Hatutan.com, (12 Janeiru 2022), Díli—Timor-Leste sei partisipa iha Sea Games ba dala XXXI, ne’ebé sei hala’o iha sidade Hanoi, Vietname iha fulan Maiu 2022.

Prezidente CDTL, Macário F.Sanches. Foto/Hatutan.com.

Nune’e, Konfederasaun Desportu Timor-Leste (CDTL) iha kritéria rasik atu halo selesaun no preparasaun ba federasaun hamutuk ho atleta sira, hodi partisipa iha eventu ne’e.

CDTL hamutuk ho federasaun sira sei halo esforsu másimu ho apoiu hosi Governu liu hosi Sekretária Estadu Juventude Desportu (SEJD), atu hadi’a prestasaun atleta sira nian durante preparasaun, nune’e bele rekolla vitória iha kompetisaun ne’ebé sei realiza iha Vietname.

“Ita ba la’ós atu partisipa de’it, maibé tenke manán. Ida-ne’e orientasaun klaru husi Governu,” Prezidente CDTL, Macário F.Sanches  hateten iha sede, Kuarta (12/01/2022).

Durante periudu preparasaun, iha federasaun balun ne’ebé enfrenta difikuldade no atleta sira laiha kondisaun atu ba kompete, sei elemina nune’e fó oportunidade ba federasaun sira ne’ebé iha preparasaun di’ak liu, atu kontribui vitória ba Timor-Leste.

Avaliasaun ba federasaun sira ne’ebé sei partisipa iha eventu ne’e bazeia ba rezultadu hosi prestasaun atleta federasaun sira nian durante partisipa iha eventu internasionál sira antes ne’e.

Iha sorin seluk Sekretáriu Jerál Karate-Do Timor-Leste António Carlos Araújo, hateten federasaun ne’e simu ona karta koñesimentu hosi CDTL no mós SEJD kona-bá federasaun Karate-Do nia partisipasaun iha Sea Games Vietname, tanba ne’e prontu atu halo preparasaun tuir lista atleta ne’ebé federasaun halo ona.

“Ita nia atleta sira ne’ebé iha, mai hosi rezultadu selesaun iha kampeonatu 2019 nian. Tamba ne’e, ita garante sira nia kualidade maski antes ne’e ita enfrenta Covid-19,” António Carlos Araújo hateten.

Atu hetan prestasaun di’ak iha kompetisaun internasionál la fásil tanba presija iha preparasaun ida integradu, iha aspetu hotu-hotu hahú hosi mentalidade, fíziku inklui  ho nutrisaun di’ak ba atleta sira.

Karate-Do iha atleta na’in-lima kompostu hosi feto ida no mane haat, nune’e sei halo esforsu máximu atu hadi’a kondisaun atleta sira nian hodi hetan prestasaun di’ak iha kompetisaun Sea Games.

Prezidente Federasaun Atletizmu Timor-Leste, Afranio Xavier Amaral hateten iha tempu badak federasaun Atletizmu sei realiza kampeonatu nasionál, hodi halo selesaun ba Atleta sira ne’ebé sei reprezenta Timor-Leste iha kompetisaun Sea Games fulan Maiu tinan ne’e.

Partisipa iha kampeonatu nasionál ne’e, atleta hirak ne’ebé iha prestasaun nasionál inklui atleta balun husi munisipiu atu nune’e bele hetan atletas ne’ebé kualifikadu hodi reprezenta Timor Leste.

Maske sei iha kampeonatu nasionál hodi hili atleta sira, maibé federasaraun rasik iha ona preparasaun másimu ho atleta nasionál lubuk ida no tuir planu sei halo konsentrasaun iha Gleno, Ermera hodi halo preparasaun.

Federasaun ne’ebé konfirmadu atu partisipa iha Sea Games Vietname, provizoriamente iha haat mak hanesan Federasaun Karate-Do, Federasaun Taekwondo, Federasaun Atletizmu no Federasaun Boxing. Federasaun sira ne’e, CDTL konsidera iha ona nível preparasaun ida di’ak, enkuantu Federasaun Natasaun no Volei Praia iha hela avaliasaun ba kualidade atleta no iha mós Federasaun rua mak submete hela proposta hanesan Federasaun Body Building no Federasaun Halteferizmu.

Provizoriamente CDTL rejista ona Atleta 21 hosi federasaun hirak ne’ebé sei reprezenta Timor-Leste no iha posibilidade aumenta no bele mós menus depende ba avaliasaun ikus molok arranka ba Vietname.

Preparasaun ba atleta sira, CDTL hetan apoiu finanseiru hosi Governu liu hosi SEJD ho montante $81.000.

Jornalista: Vito Salvadór