Hatutan.com, (25 Fevereiru 2022), Díli-Alumni Parlamentu Foin-sa’e Timor Leste (APFTL) nudár organizasaun juventude ne’ebé sai mahon ba membru  APFTL, Sesta (25/02/2022),  hala’o asembleia jerál ba dala-VI  ho objetivu atu iha transparente institusionál no garante sobrevivénsia organizasaun nian.

Prezidente APFTL Zaulino Gomes da Silva. Foto/Hatutan.com

APFTL hetan apoiu finansiamentu husi Governu ne’ebé atribui husi Sekretáriu Estadu Juventude Desportu (SEJD) liu husi orsamentu jerál estadu no iha tinan 2021 APFTL iha orsamentu hamutuk $290.000,00 no fontes orsamentu seluk mós mai husi  parseiru internasionál sira.

Tuir relatóriu  APFTL  hatudu husi orsamentu $240.000.00 ne’ebé iha organizasaun juventude ne’e konsege ezekuta 83% ba atividade 62 ne’ebé ho nia sumáriu mak hanesan atividade dezenvolvimentu koñesimentu juventude iha moris saudavel, programa dezenvolvimentu moris síviku, programa ba dezenvolvimentu kriatividade juventude nian, halo promosaun ba atividade produtivu sira ne’ebé involve joven sira no kontinua fomenta servisu juventude sira nian atu iha abilidade ba identifika problema sosiál ne’ebé afeta joven sira-nia moris.

Atividade rua seluk liga liu ba dezenvolvimentu institusionál kabe ba kapasitasaun rekursu umanus organizasaun nian no ida seluk mak auto finansiamentu katak oinsá organizasaun bele iha osan rasik atu iha kbiit finanseiru rasik ba moris organizasaun nian.

Prezidente APFTL Zaulino Gomes da Silva ba jornalista sira iha salaun CNE, Dili, hateten husi programa sira ne’ebé APFTL iha konsege ezekuta de’it 46% tamba kauza husi COVID-19 no kalamidade públiku ne’ebé afeta Timor Leste iha loron 04 Abril 2021 nune’e APFTL husik atividade hotu hodi apoiu de’it atividade sosiál no kauza seluk mak organizasaun la iha kapasidade finanseiru natoon hodi finansia nia atividade rasik.

“Bazeia ba planu estratéjiku ne’ebé iha, tinan 2022 APFTL iha programa lima (5) ho atividade hamutuk 38 ne’ebé nia lala’ok sei nafatin ho tinan kotuk no nia mekanizmu implementasaun mak diferente,” Zaulino Gomes das Silva hateten.

Prezidente APFTL ne’e hatutan, iha programa sira ne’ebé asosiasaun iha mai husi programa estratéjiku tinan-lima (5) ne’ebé asosiasaun iha nune’e sei la muda konteúdu husi program no sei nafatin tau importánsia ba atividade kapasitasaun ba foin-sa’e sira no nafatin hakbiit abilidade foin-sa’e liga ho formasaun karakter.

APFTL mós iha nia atividade importante seluk ida iha eleisaun prezidensiál 2022 mak oinsá hakbiit koñesimentu foin-sa’e sira-nian hodi kontribui ba eleisaun ne’e ho hakmatek no labele iha violénsia durante ámbitu kampaña, eleisaun no too iha faze apuramentu.

Ba tinan 2022, APFTL prevee orsamentu $31,000.00 tuir planu programa no atividade ne’ebé iha no oras ne’e APFTL iha hela esforsu atu buka orsamentu ba realizasaun programa no atividade sira.

Jornalista: Vito Salvador