Hatutan.com, (14 Fevereiru 2022), Díli- Atleta Ski Yohan Goutt Gonçalves ne’ebé reprezenta Timor Leste iha kompetisaun Winter olympic Beijing falla iha klase Slalom Jigante (Giant Slalom) no promete sei hadia nia performa iha klase Slalom.

Notísia iha Relasaun: Yohan Gonçalves Orgullu Reprezenta TL iha Jogu Winter Olimpic Xina

Atleta Ski Yohan Goutt Gonçalves monu. Foto/Espesiál

Tuir oráriu ba kurida ski iha kompetisaun winter olimpic, Yohan Goutt Gonçalves sei iha tan jogu ida hodi kompleta nia oráriu iha loron 16 fulan-Fevereiru, ba  kategoria Slalom iha tuku 11:15 oras Timor-Leste.

Sekretariu Jerál Federasaun Ski Timor Leste, Luis de Sousa Sequeira ba Hatutan.com via WhatsApp hateten, iha kurida kategoria Giant Slalom, Domingu (13/02/2022), iha primeira kurida Yohan hatudu rezultadu di’ak  no tama iha segundu kurida mak nia ski ida katik sai no rezulta nia monu. Situasaun ne’e akontese tamba kauza husi neve ou jelu nebe horseik tun.

“Horisehik jelu tun makas los no tempo aat, ne’e mos afeita ba fatin kurida,” Luis de Sousa Sequeira hateten.

Sekretariu Jerál ne’e hatutan tuir lolos fatin ba kurida só bele iha es deit maibé kuandu jelu tun bele estraga fatin ne’e. kondisaun ne’e la afeita deit ba atleta husi Timor Leste maibé ba mos atleta husi nasaun seluk Até atleta potensial nain 3 ne’ebé ema hotu iha espetativa  atu manan mos hetan desastre hanesan Yohan.

“Sei iha tan kategoria seluk bolu Slalom ne’ebé Yohan sei partisipa. Ita espera katak nia sei kurida ho di’ak,” Luis de Sousa Sequeira haktuir.

Atleta Ski Timor Leste, Yohan Goutt Gonçalves hakerek mós iha nia kronolojia Facebook hateten iha kurida ba loron dahuluk nian falla iha segunda ronde tamba ski ne’ebé uza hetan problema kauza husi situasaun iha arena tamba ne’e promete atu hadia iha jogu tuir mai iha klase Slalom.

“Obrigadu ba apoiu no mensajen sira ne’ebé ha’u simu,” Yohan Goutt Gonçalves haktuir iha nia konta Facebook.

Tuir dadus ne’ebé iha total atleta na’in-89 husi nasaun 84 ne’ebé partisipa iha Winter Olympic Game no atletas 46 mak kurida to’o liña final (finish) ba kategoria klase Slalom Jigante (Giant Slalom).

Jornalista: Vito Salvador