Hatutan.com, (14 Janeiru 2022), Díli-Kazu  dengue sa’e maka’as iha kapital Díli obriga jerente sira iha Hospital Nasional Guido Valadares (HNGV) tenke halo esforsu  hodi reativa hikas sentru izolamentu Vera Cruz sai hanesan fatin internamentu  ba kapital Díli atu bele responde ba númeru pasiente dengue ne’ebé loron ba loron aumenta iha Díli.

Notísia iha Relasaun: MS Hafanun Komunidade Dom Aleixo Kombate Dengue

Pasiente Dengue iha Vera Cruz, Díli, 14 Janeiru 2022. Foto/Hatutan.com

Koordenadór Internamentu Vera Cruz,  Romel da Costa Braz, ba Hatutan.com iha nia servisu fatin, Vera Cruz, Sesta (14/01/2022), hateten deside iha loron 05 fulan-Janeiru  to’o ohin loron,  Sentru Vera Cruz rejista pasiente hamutuk 181. Husi total pasiente ne’e, kompostu husi pasiente ho moras dengue hamutuk 129  no kazu respiratóriu no moras seluk hamutuk 52.

Husi númeru ne’e, pasiente ne’ebé alta hamutuk 74 no 72 kontinua baixa hodi hetan tratamentu intensivu husi médiku no pesoál saúde sira.

“Kazu dengue ne’e ita rejista domina liu ho dengue shock syndrome ho mos dengue fever ne’ebé mak ho númeru natoon no kazu barak liu mak rekupera tiha ba fali shock maibé ami nia ekipa halo servisu maka’as atu bele salva ita nia oan sira,” Romel da Costa Braz hateten.

Maske númeru alta boot, maibé insidénsia baixa kontinua aumenta husi loron ba loron, liuliu  liga ho kazu dengue, nune’e parte Vera Cruz iha esforsu hodi maximiza jestaun no rekursu tomak atu bele fó atendimentu ba komunidade.

Husi total kazu dengue ne’ebé baixa iha Internamentu Vera Cruz maioria mai husi sentru saúde sira iha Díli laran no númeru boot liu mai husi postu administrativu Dom Aleixo.

“To’o agora ami nia óbitu ne’e zero hela, ita seidauk rejista ema lakon vida iha fasilidade ida-ne’e,”  Romel da costa Braz hateten.

Sentru internamentu Vera Cruz iha kama hamutuk 84 no fahe ba sala ualu (8) hanesan  sala A kama 11, sala B kama 10, sala C kama 10, sala D kama 10,  ICU  kalam lima (5), Maternity iha kama haat (4), Pediatria iha kama sia (9) inklui iha koridor hamutuk kama 15. Husi kama 84 ne’ebé iha Internamentu rejista kama mamuk hamutuk 12.

Jornalista: Vito Salvador