Hatutan.com, (17 Janeiru 2022), Díli—Komandu FALINTIL Forsa Defeza Timor-Leste (F-FDTL), liuhosi Unidade Polísia Militár (PM), kontinua hala’o hela prosesu investigasaun ba membru ne’ebé antes ne’e, hetan asidente tráfegu (xoke) ho karreta F-FDTL nian iha área Becora, no fatin seluk.

Formatura Polisia Militár iha serimónia aniversáriu ba dala-17, iha Kuartél Kintál-boot, Segunda (17/01/2022). Foto/Hatutan.com.

Komandante PM, Majór de Infantaria, Abel da Costa Xavier “Niki”, haktuir, iha tinan 2021, membru F-FDTL ida, xoke ho karreta militár marka isuzu, iha mota-ulun, área Becora.

Notisia iha Relasaun:Investigadór F-FDTL Kontinua Buka-tuir Fukun Hosi Dezastre Becora

Maski membru ne’e lakon ona nia vida (mate), maibé, tuir regra militár nian, tenke kontinua hala’o prosesu ba kazu ne’e, hodi bele identifika kauza hosi asidente tráfegu ne’e rasik.

Advertisement

“Maske nia mate ona mós, prosesu la’o nafatin. La hatene, prosesu la’o ne’e, atu kastigu mate-klamar ka, atu kastigu saida, ita la hatene. Tuir regra ne’e, prosesu tenke la’o,” Niki hateten hodi responde ba Hatutan.com, hafoin serimónia aniversáriu PM nian ba dala-17, iha kuartél Kintál-boot, Segunda (17/01/2022).

Tuir rezultadu provizóriu ne’ebé investigadór PM nian hetan katak, membru ne’e hetan asidente tanba, iha kondisaun ne’ebé hemu hela tua (lanu). Maibé, destinu hotu-hotu, determinasaun hosi Maromak.

Karreta rua estragu iha Tour FALINTIL

Iha fulan-Agostu 2021, Komandu F-FDTL, liuhosi Xefe Estadu Maiór Jenerál, Tenente Jenerál Lere Anan Timur, organiza programa ida kona-bá Tour Falintil, ho tema “Tour ba Dame”.

Objetivu hosi atividade Tour ne’e, hodi komemora loron nasionál FALINTIL nian ba dala-46, iha nia ezisténsia.

Advertisement

Durante Tour ne’e, liuhosi atividade vitiza ba munsípiu, postu no suku sira, iha karreta militár nian barak mak hetan asidente tráfegu, liu-liu xoke no monu ba rai naruk.

Nune’e, tuir relatóriu hosi unidade PM katak, durante fulan ida, hala’o atividade Tour ne’e rejista karreta rua mak estragu ka aat, tanba asidente iha área Munisipiu Likisá ho Ainaro.

“Iha Tour ne’e, estraga kareta rua de’it, tanba tuir kondisoens terrenu nian la di’ak, depois karreta nia kondisoens dala-ruma ladi’ak,” Majór de Infantaria Niki, informa tán.

Maski nune’e, Niki konsidera situasaun sira ne’e mosu nu’udár dezastre ida ne’ebé la espera. Ema bele halo viájen ho operasionál to’o iha ne’ebé, maibé, bainhira tempu to’o tenke hasoru duni asidente.

Kona-bá dadus investigasaun ne’ebé oras ne’e PM hala’o, Majór Niki dehan, tuir regra militár, labele fó sai ba públiku,  tanba konfidensiál.

Advertisement

Jornalista: Rogério Pereira Cárceres