Hatutan.com, (29 Janeiru 2022), Díli-AD SLB Laulara Fc kampiaun Super Tasa 2021 hafoin halakon S’amuser Fc liuhusi drama penalidade ho score 5-3.

AD SLB Laulara Fc kampiaun super tasa 2021. Foto/Hatutan.com

S’amuser Fc nu’udar mós kampiaun ida iha Liga Feto Timor Leste époka 2021no kampiaun Tasa Rosa “MUKI” Bonaparte 2021.

AD SLB Laulara Fc hasoru malu iha jogu Super Tasa 2021 ho ambisaun maka’as hakarak rekolla vitória hodi hetan títulu kampiaun nu’udar preparasaun di’ak ba enfrenta Liga Epoka 2022.

AD SLB Laulara Fc iha esperansa atu manan nia adversáriu S’amuser Fc tamba antes ne’e ekipa rua hasoru ona malu iha final Tasa Rosa ‘MUKI’ Bonaparte 2021 iha ne’ebé  AD SLB Laulara Fc konsege rekolla vitória ho escore 4-3 hodi hetan títulu kampiaun.

S’amuser ne’ebé nu’udar ekipa mellor iha Liga Feto Timor Leste 2021 iha mós esperansa katak sei bele asegura nia ekipa husi derrota atu bele hetan títulu dobru  hodi fó satisfasaun ba adeptu, manejamentu no patrosinadór sira ne’ebé durante ne’e fó suporta ba ekipa refere.

Liu husi jogu ne’ebé hala’o iha Estádiu Munisipál Dili, Sábadu (29/01/2021), ekipa rua hatudu jogu ho tensia as tuir ambisaun ekipa rua nian. S’amuser Fc hahú jogu ho kuidadu hodi lansa atake ba ekipa adversáriu liu husi nia avansadu Dolores V. Silva Costa (7) liu husi kolaborasaun ho meiu kampu Suzana Barros (10) no Rosa da Costa (8).

AD SLB Laulara Fc la hakfodak ho presaun ne’e hodi asegura nia baliza husi risku, defeza AD SLB Laulara Fc, Godelivia Martins (13) hatudu nia performa di’ak iha defeza sentrál hodi asegura atake ne’ebé jogadora S’amuser Fc nian sira.

Ekipa rua mantein ho ritmu jogu hodi buka oportunidade atu halo golu, S’amuser Fc hetan oportunidade osan mean liuhusi penalidade iha minutu 34, maibé baliza AD SLB Laulara Fc, Agostinha Nogueira (21) sei bele asegura nia baliza husi sutu metru 12 ne’ebé ezekuta husi avansadu S’amuser Fc,   Dolores V. Silva Costa (7). Ho fallansu ne’ebé iha obriga ekipa rua tenke fahe pontu iha primeira parte.

Haku’ur ba segunda parte, ekipa rua hahú halo mudansa ba táktika hodi halo substituisaun ba jogadra atu bele iha mudansa hodi hetan oportunidade atu halo uluk golu hodi asegura vitória molok jogu termina.

S’amuser Fc nafatin tenta halo kontra atake liu husi nia avansadu sira iha liña oin, maibé falla atu ezekuta bola oportunidade.

Avansadu AD SLB Laulara Fc, Elvira da Silva (22) no Julia Belo (19) halo kolaborasaun di’ak hodi buka oportunidade atu hatama golu, maibé liña kotuk S’amuser Fc mantein disiplina hodi la husik oportunidade atu jogadora AD SLB Laulara Fc hatama golu.

Jogadora AD SLB Laulara Fc kuaze halo esforsu hotu liu husi orientasaun ne’ebé treinadór Jopy Fernandes iha, maibé nafatin falla.

 Treinadór koko halo mudansa ba táktika jogu, maibé S’amuser la husik oportunidade atu AD SLB Laulara sira halo jogu.

Ekipa rua mantein ritmu jogu liu husi kontra atake to’o tempu segunda parte termina. Ekipa rua la halo jogu tempu extra tamba tempu nune’e liu husi desizaun koletiva entre arbitrajen, komisáriu jogu, treinadór no komisaun organizadora deside ekipa rua hakat direita ba iha penalidade hodi hadau malu kampiaun.

Jogadora S’amuser Fc mak hetan uluk oportunidade atu suta penalidade, nune’e treinadór Olisio dos Santos liu husi desizaun koletiva ho treidar baliza no asistente husu atu Rosa da Costa (8) mak ezekuta uluk penalidade, maibé falla no jogadora AD SLB Laulara Fc, Vanesa Fernandes (17) marka uluk golu ida hodi muda score ba 1-0.

Jogadora S’amuser FC seluk hanesan Natalia Lawa (13), Dolores V. Silva Costa (7) no Adelaide de Carvalho konsege marka hotu golu, maibé falla tamba ezekutadora husi AD SLB Laulara Fc hanesan Natali da Costa (11), Astari Wiwit (8), Leticia P. Soares (12) no Godelivia Martins (13) marka golu vitória ba sira-nia ekipa hodi muda eskor ba 5-3.

Ho vitória ne’e ekipa AD SLB Laulara Fc sai nu’udar kampiaun no hetan prémiu hanesan medulla kampiaun no osan ho valor $2,500.00.

Hafoin jogu sekretáriu jerál AD SLB Laulara Fc, Domingos Caero ba jornalista sira hateten, AD SLB Laulara Fc  iha ambisaun atu sai kampiaun iha Super Tasa ne’e hodi kompleta kampiaun Tasa Rosa ‘MUKI’ Bonaparte ne’ebé antes ne’e AD SLB Laulara Fc  rekolla husi nia adversáriu S’amuser rasik.

“Orgullu ho esforsu jogadora sira nian ba sakrifisiu no dedikasaun ne’ebé sira halo ba AD SLB Laulara Fc  atu bele kumpre sira-nia kompromisu ho prezidente klube Kay Rala Xanana Gusmão katak sira sei kampiaun ba super tasa,” Domingos Caero hateten.

Adjuntu Sekretáriu Jerál Federasaun Futeból Timor Leste (FFTL), Frederico Martins hateten, jogu Super Tasa sai nu’udar jogu ikus ba Liga Feto Timor Leste époka ne’e tamba ne’e iha jogu ne’e federasaun nu’udar nain ba Liga Feto halo mós serimónia entrega prémiu ba kampiaun Liga Feto époka 2021.

Iha serimónia enserramentu ba Liga Feto époka 2021 fahe mós prémiu ba kampiaun Liga Feto S’amuser Fc hetan medulla, tasa no osan ho valor $10,000.00, segundu lugar medalla no osan ho valor $7,500.00 no terseiru lugar medalla no osan ho valor $5,000.00.

Jornalista: Vito Salvador.