Hatutan, (24 Janeiru 2022) Díli—Ministériu Públiku liuhusi Prokuradór Rogério Viegas, husu ba Tribunál Distritál Dili (TDD) liuhusi Juiz koletivu, Ana Paula Fonseca, Maria Solana ho Ivan Suritay, atu aplika pena prizaun efetiva tinan-rua ba funsionáriu públiku ho inisiál JSB tanba fa’an fali komputadór PN ba nia kolega IAX.

Notísia iha Relasaun:Deskonfia, Funsionária Ida Fa’an Komputadór Parlamentu Nasionál

Liuhusi audiénsia julgamentu kontinuasaun iha TDD, Segunda (24/01/2022), Prokuradór Rogério Viegas, klarifika katak pena prizaun efetiva tinan-rua ne’e bazeia ba faktu provadu katak arguidu fa’an duni komputadór ba IAX, maske arguidu nega hodi defende nia aan, maibé MP  konsidera deklarasaun sasin nian provadu katak arguidu fa’an dunik komputadór ba IAX.

MP mós konsidera arguidu  JSB laiha arrependimentu ba nia hahalok, tanba antes ne arguidu hetan ona pena suspensaun ba krime ne’ebé hanesan, tanba ne’e MP husi ba Tribunál atu aplika pena ne’e hodi hanorin arguidu.

Parte advogada privada Virna Carvalho husu ba Tribunál atu absolve arguidu husi krime ne’ebé imputa ho razaun primeiru la prienxe elementu krime ne’ebé MP akuza tanba arguidu rasik laiha koñesimentu kona-bá komputadór ne’e no arguidu la fa’an komputadór ne’e,  maibé bainhira IAX atu uza maka arguidu dehan fó fali osan ne’ebé arguidu uza ona hodi hadi’a komputadór ne’e.

Hafoin alegasaun juiz prezide adia hikas julgamentu ba loron seluk hodi rona leitura sentensa.

Tuir akuzasaun hosi MP katak arguida hahú serbisu FP iha PN ho level 5 nu’udár  tékniku IT, maibé iha tinan 2006/2007 PN sosa komputadór HP Paviliion G3033L (inklui asesoria) hamutuk 12, ho presu kada unidade $1.150, Network printer, HP Laser Jet 3005n unidade 1 ho presu kada unidade $1,540, HP Laser Jet 1022 unidade 12 ho presu kada unidade $395, HP Color Laser Jet 2605DN unidade 2 ho presu kada unidade $720, UPS Prolink PRO 600 unidade 16 ho presu kada unidade $155, software Microsoft Window XP Prof. SP2, unidade 16 ho presu kada unidade $175 no Microsoft Office 2007 basic, unidade 16 ho presu kada unidade $225. 

Iha tinan 2012, arguidu fó hatene ba IAX katak “se hakarak sosa ha’u nia komputadór unidade 1 ho folin $400, komputadór ne’e ha’u nia maun lori hosi Indonézia, foin uza tinan-ida (1) no sei di’ak, mana bele fiar, tanba ha’u servisu iha IT, tanba ne’e IAX mós fiar hodi sosa ho folin $300, maibé bainhira atu uza la di’ak tanba komputadór la funsiona”.

lha loron 01 fulan-Agostu 2016, IAX rona informasaun hosi JP, katak nia mós sosa komputadór ida hosi arguidu JSB maibé komputadór refere afinál Patrimóniu Parlamentu Nasionál. Tanba ne’e IAX informa kedan ba LS, nu’udár Xefe Lojístika PN katak, nia parte sosa komputadór ida hosi arguida no daudaun iha hela uma, no LS haruka IAX entrega komputadór ne’e hodi konfirma ho sistema baze de dadus no ikus mai deteta katak, komputadór ne’e patrimóniu PN.

Depois halo identifikasaun ho sistema baze dadus iha Lojístika PN identifika katak, komputadór ne’ebé arguidu JSB fa’an ba IAX mak komputadór ne’ebé kompostu hosi Monitór ho númeru serial koi mós tiha, key board 1 ho marka HP ho númeru serial BC3880 FVBW9FVB, ho ninia presu $1.150 no CPU 1 ho númeru serial SGH7260GQV SGH7260GQV ho $1.155 nune’e  totál presu $1.305.

Relativamente iha prosesu investigasaun iha loron 19 fulan-Juñu 2018, Gabinete Sekretáriu Jerál PN voluntáriamente entrega objetu ekipamentu komputadór unidade ida ba iha Komisaun Anti-Korrupsaun (CAC) nu’udár  prova, tanba ne’e MP akuza arguidu JSB ba pratika krime pekulatu ne’ebé previstu iha artigu 295 hosi kódigu penál TL.

Jornalista: Carmelita Isaac