Hatutan.com, (20 Juñu 2022), Díli- Alumni Parlamentu Foin-Sa’e Timor-Leste (APFTL), Segunda (20/06/2022), hasoru malu ho Prezidente Repúblika (PR), José Manuel Ramos-Horta, hodi hato’o sira-nia pozisaun oinsá fó advokasia bá governu iha setor edukasaun, empregu no partisipasaun síviku.

Alumni Parlamentu Foin-Sa’e Timor-Leste (APFTL). Foto/Hatutan.com

Prezidente APFTL, Zaulino Gomes da Silva, hateten APFTL marka audiénsia ho Prezidente Repúblika ko’alia uitoan kona-bá ezisténsia asosiasaun nian, tanba prezidente atuál mak inisia Programa Parlamentu Foin-Sa’e nian.

 Iha sorumutuk ne’e APFTL informa bá Prezidente Repúblika kona-bá estudu ida ne’ebé mak halo iha tinan kotuk liga bá joven sira nian, iha setor edukasaun, empregu no partisipasaun síviku.

APFTL halo advokasia bá Governu oinsá politika Governu nian atu tau orsamentu jerál estadu (OJE) nian bá joven sira liga bá setor Edukasaun nian.

Tuir rezultadu peskiza APFTL bá joven sira liuliu estuda iha eskola hatudu  40% seidauk tuir preferénsia joven nian. No durante joven sira-nia preferénsia iha eskola tékniku vokasional menus liu kompara ho eskola sekundáriu jerál, tanba ensinu sekundáriu  jerál prefere liubá kursu siénsia naturais nian duke tékniku vokasional.

APFTL husu bá polítiku sira, liuliu makaer ukun sira iha ministériu edukasaun tenke tau atensaun bá setor edukasaun nian, nune’e bele buka solusaun bá problema edukasaun nian.

Iha sorumutuk dahuluk APFTL ho Xefe Estadu ne’e APFTL informa mós asuntu ida kona-bá survei liga Liu bá internet, komportamentu labarik no adolexente ne’ebé utiliza internet. Liga ho kampaña ba internet saudavel ne’ebé Governu iha maibé laiha evidénsia ida hatudu bá Governu, hodi tulun Governu atu halo kampaña internet saudavel ne’e oinsá.

APFTL iha relatóriu survei ida kona-bá utiliza internet saudavel, oinsá tulun politika na’in sira hodi lansa programa ne’ebé mak bele iha resposta kompletu.

Hafoin hasoru malu ho APFTL, Xefe Estadu orienta kedas APFTL bá hasoru malu ho asesór prezidénsia repúblika nian ne’ebé trata asuntu edukasaun no juventude hodi rona direita hanoin no paresér sira liga ho APFTL nia servisu durante ne’e.

Jornalista         : Vito Salvador