Hatutan.com, (11 Janeiru 2022), Díli-Asosiasaun Futeból hamutuk 14, inklui mós prezidente klube primeira divizaun Liga Futebol Timor Leste (LFTL) balun fó apoiu ba kandidatura Francisco Kalbuadi Lay lidera fali Federasaun Futebol Timor Leste (FFTL) ba periodu 2022-2026.

Notísia iha Relasaun: Kalbuadi, Francisco ho Nilton Kandidatu Forte ba Prezidente FFTL 2022–2026

Francisco Kalbuadi Lay, nu’udar prezidente komité kompetisaun AFF Suzuki Cup 2020 tara medalia ba jogadór sira. Foto/Espesiál

Prezidente Asosiasaun Futeból Munisípiu Aileu ne’ebé hanesan mós ezekutivu FFTL, Ricardino Sarmento dos Reis, hateten asosiasaun hamutuk 14 mak iha ona konkordánsia  fó apoiu ba Francisco Kalbuadi Lay, atuál Vise-Prezidente ASEAN Football Federation (AFF) atu fila-mai lidera ka organiza fali FFTL hanesan prezidente FFTL ba periodu 2022-2026.

 “Ami hakarak lori hikas Francisco Kalbuadi Lay mai iha FFTL atu sai hanesan Prezidente,” Ricardino Sarmento dos Reis hateten ba Hatutan.com iha sede Asosiasaun Futebol Dili Leste, Tersa (11/01/2022).

Ricardino Sarmento dos Reis nu’udar mós prezidente ekipa susesu ne’e ba kandidatura Francisco Kalbuadi Lay  nian ne’e afirma katak sira-nia parte apoiu Francisco Kalbuadi Lay tanba iha integridade no prestasaun iha nivel internasionál iha mundu futeból nian.

Ho nune’e, Ricardino Sarmento dos Reis ho nia kolega asosiasaun sira seluk garante katak ho lideransa Francisco Kalbuadi Lay nian iha FFTL sei lori ánimu di’ak liután ba dezenvolvimentu futeból iha Timor-Leste no aprofunda tán integridade FFTL nian iha nivel rejionál no internasionál.

 “Kona-bá kampu ba asosiasaun sira, kompetisaun regular ba kada idade durante ne’e ami rona de’it, maibé la implementa iha pratika tamba ne’e ami hakarak hadi’a FFTL ho lideransa Francisco Kalbuadi Lay nian,” Ricardino Sarmento dos Reis aprofunda.

Prezidente Asosiasaun Aileu ne’e hatutan durante ne’e Ezekutivu FFTL la halo planu ida di’ak atu akumula asosiasaun sira no konsidera subsídiu ne’ebé FFTL atribui ba kada asosiasaun kada fulan $1.000 la sufisiente atu halo atividade iha terrenu, nune’e difikulta asosiasaun sira prodús atleta no hamate mós talentu futebolista iha munisípiu no ida ne’e konsidera hamosu esplorasaun hodi benefisia de’it individu no grupu.

“Durante ne’e asosiasaun mak terus hela de’it, maibé FFTL uza asosiasaun sira nia naran hodi hetan osan husi FIFA no AFC kada tinan purvolta $1.000.000,” nia tenik.

Iha parte seluk prezidente Emanuel FC, Aleixo do Carvalho Monteiro  hateten hamutuk ho asosiasaun 14 iha FFTL nia mahon iha vizaun ida de’it, hakarak fó apoiu ba Francisco Kalbuadi Lay atu hadi’a hikas lakuna sira iha FFTL no promove dezenvolvimentu Futeból iha Timor-Leste ba oin di’ak liután.

Ekipa Susesu Kandidatu prezidente FFTL, Francisco Kalbuadi Lay nian. Foto/Hatutan.com

“Ami hamutuk husu maun Francisco Kalbuadi Lay atu lidera hikas FFTL tamba nia iha ona influensia boot ba iha AFC no AFF no ida ne’e sei garante mos sustentabilidade dezenvolvimentu futeból iha Timor Leste,” Aleixo do Carvalho Monteiro hateten.

Durante ne’e FFTL, tuir nia, ezekutivu FFTL atuál la jere rekursu finanseira ho di’ak, ikus mai klube sira sai vítima tamba subsidi ne’ebé FFTL fó ba Asosiasaun no klube sira mout de’it iha FFTL.

Prezidente Asosiasaun Futeból Dili Oeste, Ipolito Soares hateten, ko’alia kona-bá dezenvolvimentu futebol, labele koalia teoria ho retorika de’it, maibé tenke mós tau iha pratika atu ema hotu sente saida mak halo ba sosiedade hadomi futeból.

“Francisco Kalbuadi Lay halo ona buat lubuk ida no haree ba rezultadu servisu ne’ebé iha maka asosiasaun Dili Oeste prontu fó nia apoiu,” Ipolito Soares hatutan.

Nain ba klube Assalam FC ne’e hateten, durante ne’e nia observa FFTL nia planu sira la konsege ezekuta tamba la iha kalendarizasaun no planu feitu husi órgaun ezekutivu ne’ebé ikus mai asosiasaun hotu kontinua sai vítima tamba falta fasilidade no ekipamentu atu apoiu promove talentu foin-sa’e sira nian.

Prezidente asosiasaun Dili Leste no aktual vise Prezidente FFTL, Aleixo Cobra hateten, prezidente aktual iha prestasaun di’ak, maibé iha mós buat barak mak seidauk lao’ tuir saida mak asosiasaun futeból sira husi munisípiu nia hakarak.

Problema infraestrutura sai mos preokupasaun  no insusesu mandatu prezidente aktual tanba kampu treinu federasaun nian ne’ebé to’o oras ne’e seidauk hetan reabilitasaun maske FIFA promete ona atu hadi’a.

Nia dehan dezenvolvimentu futeból iha Timor atu la’o di’ak tenke entrega federasaun ba ema ne’ebé iha koñesimentu ba bola no hadomi futeból.

“Francisco Kalbuadi Lay agora iha AFC no FIFA koñesidu nia bele lobi atu ita hetan tulun ruma ne’ebé mais di’ak liu kompara ho tinan sira antes.” Aleixo Cobra hakotu.

Hatutan.com halo esforsu no tentativa lubun atu halo entrevista direta ho Prezidente FFTL, Francisco da Costa Pereira Jeronimo, maibé nia rejeita fó komentáriu ba Hatutan.com.

Iha loron 27 fulan-Dezembru 2021, Hatutan.com hasoru diretamente Prezidente FFTL, Francisco da Costa Pereira Jeronimo, atuál Ministru Asuntu Parlamentár no Komunikasaun Sosiál (MAPCOMS) iha Sede FFTL, Díli, hodi ko’alia no husu atu halo entrevista kona-ba nia rekandidatura ba prezidente FFTL periodu 2022-2026,  maibé nia rejeita fó komentáriu hodi dehan de’it, “lae”.  

Jornalista : Vito Salvador