Hatutan.com, (01 Marsu 2022), Díli— Conferênsia Episcopál Timorense (CET) hakarak haloos konfuzaun sira ne’ebé surje iha komunidade sarani nia le’et, katak Padre dispensadu Martinho Germano da Silva Gusmão “lakon nia estadu klerikál” ho maneira permanente no la’ós tranzitóriu ho virtude hosi Reskritu númeru 3593/21, 13 Outubru 2021, fó ba nia, konforme Cânon 290, númeru 3, C.D.C.

Lakon estadu klerikál katak, la’ós ona nai lulik, nia fila ona ba vida nu’udár leigu. Nune’e konsede mós ba nia dispensa selibatu nian, konforme Cânon 291, C.D.C. Dispensa selibatu katak livre hosi obrigasaun selibatu ka bele ona simu sakramentu matrimóniu.

Notisia iha Relasaun:Papa Francisco Demite Padre Martinho Gusmão Hosi Estadu Klerikál

“Nia la’ós de’it suspendidu hosi Ministériu Saserdotál nian maibé konforme Reskritu hateten no norma sira Igreja nian, Esklui ona hosi ezersísiu ministériu sagradu bainhira lakon ona ho maneira permanente estadu klerikál,” Prezidente Ezekutivu Justisa, pás no integridade kriansa Timor Leste, Padre Júlio Crispim esplika iha sede CET Balide, Tersa (01/03/2022).

Ho Karta númeru 3593/21, 15 Outubru 2021, Eminentissimu Kardeál Luis António Tagle, Prefeitu kongregasaun ba Evanjelizasaun Povu, enkoraza Martinho Gusmão atu iha vida ezemplár ida nu’udár leigu no atu presta servisu útil, buras ba komunidade Kristaun liu hosi Dom no talentu sira ne’ebé Maromak haraik ba nia.

Karta ne’ebé temi ne’e, la hateten esplisitu kona-bá fó korajen ka fó referênsia ruma atu tama iha vida polítika ka atu kandidata ba naran kargu polítika ida, maski nia livre atu hili dalan ba atividade polítika hanesan kualkér leigu kristaun sira seluk.

“Nia la simu Karta pessoál ruma hosi Santo Padre, maibé sita de’it karta hosi Kardeál Tagle, ne’ebé haruka hodi Papa nia naran ba eis saserdote sira ne’ebé lakon ona sira nia estadu klerikál tuir sira rasik husu, nune’e, konvida sira atu moris iha vida ezemplár ida,” nia subliña.

Uma Kreda nia pozisaun imparsiál ba kandidatu hotu-hotu no la afavór ba kandidatu ida, sidadaun ka sarani hotu-hotu uza nia devér síviku tuir konsiénsia atu hili nia lider.

“Tanba ne’e, bandu atu kandidatu sira uza patrimóniu Uma Kreda nian durante kampaña,” esklarese pozisaun CET.

Kandidatu hotu-hotu iha liberdade atu uza instrumentu sira ne’ebé disponível iha sosiedade, maibé proibidu atu uza patrimóniu Uma Kreda nian liuliu símbolu, sinais no figura sira ne’ebé liga ba fiar Uma Kreda nian.

Martinho Gusmão oras ne’e daudaun nu’udár kandidatu Prezidente Repúblika períudu 2022 to’o 2027 ho númeru sorteiu 13 ne’ebé hetan apoiu hosi Partidu Unidade Dezenvolvimentu Demokrátiku (PUDD).

Notisia iha Relasaun:Dom Basílio suspende Padre Martinho hosi Ministériu Saserdotál

Jornalista: Vito Salvadór