Hatutan.com (17 Janeiru 2022) Díli—Tribunál Distritál Díli (TDD), iha Segunda 17 fulan ne’e, liu hosi alegasaun hosi Ministériu Públiku (MP) ne’ebé reprezenta hosi Prokuradór Jacinto Babo, husu ba Tribunál atu aplika pena ne’ebé adekuadu ba arguidu TM ba krime omesídiu neglijente dala 10.

Kondutór bus ne’ebé ho kondisaun alezadu. Foto/Hatutan.com.

Pedidu ne’e ho razaun, maski arguidu konfesa katak nia mak kondutór bus Bali-Timor diresaun Díli-Lospalos ho xapa matríkula 32.720, ne’ebé hetan dezastre iha Fatu-ahi, hodi rezulta ema na’in-10 mate, maibé arguidu mós sai hanesan vítima tanba hosi dezastre ne’e rezulta arguidu nia ain rua no kidan tohar to’o agora la’o la di’ak.

Parte Defeza ne’ebé reprezenta hosi Manuel Sarmento husu ba Tribunál atu absolve arguidu hosi krime ne’ebé imputa ba nia, tanba hosi dezastre ne’e rezulta arguidu nia kondisaun grave to’o agora no tur de’it iha kursi roda.

Hafoin alegasaun, Tribunál adi’a hikas julgamentu ba loron seluk hodi rona desizaun, maibé Tribunál deside sei lee leitura sentensa iha arguidu nia uma, ne’ebé lokaliza iha Postu administrative ida iha Dili, tanba arguidu nia kondisaun labele la’o.

Advertisement

Antes ne’e, tuir akuzasaun hosi MP katak iha loron 20 fulan Dezembru tinan 2015, tuku 5:00 dader hanesan kondutór bus tula pasajeiru 25 atu ba Lospalos, maibé to’o iha Fatu-ahi, arguidu ho kondisaun dukur, to’o iha kurva derepente monu ba rai-naruk hodi rezulta ema na’in-10 mate fatin.

Tanba ne’e, MP akuza arguidu ba prátika krime omesídiu neglijente dala 10 ne’ebé previstu iha artigu 140 hosi kódigu penál TL.

Audiénsia julgamentu ne’e prezide hosi juiza singulár Ana Paula Fonseca, MP reprezenta hosi Prokuradór Jacinto Babo no arguidu hetan asisténsia hosi Defensór Públiku Manuel Sarmento.

Jornalista: Carmelita Isaac

Advertisement