halo diak fali kaixa mak ne’e o lori ba tuir saida mak o hateten mai há’u iha momentu ne’eba, entaun nia diskute malu ho amu iha tempu ne’eba nia dehan nia lakoi,” Carlo Exspostu konta tuir akontesimentu ne’e.

Komandante ne’e hatutan, momentu ne’e tuur dunik no iha membru Ofisial Polísia Suku (OPS)  mós iha ne’ebá, hare parte rua hahu diskuti malu kleur too ikus mai Duarte Araújo dehan servisu ba  estadu no la’ós servisu fali ba ida ne’e (hein kaixa esmola).

“Nia repete bebeik amu dehan momentu ne’e há’u la obriga o, o mak husu mak ha’u halo buat ne’e agora atu fó ba o diskute fali há’u kona-bá saida,” Carlos Exposto haktuir amu nia lia-fuan sira.

 Duarte Araújo kontinua repete beibeik amu tuur iha meza no hahan mós hotu ona sira nain-rua kala hemu hotu tua iha ne’ebá nia mak besik liu amu há’u tur ka la distansia dok ituan, hau haree komu amu nervozu amu hamrik kala halo reasaun balun ho  komu ema barak há’u nia membru ba sori no sori dunik, la’ós la sori.

“Há’u nia membru ne’e sori kala tuku ne’e oin nusa tuir nia hateten tuku ne’e dala-neen (6) kala los dunik, maibé hau la hatene ema barak ne’e tuku lori liman saida, tuku halo oinnusa.” Carlos Exposto konta tuir.

Komandante ne’e hateten nia parte hein to’o dader  atu vitima ba halo keixa hodi lori ba halo visum balu ka oin nusa maibé tamba nervozu vitima la konsidera komandante eskuadra no direitamente ba keixa iha komandu Munisípiu Ainaro.

“Agora ami hein para ami ba halo justifikasaun,” Komandante eskuadra ne’e hateten.

To’o notísia ne’e publika, Hatutan.com halo komunikasaun via telefónika ba Padre Agio nia númeru kontaktu atu bele iha konfrimasaun hosi Padre Agio maibé Padre nia  númeru off-line hela ka  forra da área do cobertura

Jornslista : Vito Salvador