Hatutan.com, (05 Janeiru 2022), Díli-Ema na’in-ualu, kompostu hosi labarik na’in-hitu (7) no ema ho idade adultu na’in-ida (1) mate tanba sofre moras dengue durante tinan 2021.

Notísia iha Relasaun: Semana Dahuluk 2022, Kazu Dengue Haat iha Díli

Pasiente Dengue na’in-rua okupa maka ida tanba kama la to’o. Foto/Hatutan.com

Dadus husi klinika HNGV ne’ebé hatutan.com asesu, hatudu, oras ne’e HNGV rejista kazu dengue hamutuk 264 no iha kategoria  pediatria rezista pasiente ho moras dengue hamutuk 241 no 23 ho kategoria interna ka adultu.

Diretor Jeral HNGV, Alito Soares ba jornalista sira iha sala konferensia HNGV Bidau, Kuarta (05/01/2022),  hateten ekipa navegador, kontrola kualidade no supervizaun inklui mós ho pesoál sira ne’ebé pikete oras 24 iha HNGV halo aktualizasaun ba númeru kazu dengue, atu nune’e, bele halo atuasaun  ho rigor hodi salva vida pasiente nian.

“Maioria mortalidade ba kazu dengue akontese tamba pasiente sira sofre dengue softsindron katak dengue ida ne’ebé tama ona ba faze ida  afeita ona ba iha orgaun balu entaun esforsu ne’ebé mediku sira halo la konsegue salva,” Alito Soares hateten.

Diretur Jeral HNGV ne’e hatutan kazu dengue iha Timor-Leste oras ne’e tama ona ba faze gravidade nia laran tanba iha 24 oras ikus  ne’e, iha loron 04 fulan-Janeiru 2022, HNGV rejista kazu dengue hamutuk 36 no husi numeru ne’ebé iha hatudu labarik ho idade tinan lima mai kraik mak sofre ba dengue no maioria husi Munisípiu Díli.

“Ita iha hela faze ida maka’as loos no ita sei responde tuir kbiit hodi buka esforsu tomak para bele responde ba ida-ne’e,” Alito Soares hateten.

Klínika HNGV Halo Alerta Prevensaun

Diretór Klínika HNGV, Marcelino Correia hateten númeru dengue iha Timor Leste sei bele aumenta no tuir estimasaun siklus dengue sei as to’o iha fulan-Marsu. Nune’e husu ba parte hotu liuliu komunidade sira atu halo prevensaun sedu liu husi limpeza no hamoos uma hun.

“Ita husu  komunidade sira atu la bele husik bee-nalihun,  hamoos valeta, ezgotu no hamoos tanke iha haris fatin, roda no vazu ai-funan ne’ebé bee iha laran tenke fakar sai, hamoos uma oin no la bele tara roupa iha uma laran atu evita susuk tolun iha fatin sira ne’e tamba lori risku ba ita-nia saúde,” Marcelino Correia hateten.

HNGV rekomenda atu inan- aman sira uza autan nu’udar protesaun ba labarik sira iha uma, fó han no hemu bee barak uainhira isin-manas no iha ona sintoma ruma relasiona ho dengue lalais lori ba iha fasilidade saúde atu hetan atendimentu uluk hodi prevene.

Sei Transfere Pasiente ba Vera Cruz

Haree ba numeru pasiente ne’ebé aumenta as iha HNGV, orgaun ezekutiva HNGV iha ona planu atu halo tranferensia pasiente sira iha sala Nifas ba klinika Vera Cruz, nune’e bele iha espasu naton atu akumula pasiente sira seluk liliu kazu dengue ne’ebé nia numeru aumenta iha kada loron.

“HNGV rejista pasiente hamutuk 750 no tuir rasiu hatudu kada loron HNGV simu pasiente husi na’in-30 to’o na’in-40 mak baixa no halo tratamentu iha banku urjénsia,” Alito Soares tenik.

Razaun transferénsia  pasiente sira ne’ebé kondisaun estavel, la iha risku liliu pasiente sira iha parte Nifas nian ba Vera Cruz tamba hetan rekomendasaun husi departementu Obstetra HNGV, nune’e informa ona ba iha Servisu Saúde Munisípiu Díli no Ministériu Saúde atu buka solusaun imedita hodi muda pasiente, atu nune’e, bele garante funsionamentu HNGV tuir espasu ne’ebé iha.

“Ita garante dunik katak pasiente sira-ne’e la iha risku mak ita sei muda, liliu kazu sira ne’ebé la halo operasaun no ho kategoria kazu kritiku,” Alito Soares dehan.

Karik klinika Vera Cruz nakonu iha posibilidade atu utiliza mos fatin sira ne’ebé antes ne’e Governu halo ba kuarentena hanesan iha Tasi-Tolu.

Diretor Klínika HNGV, Marcelino Correia hateten pasiente ho moras dengue nia númeru sae maka’as, nune’e HNGV la iha ona espasu naton no obrigadu pasiente sira tenke toba hamutuk iha kama ida.

“Ita problema loos ho fatin no susar uitoan, maibé ita buka rezolve no tuir planu sei muda pasiente sira iha nifas ba Vera Cruz,”  Marcelino Correia tenik.

Diretor klinika HNGV ne’e hatutan utilizasaun ba Klinika Vera Cruz provizoriamente deit no uainhira situasaun normal sei fila hikas ho kondisaun ne’ebé iha.

Total kama iha HNGV ba pasiente sira hamutuk 421 no husi numeru ne’ebé iha iha kama fiksu ne’ebé fahe ba kada unidade hamutuk 350 no kama rezerva hamutuk 71.

Oras ne’e kama sira iha HNGV kuaze okupadu no nakonu iha koridor sira hodi atende pasiente, maibé iha sala emerjensia hatudu kuaze pasiente dengue na’in-rua okupa kama ida.

Jornalista: Vito Salvadór