Hatutan.com, (31 Janeiru 2022), Díli- Federasaun Futebol Timor Leste (FFTL) sei realiza kongresu ba da hitu iha loron 26 fulan-Fevereiru 2022, hodi hili membru ezekutivu foun ba mandatu 2022-2026. Tuir estatutu sei iha enkontru komité exco loron-30 antes hodi deside ajenda kongresu, maibé komité exco abandona no lakohi “boikota” partisipa tamba la iha ona konfiansa ba prezidente FFTL atuál,  Francisco Martins da Costa Pereira Jerónimo.

Notísia iha Relasaun: Asosiasaun Futeból sira Ho Ezekutivu Halo Mosaun Sensura Hasoru Prezidente FFTL Francisco Jerónimo

Edifisiu FFTL

Tuir konvite ne’ebé Hatutan.com asesu hatudu katak konvite ba enkontru komité exco no membru ezekutivu iha Sesta (28/01/2022), hodi marka data enkontru ba loron Domingu (30/01/2022), maibé iha data refere membru exco no ezekutivu hamutuk na’in-hitu (7) mak la marka prezensa hodi prienxe kuorum.

Membru hirak ne’ebé la marka prezensa mak hanesan II vise prezidente FFTL, Aleixo da Silva Gama, III vise prezidente FFTL, Germano A. J. da Silva no membru exco sira hanesan Maria Terezinha Viegas, Simão Piedade Babo, Ricardino dos Reis, Angelo da Costa no Faustino Godinho.

Advertisement

II Vise prezidente FFTL, Aleixo da Silva Gama ba Hatutan.com hateten, sira maioria la marka prezensa iha enkontru preparasaun ba VII kongresu FFTL tamba  la iha ona konfiansa ba lideransa prezidente FFTL atuál bazeia ba karta mosaun sensura ne’ebé hatama desde fulan-Dezembru 2021.

“Ami la partisipa por que ami la iha ona konfiansa ba nia (prezidente FFTL atuál Francisco Jerónimo).” Aleixo da Silva Gama hateten.

Relasiona ho aktu membru ezekutivu no komité exco FFTL nian ne’e Hatutan.com halo konfirmasaun ho adjuntu Sekretáriu Jerál FTTL, Frederico Martins, hateten, nia parte rekoñese enkontru ezekutivu nian iha  Domingu (30/01/2022), la akontese tamba maioria husi membru exco la partisipa no parte ezekutivu mós informa ona mai iha sekretariadu.

“Enkontru ezekutivu nian ne’ebé planeia ba loron 30 fulan-Janeiru ne’e, infelizmente la deside buat ida tamba la prienxe kuorum tuir estatutu FFTL haruka,” Frederico Martins hateten.

Tuir ajenda iha enkontru ne’e ezekutivu no membru exco sei rona mós aprezentasaun husi komité Judisiáriu no Komité Eleitoral relasiona ho verifikasaun no aseitasaun ba lista kandidatura sira, maibé tamba la prienxe kuorum, nune’e komité rua ne’e aprezenta de’it lista no desizaun ikus iha kongresu mak sei deside.

Advertisement

“Tamba enkontru preparasaun husi membru ezekutivu no exco laiha, nune’e ajenda hotu sei ajusta tuir situasaun iha loron kongresu,” Frederico Martins haktuir.

Adjuntu sekretáriu jerál FFTL ne’e salienta, maske enkontru membru ezekutivu sira nian atu diskute ajenda VII kongresu FFTL nian la realiza, maibé tuir planu iha asuntu importante haat mak sei aprezenta iha loron kongresu, maka hanesan aprezentasaun relatóriu tinan fiskál 2021, relatóriu Finanseiru, relatóriu auditóriu no ikus liu mak eleisaun ba membru ezekutivu no exco FFTL ba mandatu 2022-2026.

Jornalista:  Vito Salvador

Advertisement