Hatutan.com, (13 Janeiru 2022), Díli– Tribunal Distritál Díli (TDD),  Kinta (13/01/2022), kontinua hala’o julgamentu ba krime violasaun segredu justisa ne’ebé deskonfia involve eis Diretór Komisaun Justisa no Paz (CJP, sigla portugés ) arguidu padre Hermínio Fátima Gonçalves no arguidu na’in tolu seluk tan maka hanesan arguidu José Cardoso Moreira, Andre Gonçalves no Libania Martins Amaral, relasiona ho relatóriu peskiza ba kazu Topu Honis.

Notísia iha Relasaun: Na’in Tempo Timor José Belo ho Jornalista António Sampaio Sasin Bá Kazu Relatóriu Topu Honis

Tuir ajenda julgamentu TDD katak iha loron 13 fulan ne’e, tuku 9:00 dadeer, Tribunál sei rona sasin husi parte Media Tempo Timor ne’ebé reprezenta rasik na’in ba Tempo Timor, José António  Belo no jornalista António Sampaio husi  Ajénsia Notisioza Portugés LUSA.

Audiénsia julgamentu ne’e tenke adia hikas tanba  Ministériu Públiku ne’ebé reprezenta husi Prokuradór Matias Soares, la marka prezensa ho razaun partisipa retiru Ministériu Públiku nian iha Lospalos hahú  husi loron 13 to’o loron 15 fulan-Janeiru ne’e.

Juiz prezide Evangelino Bello adia hikas julgamentu ba loron 26 fulan ne’e hodi kontinua rona sasin José António  Belo no António Sampaio.

Tribunál mós esplika ba sasin katak, TDD sei la notifika tan sasin sira ba dala rua, tanba verbalmente Tribunál hato’o ona loron adiamentu ne’e iha audiénsia no antes ne’e Tribunál notifika ona.

Maske Tribunál la konsege rona sasin nain rua, maibé sasin na’in-rua marka prezensa iha Tribunál molok tuku 9:00 Otl.

Relasiona ho dokumentu relatóriu  kazu Topu Honis nian ne’e maka iha lolon 6 fulan-Outubru 2020, Arsebispu Arkidioseze Metropolitana Díli, Mgr. Virgílio do Carmo da Silva, SDB, ezonera ona  Padre Hermínio Fátima Gonçalves, hosi nia kargu nu’udar Diretór CJP Dioseze Díli.

Tuir akuzasaun Ministériu Públiku, katak iha loron 19 fulan-Agostu 2020, arguidu simu labarik feto menoridade na’in-tolu ne’ebé arguidu la lembra naran no ema adultu na’in-rua; Liliana Tarung no Rano Karno maka akompaña fundasaun Honis iha Kutete no Mahata, Oé-Cusse no ema sira ne’e informa ba arguidu katak durante sira atravesa problema ne’ebé ligasaun ho labarik na’in-tolu ne’e maibé uma kreda Dioseze Díli la tau matan ba sira tamba ne’e sira mai husu protesaun ba Amu sira iha Dioseze Díli, tamba atividade saserdotál iha Rejiaun Administrativu Espesiál Oé-Cusse Ambeno (RAEOA) sei pertense ba Dioseze Díli.

Simu tiha ema sira-ne’e arguidu Hermínio informa kedas ba Amu Bispu, nune’e Amu Bispu mós fó autorizasaun verbal ba arguidu hamutuk ho arguidu sira seluk dezloka ba Oé-Cusse hodi halo enkontru ho vítima sira husi prosesu NUC 0022/19.PGGCC ho nia krime abuzu sexual ba menór.

Enkontru sira ne’ebé arguidu halo ho vítima ho inan-aman sira-nia rezulta maka arguidu relata ona iha eskrita ne’ebé tau títulu Relatóriu Peskiza ho logotipu CJP Dioseze Díli.

Iha relatóriu ne’ebé asina husi arguidu Hermínio iha loron 07 fulan-Setembru  2020, arguidu revela informasaun ne’ebé ligasaun ho investigasaun, liu-liu iha faze ezame genital ba vítima iha prosesu investigasaun iha faze Polísia nian no iha Ministériu Públiku ka Prokuradoria Distritál  Oé-Cusse, inklui naran husi vítima ba kazu abuzu sexual ba menór no pornografia infantíl.

Arguidu Hermínio distribui nia relatóriu ne’e ba Amu Bispu, ba lider nasionál Kay Rala Xanana Gusmão no Amu sira iha kongregasaun SVD nian iha Kuluhun para atu halo tradusaun ba lian Ingles no ikus mai relatóriu ne’e sai konsumu públiku no Komisaun Direitu ba Labarik ne’ebé halo knar hodi halo protesaun ba vítima sira hato’o partisipasaun ba Prokuradór Jerál Repúblika (PGR, sigla portugés) hodi loke inkéritu kontra arguidu Hermínio ho arguidu seluk hanesan Jose Cardoso, Andre Gonçalves no Libania Martins.

Iha loron 07 fulan-Setembru 2020, prosesu NUC 0022/19.PGGCC ho nia krime abuzu sexual ba menór no pornografia infantíl ne’ebé ninia vítima maka labarik sira ne’ebé nia naran balu iha lista ne’ebé arguidu publika iha nia relatóriu sei iha prosesu investigasaun nia laran nune’e faktu sira ba kazu ne’e sei iha vinkulasaun segredu justisa nia laran. Nune’e kazu ne’e, labele publika sai maibé arguidu Hermínio publika ona husi peskiza relatóriu ne’ebé nia prodús ho nia konsekuénsia katak públiku hatene uluk prosesu investigasaun ne’ebé lao no sem kauza justu fó sai aktu prosesuál ne’ebé tama iha segredu justisa.

Ministériu Públiku akuza arguidu sira ba pratika krime violasaun ba justisa nia segredu ne’ebé previstu iha artigu 291 husi Kódigu Penal Timor Leste.

Jornalista: Carmelita Isaac