Hatutan.com (15 Janeiru 2022) Díli—Tribunál Distritál Díli (TDD), liu hosi juíz kolektivu Argentino Luisa Nunes, José Gonçalves, Alvaro Freitas hala’o primeiru julgamentu krime partisipasaun ekonomia negósiu no falsifikasaun dokumentu ho nuc 0106/16.PGGCC ne’ebé deskonfia involve eis Adjuntu Komissáriu CAC Àssuntu prevensaun, arguidu Rui Pereira dos Santos, eis sekretáriu Ezekutivu Nasionál PDHJ, Áureo José António Sávio, inklui Diretora kompañia Viverei Jeli’ms Unipessoal Lda, arguida  Elisa Maria Eugénia Dias Quintas Monteiro.

Primeiru julgamentu ba krime ne’e, relasiona ho projetu fornesimentu farda ba funsionáriu PDHJ iha tinan 2013, ne’ebé hamout osan Estadu ho montante $6.595.

Notisia iha Relasaun:Kazu Funsionáriu PDHJ, Sasin Laiha Koñesimentu Kona-bá Taxa ba Farda F-FDTL

Iha primeiru julgamentu ne’e, Tribunál la konsege rona arguidu sira ho razaun seidauk iha Defensór Públiku, ne’ebé atu fó asisténsia ba arguidu Rui Pereira dos Santos, tanba ne’e Tribunál husu ba arguidu atu buka ninia defeza tantu hosi parte Advogadu Privadu ka Defensoria Públika.

Ho razaun ne’e, Tribunál deside adi’a hikas julgamentu ba loron seluk, hodi rona arguidu sira kona-bá sira nia involvimentu iha kazu ne’e.

Antes ne’e, tuir akuzasaun hosi MP katak iha loron 26 fulan Novembru tinan 2013, PDHJ reprezenta hosi arguidu Rui Pereira dos Santos hanesan Provedór Interinu asina kontratu ho kompañia Viverei Zelim’Ms Unipessoal, Lda, ne’ebé reprezenta hosi Lúcia Carvalho da Piedade ne’ebé hetan autorizasaun hosi arguida Elisa Maria Eugénia Dias Quintas Monteiro ba projetu fornesimentu farda ba funsionáriu PDHJ.

Fornesimentu farda ba funsionáriu mane par rua, no kada kuantidade kustu $230 ba ema na’in 64 ho totál $14.720.

Fornesimentu farda ba funsionária feto sei hetan mós farda ho kuantidade hanesan no kada par ho valór $221 ba ema 42 ho totál valór $ 9.282.

Fornesimentu farda ba formasaun hanesan jacket, kamiza, kalsa training ba ema na’in 106 ho totál osan $2.120.

Totál farda ba mane no feto inklui farda formasaun ho montante globál $26.122 ho durasaun kontratu fulan ida hahú loron 25 fulan Novernbro 2013 to’o 25 Dezembru 2013.

Iha loron 17 Dezembru 2013, kompañia Viverei Zelim’Ms Unipessoal, Lda aprezenta pedidu alterasaun kontratu ba modelu no kuantidade farda hodi aumenta presu hosi valór totál antes $26.122 ba fali $28.225, ne’ebé ho kategoria ba funsionáriu mane PDHJ sei hetan farda par rua ho aumentu presu kada ema $295 ho totál valór $ 15.930 ba ema na’in 54, ba feto par rua hamenus ba unidade 37 ho aumentu presu kada farda $275 ho total $10.175 ba ema na’in 37 no farda formasaun kada ema $20 ho totál 2.120 ba funsionáriu 106 ne’ebé hetan aprovasaun hosi arguidu, Rui Pereira.

Iha loron 26 Novermbru 2013, arguidu Aureo José A.Sávio no Rui Pereira dos Santos sertifika no aprova pedidu pagamentu hosi kompañia ho montante $26.122, hodi haruka tezouru atu halo pagamentu, maske kompañia seidauk fornese farda.

Iha loron 23 Dezembru 2013, Arguidu José Antonio Sávio solisita ba lojístika atu emite dokumentu Resivimentu Inspesaun, maibé rezeita hosi responsável.

Tanba ne’e, arguidu aprezenta relatóriu deskrisaun no informa ba aprovizionamentu katak, kompañia seidauk fornese farda, maibé iha loron 28 Dezembru 2013 halo ona pagamentu ba kompañia ho montante $26.122.

Iha fulan Abríl 2014 maka kompañia foin fornese farda ba PDHJ no distribui ba funsionáriu PDHJ maske loron hatama farda remata ona la tuir kontratu ne’ebé iha, maski nune’e, sei falta farda ba mane ho unidade 10 ne’ebé ekivale ba osan ho valór $2.300 no ba feto sei falta unidade 5 no ekivale ba osan ho montante $1.375.

Maske nune’e, kompañia simu akuzasaun bazeia ba kontratu ho Governu atu fornese farda no roupa training ba funsionáriu 212, maibé iha faktu hatudu kompañia falsifika invoice no fornese de’it kuantidade farda tuir deskrisaun ne’ebé kompañia iha, la tuir kontratu ne’ebé iha no kompañia mós husu tán adisionál ho valór $2.920 ne’ebé ikus mai hetan aprovasaun hosi arguidu Rui Pereira dos Santos.

Alende ne’e, iha justifikasaun adisionál falsa ne’ebé aprezenta hosi arguidu Áureo José Antonio Sávio no funsionáriu na’in-tolu seluk Margarida Francisca José Maria dos Santos, Maria de Jesus no Sidónio João Sequeira  Soares, maibé iha faktu simu tiha ona farda hamutuk ho funsionáriu seluk, maibé atu kompleta pagamentu restu ho montante $2.920, arguidu Aureo José António Sávio autoriza valór refere iha CPV no deklara katak pagamentu ne’e adisionál iha kontratu.

Iha loron 07 Setembru 2015, inventa mós kontratu atu halo pagamentu ba kompañia ho valór $2.920, maibé atribui pagamentu ba de’it farda par 1, tanba ne’e kontratu refere hanesan kompleta de’it prosedimentu hodi gasta osan Estadu ba benefísia arguida Elisa Maria Eugénia Dias Quintas Monteiro nu’udár diretora kompañia Viverei Zalim’Ms unipessoal, Lda.

Konsekuensia hosi arguidu no arguida nia hahalok, fó prejuizu ba Estadu RDTL ho montante $2.300 + $1.375 + $2.920 = $6.595, tanba ne’e MP akuza arguidu sira ba Pratika krime partisipasaun ekonomia no negósiu, falsifikasaun dokumentu ne’ebé previstu iha artigu 299 no 303 hosi kódigu penál TL.

Audiénsia julgamentu ne’e prezide hosi juiz kolektivu Argentino Luisa Nunes, José Gonçalves, Alvaro Freitas, MP reprezenta hosi Prokuradora Lidia Soares no arguidu sira hetan asisténsia legál hosi Defensór Públiku Juvinal Dias.

Jornalista: Carmelita Isaac