Hatutan.com, (03 Marsu 2022), Díli—Kandidata independente ba Prezidente Repúblika 2022-2027 ho númeru sorteiu 1,  Isabel da Costa Ferreira, husu ba husu povu labele pasivu no espera iha eleisaun prezidénsia repúblika, 19 Marsu ne’e, povu Timor tomak matan nakloke neon nain para foti desizaun ida loos, di’ak ba nia família, komunidade no ba nasaun.

Kandidata PR 2022-2027. Isabel da Costa Ferreira. Foto/Espesiál

“Ita ukun an iha sékulu 21, liu-liu ba joven sira labele sai pasivu, hanesan ema uza de’it, imi tenke sai joven ne’ebé kriativu, hatene verifika para labele monu ba manipulasaun polítika no ema riku nian. Tempu to’o ona Timor atu sai husi situasaun ida-ne’e,”  Isabel da Costa Ferreira hato’o nia mensajen ne’e bainhira hala’o kampaña ba loron daruak nian iha Munisípiu Baucau, Kinta (03/03/2022).

“Ha’u mós mai ho vizaun ida, se oan ida matenek, muda nia moris, muda nia família, muda nia komunidade no muda nasaun. Tan ne’e mak agora daudaun, ha’u implementa hela programa ida ho naran Conta da Bebé hodi prepara ba ki’ik-oan sira nia futuru. Programa ne’e rasik implementa ona iha Munisípiu lima (5).”

Isabel Ferreira hateten, objetivu prinsipál kandidata an hakarak alkansa mehi ne’ebé iha hodi lori povu no rai ida-ne’e ba moris di’ak liuhusi ambisaun hakarak konsolida independénsia hodi promove fé, família ho patria.

Advertisement

“Ha’u mai ho objetivu no mehi ba rai no povu nia moris di’ak  ho vizaun simples, maibé ho ambisioza hakarak konsolida independénsia hodi promove fé, família no patria, ba povu no joven ne’ebé sei moris iha susar no seidauk hetan oportunidade ba estudu no ba empregu,” Isabel Ferreira hateten.

Kandidatu ne’e promete bainhira eleitu, sei halo mudansa ka revolusaun mental hodi muda mentalidade timoroan hodi hamosu espíritu de luta, sakrifika an, solidariedade ba malu hodi tulun malu, nune’e povu bele moris hanesan hodi sai sujeitu ba prosesu dezenvolvimentu.

“Ha’u hakarak sai PR ida ne’ebé ativa no besik liu povu, família, joven, ema kbi’it-laek hodi buka solusaun ba problema ne’ebé sira enfrenta hodi labele sai atan ba polítika no atan ba ema riku sira,” Isabel afirma.

Isabel da Costa Ferreira, lisensiadu iha Direitu, Universidade Nasionál iha Denpasar-Bali, iha tinan 1998 ho esperensia servisu iha administrasaun públiku lubun ida, mak hanesan asesora ba  Sekretaria  Estadu Protesaun Sivíl (2018-agora), Xefe Gabinete ba Servisu Antigu Prezidente Repúblika Taur Matan Ruak  nian iha fulan-Juñu  2017- 2018, Komisária ba Komisaun Funsaun Publika  iha tinan 2011-2014, Prezidente ba Komisaun Akompañamentu ba Prosesu Promosaun PNTL husi tinan 2010-2012, asume mós kargu nudár Vise Ministra Justisa iha 2006 no membru Asembleia Konstituinte husi Bankada UDT iha tinan 2001.

Kampaña aberta  Isabel da Costa Ferreira nian iha Munisípiu Baucau hetan apoiu másimu hosi apoiante ne’ebé maioria mai hosi komunidade Baucau rasik no  hetan observasaun  direta hosi observadór nasionál, internasionál no hetan seguransa másimu hosi Polísia Nasionál Timor-Leste (PNTL).

Advertisement

Jornalista: Carmelita Isaac