Hatutan.com (11 Fevereiru 2022), Dili-Ai-sasik  kona-bá tansá mak segundu jerasaun FRETILIN, Tenente Jenerál reformadu Tito Cristovão da Costa “Lere Anan Timur”, to’o agora “la bele” ba Comte Central FRETILIN (CCF) atu foti kartaun membru FRETILIN, deskobre ona.

Notísia iha Relasaun: Lere: “Ha’u Ba CCF La’ós Atu Kompete Malu” 

Lere Anan Timur. Foto/Hatutan.com

Informasaun ne’ebé hafutar iha resintu sede CCF, Comoro, Dili,  no iha mós diskusaun balun iha resintu sede sentrál kandidatu Prezidente Repúblika (PR) 2022-2027, Jenerál reformadu Lere Anan Timur nian katak, Lere to’o agora “la bele” ba foti kartaun membru FRETILIN iha CCF tanba Sekretáriu Jerál  FRETILIN, Marí Alkatiri orienta ba nia camarada sira iha CCF hodi komunikasaun ho ekipa Lere Anan Timur nian, katak atu hetan kartaun membru FRETILIN, maka Lere rasik tenke submete karta pedidu ofisiál ba Sekretáriu Jerál FRETILIN.

Rona tiha mensajen sira ne’e, fontes besik Tenente Jenerál reformadu Lere Anan Timur ne’ebé lakohi publika nia identidade haktuir,  Jenerál Lere deside lakohi haruka karta ofisiál ba CCF no ba Marí Alkatiri atu husu fali pedidu sai membru FRETILIN.

Iha enkontru ida ho ekipa susesu ba apoiu Kandidatu Lere ba Kadeira Númeru-um (1) iha RDTL ne’e, Lere afirma katak nia sei la haruka karta ofisial ba Sekretáriu Jerál FRETILIN, Marí Alkatiri, atu bele hetan kartaun membru FRETILIN tanba maubere oan hotu hatene nanis ona, se mak Lere no oinsá relasaun Lere ho FRETILIN.

“Jenerál Lere sempre hateten iha públiku no hateten ba ami katak atu haruka karta pedidu maka lae. Mezmu Lere la ba foti kartaun membru FRETILIN mós nia ema FRETILIN nanis. Nia sai membru FRETILIN segundu jerasaun iha 1981 liuhusi konferénsia nasionál iha Maubai iha rejiaun Viqueque, hamutuk ho membru FRETILIN na’in-ualu seluk no sir-ane’e mate hotu ona, hela de’it mak Jenerál Lere. Ne’e faktu istória,”  fontes besik Lere ne’e haktuir.

Iha konferénsia Maubai ne’e, Lere asume knar nu’udar Komisáriu Polítiku no nu’udar responsavel prinsipál Polítiku Rejiaun Funu.

Notísia iha Relasaun: BREAKING NEWS: CCF “Taka”, Lere ho Ekipa Seidauk Foti Kartaun Membru FRETILIN

Iha okaziaun vizita ba Munisípiu Ainaro no bainhira halo deklarasaun ofisial hanesan kandidatu Prezidente Repúblika 2022-2027, Jenerál reformadu ho diviza fitun tolu (Tenente Jenerál)   Lere Anan Timur deklara katak, atu ba ka la ka la ba CCF no atu simu ka la simu kartaun FRETILIN mós nia FRETILIN nafatin.

“Ha’u simu pozisaun FRETILIN ne’e la’ós oferta iha situasaun di’ak nia laran, maibé iha situasaun funu nia laran. Ha’u sai membru FRETILIN iha hudi-tahan okos, han hudi-kain no han koto-moruk. Ami na’in-sia (9) eleje nu’udar komisáriu polítika FRETILIN iha loron 03 fulan-Marsu 1981 no sira na’in-ualu (8) mate ona no mate ikus liu maka Mauk Moruk. Hela de’it ha’u mesak mak sei moris,”  Lere afirma bainhira halo deklarasaun iha nia rezidénsia foin lalais ne’e bainhira simu informasaun husi CCF katak loron feriadu tinan foun Xina nian iha loron 01 fulan-Fevereiru, funsionáriu CCF feriadu, nune’e la bele halo serimónia simu Lere iha CCF.

iha ajenda ne’ebé marka mós entre parte sira iha CCF ho ekipa susesu Lere Anan Timur nian katak posivél liu Lere bele ba foti kartun mamembru FRETILIN iha loron, 03 fulan-Febereiru liubá. Maibé  kansela tiha ho rajaun katak Marí Alkatiri husu Lere atu hakerek karta pedidu formál ba Alkatiri no ba CCF.

Sekretáriu Jerál Partidu FRETILIN, Mari Alkatiri. Foto/Hatutan.com

Marí Bin Amude Alkatiri, ne’ebé jornalista sira konfirma iha ambitu kongresu OPMT nian ba dala-4 iha Salaun São José, Katedrál Dili, Sesta (11/02/2022), hateten, Tenente Jenerál reformadu, Lere Anan Timur, tenke halo uluk karta formál ida ba nia, molok foti kartaun militante FRETILIN nian iha CCF.

“Tuir regra, ami taka tiha ona inskrisaun. So ha’u Sekretáriu Jerál de’it mak bele loke fila-fali ba espesiál. Mais, ba ida-ne’e, ha’u nia jenerál Lere, tenke hakerek uluk mai ha’u, la hakerek, ha’u labele loke,” Sekretáriu Jerál FRETILIN, Marí Bin Amude Alkatiri hateten.

Hanesan Sekretáriu Jerál FRETILIN, Alkatiri hala’o servisu hotu tenke formál. Tanba nee, bainhira Tenente Jenerál reformadu, Lere Anan Timur, atu foti nia kartaun militante mós tenke halo uluk karta ruma ba nia.

“Klaru. Ha’u sekretáriu jerál, servisu formál. La’ós ne’e konvida ba jantár, konvida, ha’u ba jantár,” Alkatiri afirma tan.

Alkatiri mós hateten tán katak, bainhira Lere Anan Timur ba mesak iha iha CCF hodi foti nia kartaun militante FRETILIN nian, nia simu. Maibé, bainhira Lere ba ho ekipa, Alkatiri sei la simu.

“Nia mak hakarak ba ka, nia atu lori ema barabarak ba. Ba lori ema barak ba, ha’u la simu ida,” Marí Alkatiri, hateten tán.

Hatán kona-bá Lere Anan Timur, hanesan mós membru CCF ne’ebé oras ne’e deklara kandidata aan mós ba Prezidente Repúblika (PR) períodu 2022 -2027 no bele influensia votu militante no simpatizante FRETILIN nian ba kandidatu Francisco Guterres  “Lú Olo”,  Alkatiri ho lia tun dehan, tun ba baze mak haree de’it.

“Ita tun ba baze mak ita haree, konsentra ka deskonsentra ka, deskoloniza ka, saida ka, ita tun ba baze mak ita haree,” Alkatiri hateten.

Jornalista: Rogério Pereira Cárceres