Hatutan.com, (07 Fevereiru 2022), Díli-Konfederasaun Desportu Timor Leste (CDTL, sigla portugés) atribui osan alojamentu no subsídiu mensál ba atleta inklui treinadór sira atu halo preparasaun molok enfrenta jogu Sea Games iha Vietname iha Maiu 2022.

Notísia iha Relasaun: TL Tenke Hatudu Prestasaun iha Sea Games Vietnam

CDTL atribui osan alojamentu no subsídiu mensál ba atleta inklui treinadór, Segunda (07/02/2022). Foto/Hatutan.com

Total subsídiu alimentár ba atleta no treinadór ne’ebé CDTL aloka hamutuk $57,600.00 no kada federasaun sei hetan montante diferente tuir númeru atleta no treinadór ne’ebé iha.

Federasaun Taekwondo hetan orsamentu ho valór $9,720.00, Federasaun Atletizmu $8,640.00, Federasaun Boxing $7,560.00, Federasaun Karate-Do $6,480.00, Federasaun Natasaun $4,320.00, Federasaun Halterofelismo $6,480.00 no Federasaun Futeból nia finansiamentu mai direita husi Federasaun Futeból Timor-Leste (FFTL).

Enkuantu ba subsídiu mensál ba kada atleta  $100.00  no treinadór $ 125.00 no ba fulan tolu CDTL aloka orsamentu hamutuk $$ 17,100.00.

Husi fundus ne’ebé iha CDTL rezerva mós fundus ba  konsentrasaun atleta sira molok arranka ba Vietname husi total orsamentu ne’ebé Sekretáriu Estadu Juventude no Desportu (SEJD) atribui ho valór $ 81,000.00.

Prezidente CDTL, Macario Floriano Sanches ba jornalista sira iha edifísiu CDTL, Segunda (07/02/2022), hateten CDTL halibur prezidente federasaun hitu (7) ne’ebé sei kompete iha Sea Games Vietname atu CDTL bele atribui sira-nia subsídiu alimentár no subsídiu mensál ba preparasaun durante fulan tolu.

“Ami mos esplika ba federasaun sira katak osan ne’e mai husi orsamentu jerál estadu ne’ebé mak SEJD aloka, tamba ne’e ,federasaun sira iha responsabilidade ba relatóriu mensál,” Macario Floriano Sanches hateten.

Prezidente CDTL, Macario Floriano Sanches . Foto/Hatutan.com

Prezidente CDTL ne’e hatutan, subsídiu sira ne’ebé CDTL atribui atu motiva federasaun sira halo preparasaun ba atleta sira ho másimu hodi bele garante prestasaun iha eventu Sea Games ne’ebé sei mai.

Prezidente Federasaun Taekwondo Timor Leste, Gabriel da Costa hateten, hanesan ezekutivu federasaun sempre halo akompañamentu ba atleta sira hodi nafatin garante sira nia kualidade preparasaun atu bele iha kondisaun ida di’ak maske sira hela iha uma hodi ba tuir treinamentu iha sentru treinamentu Taekwondo iha Tibar, Liquiça.

Atu garante prestasaun iha eventu Sea Games  treinadór hamutuk ho ezekutivu federasaun sempre halo avaliasaun ba kada sesaun treinu atleta sira-nian no bandu atu atleta sira konsumu hahán ne’ebé nia proteína barak, inklui asegura husi dopajen nune’e bandu atleta sira konsumu ai-moruk arbiru.

“Ita bandu ita nia atleta sira han arbiru no hemu ai-moruk sem reseita husi doutór sira,” nia haktuir.

Iha parte seluk, prezidente Halterofelismo, Vicente Carvalho da Silva hateten subsídiu ne’ebé iha hatudu ona Ggovernu nia seriedade atu tau mós atensaun ba modalidade desportiva iha Timor-Leste tamba ne’e barak ka uitoan federasaun simu no agradese ba apoiu ne’ebé Governu atribui.

Nia  subliña maske ho preparasaun ne’ebé minimu maibé atleta sira sei halo esforsu hotu atu oferese vitória ba povu no nasaun Timor-Leste.

Prezidente Federasaun Karate-Do Timor-Leste, Filomeno Soares de Araújo hateten, ho subsídiu ne’ebé iha bele tulun atleta sira halo preparasaun di’ak liután hodi ba kompete iha Sea Games Vietname tamba durante ne’e atleta no treinadór sira utiliza osan rasik hodi halo movimentasaun ba treinamentu fíziku no tátiku iha fatin diferente.

Ezekutivu ne’e garante Karate-Do sei oferese medalla ba Timor-Leste tamba durante ne’e iha ona preparasaun di’ak.

Hafoin atribuisaun subsídiu ne’e prezidente CDTL komprometidu sei halo monitorizasaun ba federasaun hotu ne’ebé sei reprezenta Timor-Leste iha Sea Games hodi haree besik liután federasaun sira-nia preparasaun.

Jornalista: Vito Salvador