Hatutan.com (12 Dezembru 2021) Díli—Tribunál Distritál Díli (TDD), iha Kuarta 12 fulan ne’e, liu hosi alegasaun hosi Ministériu Públiku (MP) ne’ebe rereprezenta hosi Prokradora Lídia Soares, husu ba Tribunál atu aplika pena efetiva tinan lima ba Funsionária Públika hosi Notariadu Munisípiu Díli, arguida Julieta Freitas Boavida no pena suspensaun tinan tolu ba arguida Lúcia Castro de Sousa Araújo, ba krime korrupsaun ativa, no korrupsaun pasiva ba aktu lisitu.

Parte advogadu no Defensór Públiku ne’ebé reprezenta hosi Nelson Borges no Jonas Henrique, husu ba Tribunál atu aplika pena mínimu tinan tolu no suspende tinan tolu ba arguida Julieta Freitas Boavida, husu mós pena multa ba arguida Lúcia Castro de Sousa Araújo.

Razaun Defensór Públiku no Advogadu husu pena ne’e, tanba krime ne’ebé imputa ba arguida na’in-rua másimu ho pena prizaun tinan lima, suspensaun no pena multa, tanba ne’e husu Tribunál atu aplika pena mínimu hosi tinan lima no pena multa.

Hafoin rona arguida, juíz prezide deside adi’a fali julgamentu ba loron seluk, hodi kontinua rona arguida Lúcia Castro de Sousa Araújo.

Antes ne’e, tuir akuzasaun hosi Ministériu Públiku katak iha loron 25 fulan Marsu tinan 2019, lezadu José Cardoso ho Saturnino Soares ba edifísiu Notariadu Munisípiu Díli iha oras tuku 3:00 madrugada ho intensaun hodi hetan númeru formuláriu ba Billete Identidade ho Sertidaun RDTL.

Maski ba sedu, maibé Ia konsege hetan númeru formuláriu Billete Identidade ho Sertidaun RDTL, tanba ema barak mak ba forma sedu liu sira.

Nune’e, José Cardoso protesta hodi fó hatene ba seguransa ne’ebé mak altura ne’ebá hein hela iha ne’ebá katak, tanba saida mak sira Ia hetan númeru formuláriu, lakon tempu barak ona no momentu ne’ebá seguransa hateten ba José Cardoso ho Saturnino katak, imi bele hein de’it, kuandu sira atende tiha ema 40 ne’ebé mak iha ona númeru Formuláriu ne’e to’o tuku 12:30, karik sira sei iha tempu sei kontinua atende fali ita bo’ot sira.

Ho nune’e, sira mós hein duni to’o tuku 12:30 no kuandu sira forma hela, sira nia kolega ho naran Daniel hateten inklui hatudu ba sira katak Mana ida hatais kamiza loren, kalsa mean no uza pasta koor kafé ne’e bele trata lalais dokumentu sira hanesan BI no Sertidaun RDTL ne’ebé refere ba arguida Julieta Freitas Boavida, tanba ne’e Saturnino ho José Cardoso la’o tuir kedan arguida Julieta.

Momentu ne’ebá Saturnino entrega telefone ba José Cardoso atu grava aktu ne’ebé mak halo hosi arguida Julieta Freitas Boavida ba joven na’in haat hodi haruka joven na’in haat ne’e ba kopia dokumentu no entrga hamutuk ho osan ba arguida hodi lori tama ba funsionáriu notariadu nian.

Iha loron 26 fulan-Marsu tinan 2019 entre tuku 09:00, Saturnino ho nia kolega José Cardoso hato’o kedan kestaun ne’e ba iha Komisaun Anti korrupsaun (KAK), no tuir mai investigadór KAK hamutuk ho Saturnino ho José Cardoso halo kedan planu, no Investigadór ho naran Euclides entrega osan $20, ba sira na’in rua hodi kontaktu ba arguida Julieta Freitas Boavida hodi finji atu trata Sertidaun RDTL ho Billete Identidade.

Liu hosi telephone, ikus mai José Cardoso ho Saturnino hasoru malu duni ho Julieta Freitas Boavida iha Edifísiu Notaridau Díli no iha hasoru-malu ne’e arguida dehan katak nia servisu iha notariadu no promote trata sira nia dokumentu no sertidaun RDTL no BI ho tempu ne’ebé lais.

Alende ne’e arguida mós promote bele hetan kedan blanko BI, maski altura ne’ebá Notariadu fó sai ona ba públiku katak blanko ba BI stock hotu, maibé arguida garantia ba sira katak liu hosi nia sira hetan kedan blanko naran katak sira selu osan ho montante $20 kada ema.

Maski nune’e, iha momentu ne’ebá Saturnino kontinua ko’alia ho arguida hodi entrega dokumentu ho osan $20 ba arguida.

Hafoin ne’e, investigadór hosi KAK halo kedan detensaun ba arguida Julieta Freitas Boavida ho Saturnino hodi lori ba aprezenta iha KAK.

Hosi informasaun ne’ebé mak hetan hosi arguida Julieta Freitas katak nia hetan atendimentu direta hosi arguida Lúcia Castro de Sousa Araújo nu’udár funsionária iha Notariadu Munisípiu Díli, tanba arguida Julieta Freitas fó ona osan dala tolu ba Arguida Lúcia Castro de Sousa Araújo hodi trata dokumentu ho lais, maibé tenki selu ho montante kada sertidaun $20.

Ho hahalok arguida na’in-rua nian, MP akuza arguida sira ba pratika krime korrupsaun ativa, no korrupsaun pasiva ba aktu lisitu ne’ebé previstu iha artigu 294 no 293 hosi kódigu penál Timor-Leste.

Audiénsia julgamentu prezide hosi juiz kolektivu Ana Paula Fonseca, Evangelino Bello, Albertina Neves, MP reprezenta hosi Prokuradór Lídia Soares no arguida sira hetan asisténsia legál hosi Advogadu Privadu Nelson Borges no Defensór Públiku Jonas Henrique.

Jornalista: Carmelita Isaac