Hatutan.com, (22 Janeiru 2022), Dili-Ukun  ho kualidade, sai baze fundamentu ba Ernes da Costa Correia Barros “Sicliras Aihai”, hodi  kandidata aan ba Prezidente Repúblika periódu 2022-2027.

Ernes da Costa Correia Barros “Sicliras Aihai”. Foto/Espesiál

“Atan ha’u tane, hodi hato’o ba ita-boot sira, ha’u nia naran Ernes da Costa Correira Barros “Sicliras Aihai”, ofisiálmente, deklara ba públiku tomak, ha’u nia kandidatura ba prezidente repúblika demokrátika de Timor-Leste ba tinan 2022 to’o 2027,” Ernes da Costa Correira Barros, “Sicliras Aihai”, hateten iha nia diskursu iha ámbitu deklarasaun nia kandidatura iha nia rezidénsia, Taibessi, Dili, Sábadu (22/01/2022).

Maske la temi númeru serteza kona-bá totál apoiante hira mak fó apoia ba ninia kandidatura ne’e, maibé “Sikiliras Aibai”, ho fiar aan katak, sei manán iha eleisaun Prezidensiál ne’ebé Prezidente Repúblika dekreta ona sei hala’o iha loron 19 fulan-Marsu 2022 mai.

Nia garante sei manán iha eleisaun prezidensiál mai, tanba durante ne’e tun ona ba baze, hodi halo konsolidasaun  ho komunidade sira nu’udár nia apoiantes, kona-bá ninia prontidaun atu kandidata aan ba PR.

“Ha’u fiar aan metin, ba para atu manán. Lakon, ne’e demokrasia normál,” Ernes Barros “Sicliras Aihai”, hateten no lia tun tan mós katak nia respeita mós fundadór sira nasaun nian, Komandante ein-xefe das Falintil, Maun-boot Kay Rala Xanana Gusmão, Veteranu no Veterana sira hotu, no povu TL tomak, hosi lorosa’e to’o loromonu, katak, nia prontu tán, hodi oferese nia aan  ba kandidatu independente ba kargu PR Timor-Leste.

Jornalista: Rogério Pereira Cárceres