Hatutan.com, (06 Fevereiru 2022), Díli– Partidu União Democrática Timorense (UDT) liuhusi kongresu nasionál ba dala-VI hili Francisco David Xavier Carlos ‘Abonu’ nu’udar prezidente partidu ba períodu 2022-2026.

Francisco David Xavier Carlos ‘Abonu’, prezidente partidu UDT períodu 2022-2026. Foto/Espesiál

Liuhusi kongresu nasionál durante loron rua; Sábadu-Domingu (05-06/02/2022), iha salaun Lalini-Lariguto, Komisaun Nasionál ba Eleisaun (CNE, sigla portugés), reprezentante ka delegadu partidu UDT nian hamutuk 412 husi munisípiu 12 ho Rejiaun Administrativu Oé-Cusse Ambeno (RAEOA) depozita konfiansa ba Francisco Carlos “Abonu” hodi lidera partidu istóriku UDT hodi troka eis prezidente UDT,  saudozu Gilman Exposto Santos.

Delegadu UDT nian ne’ebé partisipa iha kongresu nasionál  ne’e, kompostu husi Munisípiu Aileu na’in-24, Ainaro (25), Baucau (25), Bobonaro (35), Covalima (21), Dili (30), Ermera (22), Liquiça (24), Lautem (25), Manatuto (25), Manufahi (27), RAEOA (25), Viqueque (26), Organizasaun Juventude (30), Organizasaun Feto (25), Knuk Profisionál (10), Konsellu Katuas (8) no Konsellu Superior Polítika UDT na’in-lima (5).

Liu husi kongresu ne’e kongresista sira aprezenta pakote rua atu kompete ba kargu prezidente no sekretáriu jerál iha ne’ebé pakote A kompostu husi Francisco David Xavier Carlos ‘Abonu’ nu’udar prezidente no Nicson Lay hanesan sekretáriu jerál.

Pakote B proponente sira kandidata Rodolfo Henrique Aparicio ba prezidente no Jeca Almeida ba sekretáriu jerál.

Iha diskursu polítiku pakote A no B hatudu sira nia seriedade iha vizaun no misaun atu kontinua hatutan obra partidu UDT nian hodi atinje meta sira iha eleisaun parlamentár ne’ebé sei mai atu bele lori susesu ba UDT.  Maske nune’e, iha eleisaun direita no sekreta, delegadu sira hamutuk 304 vota ba pakote A kompostu husi Francisco David Xavier Carlos ‘Abonu’ hanesan prezidente no Nicson Lay  hanesna sekretáriu jerál hodi lidera UDT.

Enkuantu pakote B kompostu husi  Rodolfo Henrique Aparicio ba prezidente no Jeca Almeida ba sekretáriu jerál hetan de’it votu 105 no votu nulu-tolu (3).

Hafoin simu pose Prezidente Eleitu partidu UDT, Francisco David Xavier Carlos ‘Abonu’ ba jornalista sira hateten knar nu’udar prezidente partidu la’ós buat ida fasil, maibé kompromete an hodi serve no hadi’a estrutura partidu UDT husi nasionál to’o baze atu bele hetan konfiansa husi povu iha eleisaun jerál 2023.

“Ami garante atu hadi’a estrutura hahú husi aldeia, suku, postu administrativu no munisípiu hodi prepara an di’ak liután ba enfrenta eleisaun parlamentár 2023,” Francisco David Xavier Carlos ‘Abonu’ hateten.

Eis sekretáriu jerál partidu UDT ne’e kompromete ba kuadru no militante UDT atu halo kadernizasaun tranzisional hahú husi partidu nia laran hodi kapasita militante sira hodi garante rekursu kualifikadu iha partidu no ba sosiedade.

“Ami sei oferese formasaun profisionál ba militante hotu ne’ebé nesesita,” nia subliña.

UDT Apoiu Ramos-Horta

Liuhusi kongresu nasionál ne’e, delegadu partidu UDT nian foti desizaun hodi apoiu kandidatu Prezidente Repúblika 2022-2027, José Manuel Ramos-Horta ne’ebé aprezenta ona husi partidu CNRT ho “maun-boot” Kay Rala Xanana Gusmão.

“UDT ho nia kuadru, militante no simpatizante hotu husi nasionál to’o aldeia sei fó hotu votu ba José Ramos-Horta iha eleisaun prezidensiál, 19 fulan-Marsu 2022,” Francisco David Xavier Carlos ‘Abonu’ hateten.

Pozisaun partidu UDT fó apoiu total ba kandidatura José Ramos-Horta, maibé UDT mós respeita no valoriza desizaun Udetista sira husi Munisípiu Lautem ne’ebé fó apoiu ba kandidatu Prezidente Repúblika, Tenente Jenerál (reformadu) Lera Anan Timur.  

Jornalista: Vito Salvador