Hatutan.com, (07 Fevereiru 2022), Díli—Atleta ski Timor-Leste (TL), Yohan Gonçalves orgullu tanba reprezenta Timor-Leste iha jogus winter Olimpic iha Beijing, Kapitál Xina.

Atleta ski Timor-Leste (TL), Yohan Gonçalves orgullu tanba reprezenta Timor-Leste iha jogus winter Olimpic iha Beijing, Kapitál Xina. Foto/ FSTL.

“Ha’u sente orgullu tebes tanba dala ida tán depois de liu hosi esforsu no luta ne’ebé difísil bele reprezenta ha’u nia rai Timor-Leste, iha jogus olimpico ne’e,” Hatutan.com sita espresaun Yohan Gonsalves iha komunikadu, Segunda (07/02/2022).

Notisia iha Relasaun:Atleta Ski TL Yohan Gonçalves Sei Joga iha Winter Olímpiku Xina 2022

Atleta ho idade 27 ne’e, sei kompete iha kategoria slalom no slalom jigante ne’ebé primeira vez nia kualifika iha fulan hirak liu bá iha Uni Emiradu Árabe. 

Yohan Gonçalves sei hahú kurida iha kategoria Slalom Jigante (Giant Slalom) ne’ebé sei hala’o iha Domingu, 13 Feveriru tuku 11:15 oras Timor-Leste no iha loron 16 Fevereiru, sei kontinua kompete iha kategoria Slalom iha tuku 11:15 oras Timor-Leste.

Atleta sira ne’ebé kualifika ba jogus olimpiku, ninia pontus tenke menus hosi 140.

Iha fulan Novembru 2021, liu hosi kompetisaun kurida ski internasionál ne’ebé organiza hosi Federação de Ski de Timor-Leste (FSTL) iha Mall of Emirates, Dubai, Yohan dala ida tán ba dala tolu tutuir malun kualifika ba jogus olimpikus malirin iha Beijing, Xina, ne’ebé oras-ne’e la’o hela.

Yohan Gonçalves nia susesu hakat ba winter olimpiku Beijing mai hosi esforsu Kurida Timor-Leste no Kurida Jamaika ne’ebé hala’o iha Montenegro hodi kualifika ba kurida Slalom no mos Slalom Jigante.

Atleta ski Timor-Leste (TL), Yohan Gonçalves orgullu tanba reprezenta Timor-Leste iha jogus winter Olimpic iha Beijing, Kapitál Xina. Foto/ FSTL.

“Ha’u hakarak hato’o ha’u nia obrigadu ba ha’u nia ekipa, espesialmente ha’u nia treinadór, FSTL no mós Governu Timor-Leste ne’ebé fó ona apoiu durante ne’e,” nia subliña.

Iha esperansa katak maun-alin no inan feton sira iha Timor-Leste sei suporta maski sira labele mai assiste diretamente kompetisaun ne’e.

Yohan Gonçalves hahú koñese ski dezde halo tinan rua iha nia moris fatin iha França. Kuandu halo tinan ualu, nia mehi hakarak reprezenta Timor-Leste iha jogus olímpiku ne’ebé ohin loron sai realidade.

Iha 2014, depois de jogu olimpiku iha Sochi, Rúsia, Governu Timor-Leste husu nia sai hanesan Embaixadór ba Foinsa’e sira (Youth Ambassador) no ho laran kontenti asumi responsabilidade ne’e.

Liu hosi esforsu no kompetisaun barak, iha 29 Dezembru 2013 iha kompetisaun ida iha Serbia, Yohan konsege klasifika ba dala uluk ba jogus winter olimpiku ne’ebé hala’o iha sidade Sochi, Rusia iha 2014.

Liu tiha tinan haat, iha 2018, Yohan kualifikadu ba daruak ba jogus olimpiku malirin iha sidade Pyeongchang, Korea do Súl no ida ne’e Partisipasaun Yohan nian iha jogu winter Olimpic ba dala tolu iha nia karreira.

Jogu winter Olimpiku agora daudaun ne’e partisipa hosi nasaun 84 no sei remata iha loron 20 Fevereiru 2022. 

Jornalista: Vito Salvadór