Hatutan.com (24 Janeiru 2022) Díli—Tribunál Distritál Díli (TDD), iha Segunda 24 fulan ne’e, liu hosi leitura sentensa ne’ebé lee-sai hosi juiz Evangelino Belo, kondena Funsionária Públika arguida Lúcia Castro de Sousa Araújo hosi Serbisu Notariadu Munisípiu Díli, ho pena prizaun tinan rua, suspende ba tinan rua no arguida Julieta Freitas Boavida ho pena prizaun tinan ida, suspende ba tinan ida fulan neen.

Razaun Tribunál kondena arguida na’in-rua ho pena ne’e, tanba konsidera faktus provadu katak, arguida Lúcia Castro de Sousa Araújo hanesan funsionária Serbisu Notariadu ne’ebé iha obrigasaun atu fó atendimentu gratuita hodi Trata sidadaun hotu-hotu nia Billete Identidade (BI), maibé arguida fasilita hodi trata dokumentu espesiál no lais ba ema ne’ebé hakarak selu ho montante $20, liu hosi arguida Julieta Freitas Boavida maske la’ós funsionária iha Servisu Notariadu.

Notisia iha Relasaun:Prátika Broker, MP Alega Funsionária Notariadu ho Prizaun Tinan Lima

Deskunfia Kobra Osan, Funsionária Notariadu Hatán iha TDD

Tribunál mós konsidera faktus provadu bazeia ba arguida na’in-rua nia deklarasaun hodi konfesa katak, loos duni arguida Julieta Freitas Boavida mak kontrata ho ema ne’ebé hakarak trata BI ho lais, bele liu hosi arguida maibé tenke selu $20 no osan ho dokumentu sei entrega ba arguida Lúcia Castro de Sousa Araújo.

Hafoin lee-sai leitura ne’e, Tribunál esplika arguida na’in-rua la ba prizaun, maibé durante pena suspensaun tinan rua nia laran, arguida sira labele komete tán kualkér krime no bainhira komete, arguida sira tenki ba kumpre fali tinan rua iha prizaun.

Antes ne’e, tuir akuzasaun hosi Ministériu Públiku (MP) katak, iha loron 25 fulan Marsu tinan 2019, lezadu José Cardoso ho Saturnino Soares ba edifísiu Serbisu Notariadu Munisípiu Díli, iha tuku 03:00 madrugada ho intensaun hodi hetan númeru formuláriu ba Billete Identidade ho Sertidaun RDTL.

Maski ba sedu, maibé Ia konsege hetan númeru formuláriu Billete Identidade ho Sertidaun RDTL, tanba ema barak mak ba forma sedu liu.

Nune’e, José Cardoso protesta hodi fó hatene ba seguransa ne’ebé mak altura ne’ebá hein hela iha ne’ebá katak, tanba saida mak sira Ia hetan númeru formuláriu, lakon tempu barak ona no momentu ne’ebá seguransa hateten ba José Cardoso ho Saturnino katak, imi bele hein de’it, kuandu sira atende tiha ema 40 ne’ebé mak iha ona númeru formuláriu ne’e to’o tuku 12:30, karik sira sei iha tempu sei kontinua atende fali.

Sira mós hein duni to’o tuku 12:30 no bainhira sira forma hela, sira nia kolega ho naran Daniel hateten inklui hatudu ba sira katak mana ida hatais kamiza loren, kalsa mean no uza pasta koor kafé ne’e bele trata lalais dokumentu sira hanesan BI no Sertidaun RDTL ne’ebé refere ba arguida Julieta Freitas Boavida, tanba ne’e Saturnino ho José Cardoso la’o tuir kedan arguida Julieta.

Momentu ne’ebá Saturnino entrega telefone ba José Cardoso atu grava aktu ne’ebé mak halo hosi arguida Julieta Freitas Boavida ba joven na’in-haat, hodi haruka joven na’in-haat ne’e ba kopia dokumentu no entrega hamutuk ho osan ba arguida, hodi lori tama ba funsionáriu Notariadu nian.

Iha loron 26 fulan-Marsu tinan 2019 entre tuku 09:00, Saturnino ho nia kolega José Cardoso, hato’o kedan kestaun ne’e ba iha Komisaun Anti korrupsaun (KAK), no tuir mai investigadór KAK hamutuk ho Saturnino ho José Cardoso halo kedan planu, no Investigadór ho naran Euclides entrega osan $20, ba sira na’in-rua hodi kontaktu ba arguida Julieta Freitas Boavida, hodi finji atu trata sertidaun RDTL ho Billete Identidade.

Liu hosi telephone, ikus-mai José Cardoso ho Saturnino hasoru-malu duni ho Julieta Freitas Boavida iha edifísiu Serbisu Notaridau Díli no iha hasoru-malu ne’e arguida dehan katak, nia servisu iha notariadu no promete trata sira nia dokumentu no sertidaun RDTL no BI ho tempu ne’ebé lais.

Alende ne’e, arguida mós promete bele hetan kedan blanko BI, maski altura ne’ebá Notariadu fó sai ona ba públiku katak, blanko ba BI estoke hotu, maibé arguida garantia ba sira katak liu hosi nia sira hetan kedan blanko naran katak sira selu osan ho montante $20 kada ema.

Iha momentu ne’ebá kedan Saturnino kontinua ko’alia ho arguida, hodi entrega dokumentu ho osan $20 ba arguida.

Hafoin ne’e, investigadór hosi KAK halo kedan detensaun ba arguida Julieta Freitas Boavida ho Saturnino hodi lori ba aprezenta iha KAK.

Hosi informasaun ne’ebé mak hetan hosi arguida Julieta Freitas katak, nia hetan atendimentu direta hosi arguida Lúcia Castro de Sousa Araújo nu’udár funsionária iha Serbisu Notariadu Munisípiu Díli, tanba arguida Julieta Freitas fó ona osan dala tolu ba Arguida Lúcia Castro de Sousa Araújo, hodi trata dokumentu ho lais, maibé tenki selu ho montante kada sertidaun $20.

Ho hahalok arguida na’in-rua nian, MP akuza arguida sira ba pratika krime korrupsaun ativa, no korrupsaun pasiva ba aktu lísitu ne’ebé previstu iha artigu 294 no 293 hosi kódigu penál Timor-Leste.

Audiénsia julgamentu prezide hosi juiz kolektivu Ana Paula Fonseca, Evangelino Belo, Albertina Neves, MP reprezenta hosi Prokuradór Matias Soares no arguida sira hetan asisténsia legál hosi Defensór Públiku Nelson Borges no Jonas Henrique.

Jornalista: Carmelita Isaac