Hatutan.com, (14 Fevereiru 2022), Díli-Associação Nacional de Música de Timor Leste (ALMAMOR) inisia programa lansamentu albun kompilasaun knananuk ba prezerva meiu ambiente tamba husi múzika artista timoroan sira bele fó mensajen pozitivu ba públiku atu kuidadu meiu ambiente iha Timor Leste.

Prezidente ALMAMOR, Eric Way Watu ho ekipa halo konferénsia ba imprensa, Segunda (14/02/2022). Foto/Hatutan.com

Inisiativa ida-ne’e hetan apoiu finanseira husi kooperasaun Fransa ho orsamentu €4,000.00 liuhusi asina kontratu iha loron 15 Dezembru 2021 hodi finansia prosesu tomak hahú husi inísiu too remata. Tamba ne’e iha implementasaun ba atividade kompilasaun album ne’e, ALMAMOR servisu hamutuk ho Bolu Malu Art and Production hahú husi inísiu ba too remata.

Prezidente ALMAMOR, Eric Way Watu iha konferénsia ba imprensa ne’ebé hala’o iha Fundasaun Oriente, Segunda (14/02/2022), hateten iha kompilasaun ba album natureza ne’e, ALMAMOR fó oportunidade ba artista hotu atu hakerek sira-nia múzika kona-ba natureza ho objetivu bele fanun sosiedade atu tau importánsia ba meiu ambiente.

“Ita hananu kona-bá natureza atu mundu bele simu ita,” Eric Way Watu hateten, prezidente ALMAMOR ne’e hatutan, implementasaun no prosesu tomak ba realizasaun kompilasaun múzika natureza sei organiza husi Bolu Malu Art and Production hamutuk ho ekipa juri sira ne’ebé sei halo selesaun hodi hili mellor múzika atu reprezenta tau iha album kompilasaun ne’ebé ALMAMOR inisia no oportunidade hanesan ba membru hotu tantu sira ne’ebé rejistu ona no mós seidauk rejista hanesan membru ALMAMOR.

Advertisement

“ALMAMOR fasilita no oportunidade ba ema hotu, single ou banda bele submete sira-nia produtu,” nia subliña.

Reprezentante ekipa juri ba selesaun múzika ba album kompilasaun natureza, Eva Pereira hateten hanesan ativista meiu ambiente ne’ebé durante ne’e ativu iha área prezervasaun meiu ambiente sente kontente ho eventu ne’e tamba bele fó hanoin ba komunidade sira atu hahú tau atensaun ho sériu ba problema ambiente ne’ebé oras ne’e sai preokupasaun mundial.

“Liu husi múzika artista sira bele fó mensajen ba komunidade sira hodi proteje ambiente,” Eva Pereira hateten.

Nia akresenta mudansa klimátika akontese tamba ema nia inkuidadu ba meiu ambiente tamba ne’e hein katak ho kompilasaun album natureza ne’e bele lori mudansa iha sosiedade liuliu kuidadu meiu ba natureza nudár knuuk moris kriatura nian.

Ba artista sira ne’ebé sei submete sira nia múzika karik la liu iha selesaun sira nia obra nafatin rejistu iha ALMAMOR, nune’e husu atu artista sira halo deskrisaun kompletu ba sira nia produsaun molok hatama ba ekipa juri.

Advertisement

Ekipa juri ba kompilasaun albun ne’e mak hanesan Mito Freitas, Eva Pereira no Melly Galaxy. Artista Timor oan sira ne’ebé interesadu ho atividade kompilasaun ida ne’e bele hahú hatama sira-nia produtu hahú husi loron 14 fulan-Fevereiru 2022 to’o iha loron 01 fulan-Marsu 2022, no iha loron 30 fula-Abríl sei iha lansamentu ba albun natureza refere.

Jornalista: Vito Salvador